Hokim va yoshlar uchrashuvi: muammolar va takliflar tinglanib, tegishli chora-tadbirlar belgilandi

Yoshlar – har qanday jamiyatning ertasi. Ular tom maʼnoda, Oʻzbekistonning eng katta boyligi, bebaho xazinasi hisoblanadi. Zero, yangi Oʻzbekiston yoshlari – kelajagimiz va istiqbolimiz poydevoridir. Bugun yurtimizda ularning zamonaviy ilm-fan va yuqori texnologiyalarni mukammal egallashlari uchun barcha kuch va imkoniyatlar ishga solinmoqda.

Shuningdek, ularning hayotida uchrayotgan maishiy muammolarini hal qilish, ijobiy yechim topish, taklif va fikrlarini oʻrganish maqsadida muntazam ravishda “hokim va yoshlar” uchrashuvlari oʻtkazilib kelinmoqda. Amudaryo tumanining Choykoʻl ovul fuqarolar yigʻinida boʻlib oʻtgan tuman hokimining yoshlar bilan navbatdagi uchrashuvi ham ayni shu maqsadlarga qaratilgani bilan ahamiyatlidir.

Uchrashuvda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov, tegishli tashkilot masʼullari hamda ovul hududida istiqomat qiluvchi 30dan ortiq faol yoshlar ishtirok etishdi.

Uchrashuvda tuman hokimi Sultonboy Yoʻldashev bugungi kunda yoshlarga yaratilayotgan imkoniyatlar haqida gapirib, ularni yanada gʻayrat-shijoat bilan olgʻa intilishga, Vatan koriga yaraydigan munosib farzand boʻlishga daʼvat qildi.

Shuningdek, Oʻzbekiston Respublikasi Prezidentining 2022-yil 31-avgust kungi “Qoraqalpogʻiston Respublikasida tadbirkorlik, innovatsion texnalogiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari” toʻgʻrisidagi farmonining mazmun-mohiyati haqida batafsil tushintirishlar berib oʻtdi.

Qayd etilganidek, yosh tadbirkorlarga ishlab chiqarish va xizmat koʻrsatish uchun zarur asbob-uskunalarni xarid qilish maqsadida Yosh tadbirkorlarni qoʻllab-quvvatlash jamgʻarmasi orqali 7-yil muddatga qarz mablagʻlari taqdim etiladi. Shuningdek, oilaviy tadbirkorlikni rivojlantirish dasturlari doirasidagi loyihalarni moliyalashtirish uchun 2022-yil yakuniga qadar qoʻshimcha ravishda 200 mlrd. soʻm kredit resurslari ajratiladi.

Shu bilan birga, faqat qoraqalpogʻistonlik yoshlar uchun Oliy taʼlim muassasalariga qoʻshimcha qabul kvotalari ajratilgani yoshlar uchun katta imkoniyatdir. Bu yoshlarimizning oliy oʻquv yurtlarida taʼlim olib, zamon talablariga mos kadrlar boʻlib yetishishiga imkoniyat yaratadi.

Yigʻilishda tuman Xalq qabulxonasi boʻlimi mudiri Erkin Rajabov yoshlarning hech bir murojaatlari eʼtibordan chetda qolmasligini, tadbirkorlik qilib, oilasiga qoʻshimcha daromad keltirishni istovchi yoshlarga hokim yordamchilari tomonidan amaliy yordamlar koʻrsatilib kelinayotganini aytib oʻtdi.

Uchrashuv davomida ovul yoshlaridan taʼlim sohasi bilan bogʻliq murojaatlar kelib tushdi. Jumladan, kontrakt toʻlovining bir qismi qoplab berilishi boʻyicha qilingan murojaat hamda qizlarga kontrakt toʻlovini toʻlashi uchun 7-yil muddatga ajratiladigan foizsiz kredit ajratilishi masalasida murojaat egalariga huquqiy tushuntirishlar berilib, bu boradagi tartib-taomillar haqida axborot berildi.

Uchrashuv davomida yoshlarning murojaatlari bilan birgalikda takliflari ham tinglandi hamda yoshlar oʻzlarini qiziqtirgan savollar bilan tuman hokimiga murojaat qilib, tegishli javoblar olishdi.

Tuman hokimligining Axborot xizmati