Божхона қўмитаси ташаббуси билан эҳтиёжманд аҳоли вакиллари ва нуронийлар учун ифторлик дастурхони ёзилди

Мамлакатимизда муборак Рамазон ойини муносиб тарзда ўтказишга қаратилган кенг кўламли ишлар изчил давом этмоқда. Давлатимиз раҳбарининг “Муборак Рамазон ойини муносиб тарзда ўтказиш тўғрисида”ги қарори асосида бу йил ушбу муборак ой “Рамазон – меҳр-мурувват, аҳиллик ва шукроналик ойи” ғояси остида ташкил ўтказилмоқда. Ушбу эзгу ташаббусдан кўзланган асосий мақсад — халқимизга хос инсонпарварлик, бағрикенглик, саховат ва ўзаро ҳурмат каби қадриятларни янада мустаҳкамлаш, уларни кенг тарғиб этишдан иборат.

Қарор ижроси доирасида жойларда ифторлик дастурхонлари ёзилиб, хайрия тадбирлари ўтказилмоқда. Бундай тадбирлар нафақат диний-маънавий аҳамиятга эга, балки аҳоли ўртасида ўзаро ҳамжиҳатлик ва бирдамлик муҳитини кучайтиришга хизмат қилмоқда. Айниқса, эҳтиёжманд оилалар, кекса инсонлар ва жисмоний имконияти чекланган фуқароларга кўрсатилаётган эътибор жамиятда ижтимоий ҳимоя тамойилларининг мустаҳкамланишига замин яратаяпти.

Рамазон ойи муносабати билан Божхона қўмитаси ташаббуси асосида Қорақалпоғистон Республикасининг Амударё, Беруний ва Тўрткўл туманларида эҳтиёжманд аҳоли вакиллари учун ифторлик тадбирлари ташкил этилди. Ушбу хайрли амаллар орқали юзлаб фуқаролар бир дастурхон атрофида жам бўлиб, муборак ойнинг файзидан баҳраманд бўлишди. Тадбирларда нуронийлар, кенг жамоатчилик вакиллари ҳамда соҳада фаолият юритаётган масъул ходимлар иштирок этди.

Амударё тумани ташкил қилинган ифторлик маросимида сўз олганлар юртдошларимизни муқаддас Рамазон ойи билан самимий қутлаб, амалга оширилаётган хайрия тадбирлари инсонлар ўртасида меҳр-оқибат ришталарини янада мустаҳкамлашга хизмат қилаётганини таъкидладилар. Шунингдек, Рамазон ойининг маънавий фазилатлари, саховат ва шукроналикнинг инсон ҳаётидаги ўрни ҳақида фикр-мулоҳазалар билдирилди. Айтиб ўтилганидек, бу ой нафақат рўза тутиш, балки эзгу амаллар қилиш, муҳтожларга кўмак бериш, қалбларни яқинлаштириш ойидир.

Тадбир давомида дуога очилган қўллар, кексаларнинг самимий тилаклари ва эзгу ниятлари ифторлик дастурхонига алоҳида файз бағишлади. Ёши улуғ инсонларнинг дуолари иштирокчилар қалбида илиқ туйғулар уйғотди. Бундай самимий муҳит жамиятда ўзаро ҳурмат ва бағрикенглик муҳитини янада мустаҳкамлашга хизмат қилади.

Муҳими, мазкур хайрли тадбирлар фақат алоҳида ҳудудлар билан чекланиб қолмаяпти. Республика бўйлаб турли ташкилот ва идоралар томонидан эҳтиёжманд аҳоли қатламларини қўллаб-қувватлашга қаратилган ифторлик ва хайрия акциялари изчил давом эттирилмоқда. Бу эса Рамазон ойининг мазмун-моҳияти — меҳр-мурувват ва шукроналик ғоялари амалда ўз ифодасини топаётганини кўрсатади.

Президентимизнинг “Муборак Рамазон ойини муносиб тарзда ўтказиш тўғрисида”ги қарорида қайд қилинганидек, кейинги йилларда мамлакатимизда инсон қадри, ҳуқуқ ва манфаатларини таъминлаш, жамиятимизда тинчлик, дўстлик ва ҳамжиҳатлик муҳитини мустаҳкамлаш, аҳоли, айниқса, эҳтиёжманд тоифаларни ижтимоий ҳимоя қилиш борасида амалга оширилаётган кенг кўламли ислоҳотлар туфайли муқаддас ислом динининг инсонпарварлик моҳияти, ўзаро аҳиллик, саховат ва шукроналик ғояларини ўзида мужассам этган муборак Рамазон ойи халқимиз қалбига янада яқин ва мўътабар айёмга айланмоқда. Ушбу маътабар ва муборак айём муносабати билан ёзилган ифторлик дастурхони ҳам мана шу хайрли ишларнинг амалий ифодаси бўлди.

Муборак Рамазон ойини юқори савияда ташкил этиш, эҳтиёжмандларга ёрдам кўрсатиш ва миллий қадриятларимизни асраб-авайлашга қаратилган бу каби эзгу ишлар жамиятимизда инсонпарварлик тамойилларини янада мустаҳкамлашга ҳисса қўшмоқда.