Рўзадорлар учун ифторлик дастурхони ёзилди

Рамазон ойи нафақат ибодат, Яратганнинг ажру савобларига эришиш, балки хайру саховат, инсонлар ўртасида меҳр-оқибат ришталарини мустаҳкамловчи муборак ойдир. Президентимизнинг “Муборак Рамазон ойини муносиб тарзда ўтказиш тўғрисида”ги қарори, унда белгилаб берилган вазифалар ижроси доирасида Амударё туманида рўзадорлар иштирокида меҳр-мурувват, саховат тадбирлари амалга ошириляпти.

Тумандаги барча маҳаллаларда рўзадорлар учун ифторлик дастурхонлари ёзилиб, ижтимоий ҳимояга муҳтож оилалар ҳолидан хабар олинмоқда, совғалар улашилмоқда.

Тумандаги энг сўнгги хизмат кўрсатиш объектларидан бири бўлган “Шер” тўйхонасида Беруний ва Олмазор маҳалласида истиқомат қилувчи рўзадорлар учун ифторлик дастурхонлари ёзилди. Дастурхон рўзадорлар учун ёзилган ноз-неъматлар билан тўлди.

Ифторликда туман ҳокими Султонбой Йўлдашев ҳам иштирок этди.

Файзли дастурхон атрофида кечган суҳбатлар жараёнида Рамазон ойининг фазилатлари ҳақида сўз юритилди. Юртимизга тинчлик, оилаларимизга тотувлик, рўзғорларимизга барака тилаб дуолар қилинди. Дарҳақиқат, ушбу ойни ойларнинг султони деб бекорга айтишмайди. Бу ойда гуноҳлар кечирилиб, инсон нафсини жиловлайди.

Кимдир, бу бебаҳо ва бетакрор тоат-ибодат мавсумида ўзини ҳар томонлама ислоҳ этиб, хатоларини тузатиш, ҳасад, гинаю кудурат, хусумат каби маънавий иллатлардан қалбини мусаффо этиб, ўзи учун покиза ҳаёт саҳифасини очишни мақсад қилган бўлса, яна кимдир хайрли ишлар учун бошқа вақтлардагидан кўра кўпроқ ажру савоблар бериладиган бу қимматли фурсатларни ғанимат билиб, меҳру мурувват, саховат ва силаи раҳм каби олижаноб ишларни кўпроқ амалга оширишга интилади.

Қадимдан мусулмонлар Рамазон кирганда ҳар галгидан саховатлироқ бўлишга одатланганлар. Давлатманд кишилар закотларини ҳам айнан Рамазонда адо этишлари ҳам шундандир. Бу ойнинг баракасидан ҳар бир уй баҳраманд бўлиб, мўминлар қалбига хурсандлик ва шодлик кирсин учун одамлар алоҳида Рамазонга хос хайру эҳсонлари билан бир қаторда закотларини ҳам шу ойда чиқарадилар.

Эҳсон маросимида сўзга чиққанлар муқаддас моҳи Рамазон кунларида муҳтожларга меҳр-оқибат, хайр-саховат кўрсатиш халқимизга хос фазилат эканлигини таъкидладилар. Муборак ой давомида мискинлар ҳолидан хабар олиш, эҳтиёжмандларга хайр-эҳсонлар бериш савобли амаллардан саналиши, зеро, Рамазон инсонларни ўзаро меҳр-оқибатли бўлишга, кексалар ва беморлар, яқинлар ҳолидан хабар олишга, муҳтожларга саховат қилишга чақириши алоҳида таъкидланди.

Эҳсон маросимига тўпланганлар ифторликда туман бош имом-хатиби Абдураҳмон Матсафоевнинг Рамазони шариф шукуҳи, ушбу ойнинг фазилатлари ҳақидаги маърузаларини тинглашди. Маросимда Қуръон оятлари ўқилиб, мамлакатимизда халқ фаровонлиги йўлида хизмат қилиб ўтганлар ҳақига, юртимиз тинч, осмонимиз мусаффо бўлиши, хонадонларимизда ҳамиша тинчлик ҳукм суриши, мўл ва баракали ризқ тилаб, дуолар қилинди.

Овул ва маҳаллаларида бу каби хайр-эҳсон тадбирлари Рамазон ойининг сўнгги кунигача давом этади.

Туман ҳокимлигининг Ахборот хизмати.