Муддатли ҳарбий хизматга чақирилувчилар ва уларнинг ота-оналари иштирокида учрашув ўтказилди

Ўзбекистон Республикаси Қуролли Кучлари сафини ҳар томонлама етук, соғлом, жисмонан бақувват, интеллектуал салоҳиятли чақирилувчилар билан бутлаш, чақирилувчилар онгида миллий ғурур, она юртга садоқат ва ватанпарварлик тўйғусини кучайтириш мақсадида Амударё тумани Мудофаа ишлари бўлими томонидан самарали ишлар амалга оширилмоқда.

13 февраль куни туман Маданият бўлими биносида Амударё тумани Мудофаа ишлари бўлими шахсий таркиби, туман тиббий комиссияси шифокорлари, ҳамда ҳамширалари, овул ва маҳалла фуқаролар йиғинларининг ҳарбий ҳисоб мутахассислари иштирокида бўлиб ўтган йиғилишда 2023 йилги чақирув мавсумида муддатли ҳарбий хизматга саралаб олинган чақирилувчилар ва уларнинг ота-оналари иштирок этишди.

Йиғилишда “Муддатли ҳарбий ҳизматнинг белгиланган муддатини ўтаб бўлган фуқароларни хизматдан бўшатиш ҳамда Ўзбекистон Республикаси Қуролли Кучларига навбатдаги чақирувни ўтказиш тўғрисида”ги, “Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссияслар фолиятини ташкил этиш тартиби тўғрисидаги” қарорларнинг мазмун-моҳияти кенг тарзда тушунтирилди.

Шунингдек, йиғилиш давомида Амударё тумани мудофаа ишлари бўлими бошлиғи, подполковник Шерзод Муродов чақирилувчиларнинг жисмоний тайёргарлиги, фикрлаш қобилияти, таффакури, фидоийлиги, қизиқишлари ва бошқа хусусиятларини инобатга олган ҳолда, улар бутлаш комиссияси томонидан қўшин турларининг қай бирига тайинланиши ҳақида батафсил маълумот бериб ўтди.

Шунингдек, 2023 йилги чақирувни сифатли ўтказиш юзасидан чақирув ёшидаги фуқарорларни муддатли ҳарбий хизматга чақирилишини ташкил этиш, чақирилувчиларнинг сифатли ва холисона тиббий кўрикдан ўтказилиши, уларнинг маънавий-руҳий фазилатларини ва интелектуал ривожланиш савиясини қонунчиликда белгиланган ҳарбий-касбий мезонларга мувофиқ равишда ўрганиб чиқилишини ва ҳудудий комиссия аъзоларининг самарали ишлашини ташкил этиш мақсадида комиссия аъзоларига зарур шарт-шароитлар яратиб берилишини таъкидлаб ўтди.

Йиғилишда туман Ички ишлар бўлими бошлиғи ўринбосари, ҳудудий комиссия аъзоси Илҳом Абутов чақирилувчилар чақирув қоғозини олиб, белгиланган вақт ичида туман мудофаа ишлари бўлимига сабабсиз келмаган тақдирда биринчи маъмурий баённома расмийлаштирилишини ва қайта содир этса, жиноий жавобгарликка тортилиши бўйича тушинтиришлар бериб, Ватан олдида хизмат қилиш ҳар бир йигитнинг муқаддас бурчи эканлигини айтиб ўтди.

Ундан ташқари, йиғилишда чақирилувчиларнинг қўшин турларига танлаб олинишида ўтказиладиган суҳбатларнинг шаффофлик ва ошкоралигини таъминлаш юзасидан Амударё тумани мудофаа ишлари бўлими ҳузуридаги бутлаш комиссияси раиси, майор Рустам Турсунов маълумот берди.

Жумладан, чақирилувчиларни муддатли ҳарбий хизматга жўнатиш ва улурнинг тиббий кўрик натижаларига кўра командаларга тайинланиши, чақирилувчининг билим даражасини баҳолаш, ҳарбий хизмат муддатини ўтаб бўлган ҳарбий хизмачиларга бериладиган имтиёзлар, яъни олий таълим муассасаларига ўқишга кириш, шартнома асосида ҳарбий хизматчи бўлиб ишлаш тартиби тўғрисида тушунтириб ўтилди.

Чақирилувчиларни ҳудудий тиббий комиссиядан ўтказиш тартиби тўғрисида эса ҳудудий тиббий комиссия катта шифокори Рустам Жуманиёзов маълумот берди. Таъкидланишича, бугунги кунда чақирилувчиларнинг аксариятида ясси оёқлик муаммоси учрамоқда. Шифокор томонидан ясси оёқ муддатли ҳарбий хизмат даврида қандай оқибатларга олиб келиши батафсил тушунтириб ўтилди.

Учрашувда чақирилувчилар ва уларнинг ота-оналари ўзларини қизиқтирган саволлар билан мурожаат қилиб, тегишлича жавоблар олишди.

Туман ҳокимлигининг Ахборот хизмати.