МУДДАТЛИ ҲАРБИЙ ХИЗМАТГА ЧАҚИРИЛУВЧИЛАРНИ САРАЛАШ ДАВОМ ЭТМОҚДА

Мамлакатимизда мудофаа салоҳиятини юксалтириш мақсадида соҳада ислоҳотлар изчил амалга оширилмоқда. Хусусан 2021 йил 30 сентябрда имзоланган “Умумий ҳарбий мажбурият ва ҳарбий хизмат тўғрисида”ги Қонунга ўзгартириш ва қўшимчалар киритиш ҳақида”ги Қонунга мувофиқ ҳарбий хизматга чақирилувчиларни ҳарбий хизматга танлаб олиш жараёнлари ҳам ўзгарди.

Ўзбекистон Республикаси Президентининг 2022 йил 6 мартдаги қарорига мувофиқ муддатли ҳарбий хизматчи чақирилаётган фуқароларни ҳарбий тиббий кўрикдан ўтказиш учун туман, шаҳар мудофаа ишлари бўлимидаги ҳудудий тиббий комиссиялар ва Қорақалпоғистон Республикаси, вилоятлар мудофаа ишлари бошқармалари ҳузурида ҳарбий тиббий комиссиялар ташкил этилди.

Ҳудудий тиббий комиссиялар томонидан соғлиғи даражаси бўйича ҳарбий хизматга яроқли деб топилган чақирилувчилар бутлаш комиссиясида суҳбатдан ўтказилиб, соғлиғининг даражаси, жисмоний тайёргарлиги, фикрлаш қобилияти ва бошқа хусусиятларини инобатга олган ҳолда уларни қўшин турларига тайинлаш бўйича қарор қабул қилинмоқда.

Амударё туман Мудофаа ишлари бўлими хизматчилари туманимизнинг 18 ёшдан 27 ёшгача бўлган чақирилувчиларни навбатдаги 2023 йилги чақирувга тайёрлаш бўйича тизимли ўрганиш ишларини амалга ошираётир. Ўрганиш ишлари 2022 йилнинг 10 августидан бошланди ва 2023 йилнинг 10 февралигача давом этади.

Шу кунгача муддатли ҳарбий хизматга 100 нафар чақирилувчи режим командаларига тайинланди.

Айни кунда ҳам ҳарбий хизматга чақирилувчиларни ҳарбий хизматга танлов асосида қабул қилиш учун синовлар давом этмоқда. Давлатимиз Қуролли Кучлари сафини жисмонан бақувват, билим даражаси юқори, ўз юртининг тинчлик-осойишталигига ўзини дахлдор деб ҳисоблайдиган, маънавиятли ўғлонлар билан бутлаш мақсадида ўтказилаётган танловлар учта босқични ташкил этади.

Ҳарбий хизматга чақирилувчилар яъни 1996-2005 йилда туғилган йигитлар дастлаб умумжисмоний тайёргарлик даражаси бўйича синовдан ўтадилар. Бунда улар 100 метр, 300 метр масофага юугуриш, турникда тортилиш машқларини бажарадилар. Иккинчи босқичда чақирилувчилар билан якка суҳбат ўтказиш орқали билим даражаси, оилавий аҳволи ўрганилади. Ушбу синовларда муддатли ҳарбий хизматни ўташга лойиқ деб топилган чақирилувчилар командаларни бутлаш комиссиясига тавсия қилинади. Бутлаш комиссияси уларнинг қизиқишлари, интилишлари ва салоҳиятини ҳисобга олган ҳолда якуний қарор қабул қилади.

Туман мудофаа бўлими ходимлари ўсиб келаётган ёш авлоднинг Қуролли кучлар сафларида хизмат қилишга муносиб бўлиб вояга етишларига ҳисса қўшиш мақсадида туманимиздаги умумий ўрта таълим мактабларида ватанпарварлик мавзусида кўпгина тадбирлар ўтказмоқда ва уларнинг ҳарбий соҳага қизиқишларини оширишга эришмоқда.

Ҳарбий хизмат – ҳар бир йигитнинг шарафли бурчидир. Ўз Ватанини севган йигитлар унинг осойишталигини асрашга доимо шай бўлади.

Қаҳрамон АҲМЕДОВ, туман Мудофаа ишлари бўлими чақирув бўлинмаси бошлиғи.