30 июнь – Ёшлар куни. ЧОЙКЎЛ ОВУЛИДАГИ ЁШЛАР ЕТАКЧИСИ ФАОЛИЯТИГА БИР НАЗАР

Ёшларнинг доимий иш билан бандлигини таъминлаш, уларнинг ҳаётларидаги муаммо ва ташвишларини ижобий ҳал этишда овул ва маҳаллаларда фаолият олиб борувчи ёшлар етакчисининг тутган ўрни муҳим аҳамиятга эга. Хусусан, ёшлар етакчиси – ҳоким ёрдамчиси – оила ва хотин-қизлар фаоли ҳамкорлиги асосида ёшлар етакчисининг кундалик иш фаолиятида амалга оширадиган вазифалари талайгина. Айни кунларда 30 июнь – Ёшлар куни муносабати билан бутун мамлакатимиз бўйлаб кенг қулоч ёйган “Ёшлар ойлиги” тадбирларида жойлардаги ёшлар етакчиларининг ўз зиммаларидаги вазифаларни нечоғлик уддалаётганлари алоҳида эътироф этилмоқда.

Амударё туманидаги 49 та овул ва маҳалла фуқаролар йиғинларида ёшлар муаммолари билан шуғулланиш баробарида улар эришаётган ютуқларни оммалаштириш ва ўз вақтида моддий-маънавий рағбатлантириш орқали ўз атрофига фаол, интилувчан ёшларни жипслаштириб, халқимиз фаровонлигига муносиб ҳиссаларини қўшаётган ёшлар етакчилари ҳам кўпчиликни ташкил этади.

Чойкўл овулида фаолият олиб бораётган ёшлар етакчиси Хурсанд Шукуруллаев ҳам ёшлар билан ишлашиш, овул ёшларини эзгу мақсадлар йўлида жипслаштириш, уларнинг бўш вақтларини самарали ташкил этиш, ёшлар тадбиркорлигини ривожлантириш борасида ўзига хос тажрибага эга етакчилардан бири. У аввало ишни овул ҳудудидаги 1218 та хонадонларда истиқомат қилувчи 14 ёшдан 30 ёшгача бўлган ёшлар ҳаётини ўрганишдан бошлади. Шу мақсадда овулдаги ҳоким ёрдамчиси, хотин-қизлар фаоли билан ҳамкорлик режасини ишлаб чиқди ва 14-30 ёш оралиғидаги 1920 нафар ёшлар хатловдан ўтказилди. 915 нафар ёш аёл-қизлар ва 1005 нафар йигитнинг 5 тоифа бўйича бандлиги, ишга лаёқатлилиги, маълумоти, оилавий, ижтимоий, саломатлик ҳолатлари пухта ўрганилиб, “Ёшлар баланси” шакллантирилди. Шу асосда 2023 йил бошидан 121 нафар ёшлар “Ёшлар дафтари”га киритилиб, ижтимоий ҳимояга муҳтож ёшлар ушбу дафтарга тўлиқ қамраб олинди ва уларнинг барчасига ижтимоий ёрдам кўрсатилди. Хусусан, 18 нафар ёшларнинг кредит маблағлари олиш бўйича муаммолари тўлиқ ҳал этилиб, 78 нафар ёшларга эса 1 нуронийга 10 ёш тамойили асосида экишлик ер майдонлари ажратилишида ёшлар етакчиси бош-қош бўлди. Шунингдек, Хурсанд Шукуруллаев 2 нафар ёшнинг касаначилик фаолияти билан шуғулланиш бўйича истагини қўллаб-қувватлаб, уларга зарур асбоб-ускуналар олиб беришда кўмаклашди. Турли ОТМлар ва техникумларда таълим олаётган 15 нафар талабанинг шартнома пуллари тўлаб берилди. Бундан ташқари, 2 нафар кам таъминланган ёш ҳайдовчилик гувоҳномасига эга бўлишлари учун ўқитилди. 6 нафар ёшнинг сафарбарлик чақирув-резерви учун шартнома маблағлари тўланишига яқиндан ёрдам берди.

Овул ёшларини тадбиркорлик фаолиятига қизиқтириш, уларнинг ўз тадбиркорлигини бошлашлари учун кўмаклашиш мақсадида ҳоким ёрдамчиси билан ҳамкорликда фаолият олиб борилаётгани боис, бу борада ҳам сезиларли ютуқларга эришилмоқда. Изланувчан, ташаббускор ёшлардан Қаҳрамон Ўрозимбетовнинг ўз бизнес-лойиҳасини амалга ошириш борасидаги мурожаати ҳоким ёрдамчисининг кўмаги туфайли ижобий ҳал этилди. Натижада овул ҳудудида “Саодат” хўжалик совуни ишлаб чиқариш оилавий корхонаси ташкил этиш бўйича Қаҳрамон Ўрозимбетовга имтиёзли кредит ажратиладиган бўлди. Дониёрбек Отажонов эса АКФА дераза ва эшик ромлари, темир эшиклар ишлаб чиқариш цехи фаолиятини йўлга қўйиш арафасида турибди.

“Ёшлар ойлиги” муносабати билан Санобархон Жумабоеванинг мурожаати ҳам ижобий ҳал этилиб, субсидия асосида “Ёшлар дафтари” жамғармаси ҳисобидан тикув машинаси олиб берилди. Айни пайтда Санобар Жумабоева ўзи тенги қишлоқ ёшларига чеварлик сирларини ўргатишни бошлаб юборди.

Хурсанд Шукуруллаевнинг фаолият кўлами жуда кенг ва серқирра. У ўз фаолиятида “Ёшларнинг бўш вақти – етакчининг иш вақти” шиорига амал қилади. Айни кунларда эса мактабларда ёзги таътил бошланиши муносабати билан 16 00дан кейин овул ҳудудидаги умумтаълим мактабларининг спорт заллари, очиқ стадионларида ёшларнинг бўш вақтларини мазмунли ўтказишга қаратилган турли спорт мусобақаларини ташкил этиш, кутубхоналарда китобхонлик тадбирларини ўтказиш орқали ёшлар маънавиятини юксалтириш, Чойкўл маданият марказида ташкил этилган тўгараклар аъзолари иштирокида кўнгилочар концерт дастурларини ташкил этишга алоҳида эътибор қаратилаётгани боис, овул ёшлари орасида илмга интилувчан, ташаббускор ва изланувчан ёшлар сафи тобора ошиб бормоқда.

Робия ЙЎЛДОШЕВА.