ЭНГ КИТОБХОН ЁШЛАР САРАЛАНДИ

Китоб – энг яхши тарбия воситасидир. Шу боисдан ҳам дунёнинг турли бурчакларида нотинчликлар, уруш-низолар давом этаётган ҳозиргидай бир вазиятда мамлакатимиз ўсмир-ёшларининг бўш вақтларини мазмунли ўтказиш, маънавиятини юксалтириш, уларни ёт ғоялар таъсиридан асраш мақсадида китоб ўқишга бўлган қизиқиш ва интилишларини қўллаб-қувватлашга, рағбатлантиришга алоҳида эътибор қаратилмоқда.

“Беш ташаббус олимпиадаси” доирасида ўтказилаётган “Ёш китобхон” танлови ҳам шулар жумласидандир.

“Беш ташаббус олимпиадаси”нинг иккинчи мавсуми доирасида “Ёш китобхон” танловини ўтказишдан кўзланган мақсад ҳам айнан буюк аллома, адиб ва мутафаккирларимиз ижодий меросини чуқур ўрганишни тарғиб этиш, ёшларимизни ўзликни англаш, буюк бобокалонларимизнинг ибратли ҳаёти ва ижтимоий фаолиятини чуқур ўрганишга чорлаш, уларни миллий ва умуминсоний қадриятларга ҳурмат руҳида тарбиялаш, ёшлар ўртасида китобхонлик маданиятини кенг оммалаштиришга қаратилган.

Шу йилнинг 20-22 сентябрь кунларида Амударё туманида бўлиб ўтган танловнинг маҳалла босқичида иштирокчилар сонининг аввалги мавсумга нисбатан кўплиги, иштирокчиларнинг берилган саволларга батафсил ва аниқ жавоб беришга интилиши “Ёш китобхон” танловининг нуфузи ортиб, тобора оммалашаётганини ва иштирокчиларнинг ғолиблик учун чинакам интилаётганини кўрсатди.

20 сентябрь куни Манғитдаги ихтисослаштирилган мактабда Янгиобод, Дўстлик, Фаровон маҳаллалари ёшлари иштирок этган танловнинг илк босқичида уларнинг ўзбек мумтоз адабиёти дурдоналари билан бир қаторда ҳозирги давр таниқли адибларининг асарлари, жаҳон адабиёти нодир асарлари юзасидан берилган саволларга яхши жавоб берганликлари, асарларни моҳирона таҳлил қилганликлари ушбу асарларни мутолаа қилиб, тасвирланган воқеалардан ўзларига керакли хулосаларни чиқара олишганидан далолат беради.

Танловда 10-14, 15-19 ва 20-30 ёшлар тоифалари учун алоҳида, алоҳида саволлар тайёрлангани иштирокчилар учун қулайлик яратади. Китобхонлик беллашуви “Беш ташаббус олимпиадаси”нинг бошқа турлари сингари бешта - маҳалла-сектор-туман-ҳудудий ва республика босқичларида ўтказилади.

Шунга кўра, танловнинг инновацион технологиялардан фойдаланган ҳолда ўтказилган маҳалла босқичида иштирок этган 49 та овул ва маҳаллаларнинг 2500 нафардан зиёд ёшлари орасида ғолибликни қўлга киритган 248 нафари сектор босқичида қатнашиш ҳуқуқини қўлга киритдилар.

Шуни эътироф этиш керакки, Ёшлар ишлари агентлиги туман бўлими танловни ўтказишга пухта ҳозирликлар кўрди. Ҳар бир ҳудуддаги мактабларда танловни ўтказиш учун муносиб шароитлар яратилди, беллашувнинг шаффоф, одилона ўтиши таъминланди.

Энди ушбу босқич ғолиблари танловнинг кейинги – сектор босқичида ҳам муваффақиятли иштирок этиш учун интиладилар. Ҳар бир ёш тоифаси мамлакат босқичи ғолиблари Президентимизнинг совғаси – “Spark” автомобилини қўлга киритади.

Ойгул РАЖАБОВА.