Ҳоким ва ёшлар учрашуви: муаммолар ва таклифлар тингланиб, тегишли чора-тадбирлар белгиланди

Ёшлар – ҳар қандай жамиятнинг эртаси. Улар том маънода, Ўзбекистоннинг энг катта бойлиги, бебаҳо хазинаси ҳисобланади. Зеро, янги Ўзбекистон ёшлари – келажагимиз ва истиқболимиз пойдеворидир. Бугун юртимизда уларнинг замонавий илм-фан ва юқори технологияларни мукаммал эгаллашлари учун барча куч ва имкониятлар ишга солинмоқда.

Шунингдек, уларнинг ҳаётида учраётган маиший муаммоларини ҳал қилиш, ижобий ечим топиш, таклиф ва фикрларини ўрганиш мақсадида мунтазам равишда “ҳоким ва ёшлар” учрашувлари ўтказилиб келинмоқда. Амударё туманининг Чойкўл овул фуқаролар йиғинида бўлиб ўтган туман ҳокимининг ёшлар билан навбатдаги учрашуви ҳам айни шу мақсадларга қаратилгани билан аҳамиятлидир.

Учрашувда туман ҳокими Султонбой Йўлдашев, туман Халқ қабулхонаси бўлими мудири Эркин Ражабов, туман ҳокими ўринбосари Маҳмуд Шерметов, тегишли ташкилот масъуллари ҳамда овул ҳудудида истиқомат қилувчи 30дан ортиқ фаол ёшлар иштирок этишди.

Учрашувда туман ҳокими Султонбой Йўлдашев бугунги кунда ёшларга яратилаётган имкониятлар ҳақида гапириб, уларни янада ғайрат-шижоат билан олға интилишга, Ватан корига ярайдиган муносиб фарзанд бўлишга даъват қилди.

Шунингдек, Ўзбекистон Республикаси Президентининг 2022 йил 31 август кунги “Қорақалпоғистон Республикасида тадбиркорлик, инновацион техналогиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари” тўғрисидаги фармонининг мазмун-моҳияти ҳақида батафсил тушинтиришлар бериб ўтди.

Қайд этилганидек, ёш тадбиркорларга ишлаб чиқариш ва хизмат кўрсатиш учун зарур асбоб-ускуналарни харид қилиш мақсадида Ёш тадбиркорларни қўллаб-қувватлаш жамғармаси орқали 7 йил муддатга қарз маблағлари тақдим этилади. Шунингдек, оилавий тадбиркорликни ривожлантириш дастурлари доирасидаги лойиҳаларни молиялаштириш учун 2022 йил якунига қадар қўшимча равишда 200 млрд. сўм кредит ресурслари ажратилади.

Шу билан бирга, фақат қорақалпоғистонлик ёшлар учун Олий таълим муассасаларига қўшимча қабул квоталари ажратилгани ёшлар учун катта имкониятдир. Бу ёшларимизнинг олий ўқув юртларида таълим олиб, замон талабларига мос кадрлар бўлиб етишишига имконият яратади.

Йиғилишда туман Халқ қабулхонаси бўлими мудири Эркин Ражабов ёшларнинг ҳеч бир мурожаатлари эътибордан четда қолмаслигини, тадбиркорлик қилиб, оиласига қўшимча даромад келтиришни истовчи ёшларга ҳоким ёрдамчилари томонидан амалий ёрдамлар кўрсатилиб келинаётганини айтиб ўтди.

Учрашув давомида овул ёшларидан таълим соҳаси билан боғлиқ мурожаатлар келиб тушди. Жумладан, контракт тўловининг бир қисми қоплаб берилиши бўйича қилинган мурожаат ҳамда қизларга контракт тўловини тўлаши учун 7 йил муддатга ажратиладиган фоизсиз кредит ажратилиши масаласида мурожаат эгаларига ҳуқуқий тушунтиришлар берилиб, бу борадаги тартиб-таомиллар ҳақида ахборот берилди.

Учрашув давомида ёшларнинг мурожаатлари билан биргаликда таклифлари ҳам тингланди ҳамда ёшлар ўзларини қизиқтирган саволлар билан туман ҳокимига мурожаат қилиб, тегишли жавоблар олишди.

Туман ҳокимлигининг Ахборот хизмати