ЁНҒИН ХАВСИЗЛИГИ ОЙЛИГИ МУВАФФАҚИЯТЛИ ДАВОМ ЭТМОҚДА

Фавқулодда вазиятларнинг олдини олиш ва уларни бартараф этиш бўйича Ҳукумат комиссиясининг, Қорақалпоғистон Республикаси Вазирлар Кенгашининг ва Амударё тумани ҳокимлигининг баёнлари ижросини таъминлаш мақсадида 2022 йил 15 ноябрь-15 декабрь кунлари оралиғида “Ёнғин хавсизлиги ойлиги” ўтказилмоқла.

Ойликни ўтказиш даври мобайнида иқтисодиёт тармоқлари, ижтимоий соҳа объектлари ҳамда уй-жой фондида ёнғин хавфсизлигини таъминлаш борасида лозим бўлган режавий чора-тадбирлар ҳам ишлаб чиқилиб, амалиётга жорий қилинмоқда.

Аввало шуни алоҳида таъкидлаш керакки, Амударё туманида 2022 йилнинг ўтган даври мобайнида иқтисодиёт тармоқлари, ижтимоий соҳа объектлари ҳамда уй-жой фондида ёнғин хавфсизлигини таъминлашга қаратилган кенг кўламли ишлар олиб борилмоқда.

Хусусан, ёнғинларнинг олдини олиш йўналишида рўйхатга олинган объектларда режали ва назорат тартибидаги текширишлар, тадбиркорлик субъектларига тегишли объектларда ёнғинга қарши профилактик кўриклар ўтказилиб, бу бўйича аниқланган камчиликлар тўлиқ бартараф этилди.

Бундан ташқари, якка тартибдаги уй-жойлар, кўп хонадонли уйлар ва улардаги хонадонларнинг ёнғинга қарши ҳолати жиддий текширувдан ўтказилди. Аҳоли билан, шунингдек, ўқув муассасаларида таълим олаётган ўқувчи-ёшлар билан ёнғин хавфсизлигини таъминлашга қаратилган тарғибот тадбирларини ҳар бир овул ва маҳаллада, таълим-тарбия муассасаларида ўтказишга алоҳида эътибор қаратилмоқда.

Жумладан, куз-қиш мавсуми даврида ёнғинларнинг олдини олиш йўналишида рўйҳатга олинган объектларда режали ва назорат тартибидаги текширишлар белгиланган бўлиб, маҳаллаларда, ўқув муассасаларида тушунтириш-тарғибот ишлари олиб борилмоқда.

Хусусан, туман 55-сонли умумтаълим мактаби ўқитувчи ва ўқувчилари иштирокида ёнғин-қутқарув техникалари ва воситаларини намойиш этиш буйича кўргазмали учрашув ўтказилди. Учрашувда туман фавқулодда вазиятлар бўлими ходимлари томонидан ёнғин ўчириш автомобили ва асбоб-анжомлар хусусида зарур тушунчалар берилди.

Бўлиб ўтган учрашувда ёнғин хавфсизлиги ойлиги даврида фавқулодда вазиятлар ходимлари ва аҳолининг ёнғин хавфсизлиги талабларига риоя қилишлари зарурлиги таъкидланди ҳамда ўқитувчи ва ўқувчиларни қизиқтирган саволлар мутахассислар томонидан атрофлича жавоблар берилди.

Айни кунларда туманнинг барча ҳудудларида “Ёнғин хавфсизлиги ойлиги” доирасидаги тадбирлар давом этмоқда. Бўлиб ўтаётган учрашув тадбирларидан ташқари, ўсиб келаётган ёш авлодни қутқарувчи касбига қизиқтириш мақсадида намунавий ва энг замонавий техникалар билан жиҳозланган ёнғин-қутқарув қисмларида “Очиқ эшиклар куни” тадбирлари ҳам ўтказилмоқда.

Унда иштирок этаётган умумтаълим мактабларининг юқори синф ўқувчилари ёнғин-қутқарув қисмлари ходимлари, муҳандис-техниклари билан биргаликда фавқулодда вазиятларда ёнғин хавфининг олдини олиш, ёнғин хавфи юз берганда тезкор эвакуация ва қутқарув хизматларини амалга ошириш бўйича машғулотларда ҳам фаол қатнашмоқдалар.

Мазкур ойлик доирасида амалга оширилаётган бу каби тадбирлар аҳолининг, айниқса, ўқувчи-ёшларнинг ёнғин хавфининг олдини олиш борасидаги билимларини мустаҳкамлаш имконини бермоқда.

Робия ЙЎЛДОШЕВА.