Сайёр қабуллар – муаммоларни ҳал қилишнинг самарали механизми

Мамлакатни жадал ижтимоий-иқтисодий ривожлантириш, биринчи навбатда аҳоли учун муносиб турмуш шароити яратиш, шунингдек, аҳолининг бунёдкорлик салоҳиятини рўёбга чиқаришга қаратилган қонунлар, қатор муҳим давлат ва ҳудудий дастурлар қабул қилинди. Мазкур ҳужжатларнинг амалдаги ижросини таъминлаш мақсадида ҳудудларда турли корхона ва ташкилотлар томонидан сайёр қабуллар ўтказилиб келинмоқда.

Дарҳақиқат, Президентимиз томонидан илгари сурилган ва бугун ҳаётимиздан тобора чуқурроқ ўрин олаётган “Халқ давлат идораларига эмас, давлат идоралари халқимизга хизмат қилиши керак” тамойили юртдошларимизнинг ҳаётдан рози бўлиб яшашига замин яратмоқда. Ана шу тамойилнинг амалий ифодаси сифатида Кадастр агентлиги Қорақалпоғистон Республикаси бошқармаси томонидан Амударё туманида сайёр қабул ўтказилди.

Сайёр қабул давомида фуқароларнинг уй-жой кадастр масалалари бўйича мурожаатлари тингланди. Мурожаат эгалари асосан, қонуний равишда қурилган қурилиш объектларига кадастр ҳужжатларини олиш масаласида мурожаат қилдилар.

Келиб тушган 8 та мурожаатдан 3 таси шу ернинг ўзида ижобий ҳал этилган бўлса, 4 та мурожаатга ҳуқуқий тушунтириш берилди. Қолган 1 та мурожаат бўйича эса масъул шахсалар бириктирилиб, ижроси назоратга олинди.

Шу ўринда айтиш керакки, бу каби ўтказилаётган сайёр қабуллар ҳудудни ижтимоий-иқтисодий ривожлантириш йўлидаги тўсиқларни тезроқ аниқлаш ва ҳал этиш имкониятини бермоқда. Шунингдек, уларнинг мунтазам йўлга қўйилгани аввалги учрашувларда белгиланган ишлар ижроси устидан назоратни кучайтирмоқда.

Мухтасар айтганда, сайёр қабуллар аҳоли муаммоларини жойида, тез ва самарали ҳал этиш имконини бераётгани, ҳудудларда йиллар давомида йиғилиб қолган муаммоларни аниқлаш ва бартараф этилишида давлат органлари ва ташкилотлари олдига вазифалар қўяётгани ва ушбу вазифаларни тўлақонли бажаришга ундаётгани билан муҳим аҳамият касб этмоқда.

Туман ҳокимлигининг Ахборот хизмати.