ENG KITOBXON YoShLAR SARALANDI

Kitob – eng yaxshi tarbiya vositasidir. Shu boisdan ham dunyoning turli burchaklarida notinchliklar, urush-nizolar davom etayotgan hozirgiday bir vaziyatda mamlakatimiz oʻsmir-yoshlarining boʻsh vaqtlarini mazmunli oʻtkazish, maʼnaviyatini yuksaltirish, ularni yot gʻoyalar taʼsiridan asrash maqsadida kitob oʻqishga boʻlgan qiziqish va intilishlarini qoʻllab-quvvatlashga, ragʻbatlantirishga alohida eʼtibor qaratilmoqda.

“Besh tashabbus olimpiadasi” doirasida oʻtkazilayotgan “Yosh kitobxon” tanlovi ham shular jumlasidandir.

“Besh tashabbus olimpiadasi”ning ikkinchi mavsumi doirasida “Yosh kitobxon” tanlovini oʻtkazishdan koʻzlangan maqsad ham aynan buyuk alloma, adib va mutafakkirlarimiz ijodiy merosini chuqur oʻrganishni targʻib etish, yoshlarimizni oʻzlikni anglash, buyuk bobokalonlarimizning ibratli hayoti va ijtimoiy faoliyatini chuqur oʻrganishga chorlash, ularni milliy va umuminsoniy qadriyatlarga hurmat ruhida tarbiyalash, yoshlar oʻrtasida kitobxonlik madaniyatini keng ommalashtirishga qaratilgan.

Shu yilning 20-22-sentyabr kunlarida Amudaryo tumanida boʻlib oʻtgan tanlovning mahalla bosqichida ishtirokchilar sonining avvalgi mavsumga nisbatan koʻpligi, ishtirokchilarning berilgan savollarga batafsil va aniq javob berishga intilishi “Yosh kitobxon” tanlovining nufuzi ortib, tobora ommalashayotganini va ishtirokchilarning gʻoliblik uchun chinakam intilayotganini koʻrsatdi.

20-sentyabr kuni Mangʻitdagi ixtisoslashtirilgan maktabda Yangiobod, Doʻstlik, Farovon mahallalari yoshlari ishtirok etgan tanlovning ilk bosqichida ularning oʻzbek mumtoz adabiyoti durdonalari bilan bir qatorda hozirgi davr taniqli adiblarining asarlari, jahon adabiyoti nodir asarlari yuzasidan berilgan savollarga yaxshi javob berganliklari, asarlarni mohirona tahlil qilganliklari ushbu asarlarni mutolaa qilib, tasvirlangan voqealardan oʻzlariga kerakli xulosalarni chiqara olishganidan dalolat beradi.

Tanlovda 10-14, 15-19 va 20-30 yoshlar toifalari uchun alohida, alohida savollar tayyorlangani ishtirokchilar uchun qulaylik yaratadi. Kitobxonlik bellashuvi “Besh tashabbus olimpiadasi”ning boshqa turlari singari beshta - mahalla-sektor-tuman-hududiy va respublika bosqichlarida oʻtkaziladi.

Shunga koʻra, tanlovning innovatsion texnologiyalardan foydalangan holda oʻtkazilgan mahalla bosqichida ishtirok etgan 49 ta ovul va mahallalarning 2500 nafardan ziyod yoshlari orasida gʻoliblikni qoʻlga kiritgan 248 nafari sektor bosqichida qatnashish huquqini qoʻlga kiritdilar.

Shuni eʼtirof etish kerakki, Yoshlar ishlari agentligi tuman boʻlimi tanlovni oʻtkazishga puxta hozirliklar koʻrdi. Har bir hududdagi maktablarda tanlovni oʻtkazish uchun munosib sharoitlar yaratildi, bellashuvning shaffof, odilona oʻtishi taʼminlandi.

Endi ushbu bosqich gʻoliblari tanlovning keyingi – sektor bosqichida ham muvaffaqiyatli ishtirok etish uchun intiladilar. Har bir yosh toifasi mamlakat bosqichi gʻoliblari Prezidentimizning sovgʻasi – “Spark” avtomobilini qoʻlga kiritadi.

Oygul RAJABOVA.