“БЕШ МУҲИМ ТАШАББУС – ЁШЛАРГА ҚАНОТ” ГРАНТ-ЛОЙИҲАСИ ДОИРАСИДА ЁШ ИСТЕЪДОД ЭГАЛАРИНИНГ КОНЦЕРТ ДАСТУРИ ЎТКАЗИЛДИ

Мамлакатимизда болаларни, шу баробарида ногиронлиги бўлган болаларни ижтимоий қўллаб-қувватлаш, ижтимоий фаоллигини ошириш, уларнинг соғлом тенгдошларидан кам бўлмаган шароитларда таълим-тарбия олишлари, ўз иқтидорларини намоён этишлари учун зарур шарт-шароитлар яратишга қаратилган чора-тадбирлар туфайли имконияти чекланган ёшлар орасида “Беш ташаббус олимпиадаси” иштирокчилари тобора ошиб бормоқда. Уларни “Беш муҳим ташаббус” доирасидаги тадбирларга фаол жалб қилиш мақсадида “Менинг оилам” газетаси ижодий жамоаси томонидан ҳам кенг қамровли маънавий-маърифий тадбирлар амалга оширилиб келинмоқда. Хусусан “Беш муҳим ташаббус – ёшларга қанот” грант-лойиҳаси доирасида ёшларнинг мусиқа, рассомлик, адабиёт, театр ва санъатнинг бошқа турларига қизиқишларини оширишга, истеъдодларини юзага чиқиришга қаратилган танловлар, давра суҳбатлари, ёш ижрочиларнинг концерт дастурлари кўплаб ижодга мойил ёшларни кашф этиш имконини бермоқда.

Жорий йилнинг 1 июнь – Халқаро болаларни ҳимоя қилиш куни муносабати билан Амударё тумани марказидаги сўлим Истироҳат боғида ташкил этилган ёш ижрочиларнинг концерт дастури ҳам ногиронлиги бўлган ёшлар қалбида мусиқа ва санъатга меҳр ва ихлос уйғотгани билан муҳим аҳамият касб этди.

Амударё туман Маданият ва туризм бўлими тасарруфидаги Чойкўл, Уйшин, Қангли, Бўзёп, Қиличбой, Бобур номли маданият марказлари ҳузурида ташкил этилган турли мусиқий йўналишлардаги тўгараклар аъзолари, 9-сонли ва 21-сонли болалар мусиқа ва санъат мактабларининг ёш ижрочилари томонидан кечқурунги соат 17:00дан 21:00гача давом этган дилрабо концерт дастури томошабин болалар, ногиронлиги бўлган ёшлар ва уларнинг ота-оналарига байрамона қувонч ҳадя этди. Айниқса, туман Маданият маркази ва ҳудудлардаги маданият марказлари қошида ташкил этилган, халқ чолғулари, хонандалик ва рақс тўгараклари, шунингдек 9-сонли ва 21-сонли болалар мусиқа ва санъат мактабларининг иқтидорли ўқувчилари томонидан ижро этилган куй-қўшиқлар тадбир иштирокчиларига завқ-шавқ бағишлади. Ёш ижрочилардан Динора Юсупова, Саидбек Бектемиров, Азизбек Назирбоев, Комронбек Назирбоевлар талқинидаги она Ватан, тинчлик ва дўстликни тараннум этувчи ашулалар санъатсевар ёшларга олам-олам завқ қувонч бағишлади.

Шунингдек, тадбир иштирокчилари иқтидорли, ёш созандалар томонидан ижро этилган ўзбек ва қардош халқлар куйларини тинглаб, баҳра олдилар. 9-сонли ва 21-сонли болалар мусиқа ва санъат мактабларида таълим-тарбия олаётган иқтидорли созанда ўқувчи-ёшлар ижросидаги бири-биридан дилрабо куйлар, умидли, ёш хонандалар Озодбек Рўзимов, Озодбек Бекмуродов, Достон Қулимбетов, Одилбек Қутимовлар ижро этган ашулалар, рубобчилар гуруҳи томонидан маромига етказиб ижро қилинган ажойиб куйлар, гитара чолғусида Асадбек Қурбонбоев, Мирзабек Чоршамов, Хурсанд Сафарбоевлар ижросидаги қардош халқлар куйлари тадбир иштирокчиларига қалбига хушнудлик бағишлади.

1 июнь – Халқаро болаларни ҳимоя қилиш куни муносабати билан ногиронлиги бўлган ёшларнинг мусиқа ва санъатга қизиқишини ошириш мақсадида Амударё туман Маданият ва истироҳат боғида ташкил этилган ёш истеъдод эгаларининг концерт дастури ҳар бир қалбда санъатнинг сеҳрли оламига чексиз меҳр ва ихлос уйғотгани билан муҳим аҳамият касб этди

Робия ЙЎЛДОШЕВА.