“BESh MUHIM TAShABBUS – YoShLARGA QANOT” GRANT-LOYIHASI DOIRASIDA YoSh ISTEʼDOD EGALARINING KONTsERT DASTURI OʻTKAZILDI

Mamlakatimizda bolalarni, shu barobarida nogironligi boʻlgan bolalarni ijtimoiy qoʻllab-quvvatlash, ijtimoiy faolligini oshirish, ularning sogʻlom tengdoshlaridan kam boʻlmagan sharoitlarda taʼlim-tarbiya olishlari, oʻz iqtidorlarini namoyon etishlari uchun zarur shart-sharoitlar yaratishga qaratilgan chora-tadbirlar tufayli imkoniyati cheklangan yoshlar orasida “Besh tashabbus olimpiadasi” ishtirokchilari tobora oshib bormoqda. Ularni “Besh muhim tashabbus” doirasidagi tadbirlarga faol jalb qilish maqsadida “Mening oilam” gazetasi ijodiy jamoasi tomonidan ham keng qamrovli maʼnaviy-maʼrifiy tadbirlar amalga oshirilib kelinmoqda. Xususan “Besh muhim tashabbus – yoshlarga qanot” grant-loyihasi doirasida yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirishga, isteʼdodlarini yuzaga chiqirishga qaratilgan tanlovlar, davra suhbatlari, yosh ijrochilarning kontsert dasturlari koʻplab ijodga moyil yoshlarni kashf etish imkonini bermoqda.

Joriy yilning 1-iyun – Xalqaro bolalarni himoya qilish kuni munosabati bilan Amudaryo tumani markazidagi soʻlim Istirohat bogʻida tashkil etilgan yosh ijrochilarning kontsert dasturi ham nogironligi boʻlgan yoshlar qalbida musiqa va sanʼatga mehr va ixlos uygʻotgani bilan muhim ahamiyat kasb etdi.

Amudaryo tuman Madaniyat va turizm boʻlimi tasarrufidagi Choykoʻl, Uyshin, Qangli, Boʻzyop, Qilichboy, Bobur nomli madaniyat markazlari huzurida tashkil etilgan turli musiqiy yoʻnalishlardagi toʻgaraklar aʼzolari, 9-sonli va 21-sonli bolalar musiqa va sanʼat maktablarining yosh ijrochilari tomonidan kechqurungi soat 17:00dan 21:00gacha davom etgan dilrabo kontsert dasturi tomoshabin bolalar, nogironligi boʻlgan yoshlar va ularning ota-onalariga bayramona quvonch hadya etdi. Ayniqsa, tuman Madaniyat markazi va hududlardagi madaniyat markazlari qoshida tashkil etilgan, xalq cholgʻulari, xonandalik va raqs toʻgaraklari, shuningdek 9-sonli va 21-sonli bolalar musiqa va sanʼat maktablarining iqtidorli oʻquvchilari tomonidan ijro etilgan kuy-qoʻshiqlar tadbir ishtirokchilariga zavq-shavq bagʻishladi. Yosh ijrochilardan Dinora Yusupova, Saidbek Bektemirov, Azizbek Nazirboyev, Komronbek Nazirboyevlar talqinidagi ona Vatan, tinchlik va doʻstlikni tarannum etuvchi ashulalar sanʼatsevar yoshlarga olam-olam zavq quvonch bagʻishladi.

Shuningdek, tadbir ishtirokchilari iqtidorli, yosh sozandalar tomonidan ijro etilgan oʻzbek va qardosh xalqlar kuylarini tinglab, bahra oldilar. 9-sonli va 21-sonli bolalar musiqa va sanʼat maktablarida taʼlim-tarbiya olayotgan iqtidorli sozanda oʻquvchi-yoshlar ijrosidagi biri-biridan dilrabo kuylar, umidli, yosh xonandalar Ozodbek Roʻzimov, Ozodbek Bekmurodov, Doston Qulimbetov, Odilbek Qutimovlar ijro etgan ashulalar, rubobchilar guruhi tomonidan maromiga yetkazib ijro qilingan ajoyib kuylar, gitara cholgʻusida Asadbek Qurbonboyev, Mirzabek Chorshamov, Xursand Safarboyevlar ijrosidagi qardosh xalqlar kuylari tadbir ishtirokchilariga qalbiga xushnudlik bagʻishladi.

1-iyun – Xalqaro bolalarni himoya qilish kuni munosabati bilan nogironligi boʻlgan yoshlarning musiqa va sanʼatga qiziqishini oshirish maqsadida Amudaryo tuman Madaniyat va istirohat bogʻida tashkil etilgan yosh isteʼdod egalarining kontsert dasturi har bir qalbda sanʼatning sehrli olamiga cheksiz mehr va ixlos uygʻotgani bilan muhim ahamiyat kasb etdi

Robiya YOʻLDOShEVA.