Меҳнатдан бахт топган қишлоқ аёли

Қишлоқ аёли ҳақида гап кетганда, аввало қўллари меҳнатдан қадоқ бўлган, қуёшда юзлари қорайган эрта-ю кеч дала ишлари билан банд бўлган меҳнаткаш ва соддадил аёллар кўз ўнгимизда гавдаланар эди. Лекин, бундан ўн йилча олдинги қишлоқ аёли билан бугунги куннинг қишлоқ аёли ўртасида катта фарқ бор. Кенг дунёқарашга, юксак билим ва салоҳиятга эга бўлган қишлоқ аёллари бугун жамиятнинг фаол қатламига айланиб, ўзининг шахсий позициясини кўрсатмоқдалар. Улар қишлоқ ҳудудларда яшасалар ҳам, шаҳарникидан асло кам бўлмаган муносиб шароитларда яшаб, жамиятнинг ижтимоий-сиёсий ҳаётида ўз фикри билан иштирок этмоқдалар.

Амударё туманининг Қиличбой овулида яшовчи Муқаддас Аллаберганова ҳам мана шундай аёллардан. У 1973 йилда Қиличбой овулида туғилди ва шу овулда вояга етди.

Ўрта мактабдан сўнг, 1995 йилда Нукус давлат педагогика институтининг филология факультетини тугатиб, Феруз Камолов билан оила қурди. Зиёли оилада баркамол фарзандлар туғилиб вояга етади. Оиланинг тўнғич қизи Лайлохон ҳам онасининг касбини танлади. Иккинчи фарзанд Зилолахон эса Нукус давлат педагогика институтининг чет тиллари факультети талабаси, учинчи фарзанд Динорахон эса Тошкент тиббиёт академияси Урганч филиалида таҳсил олади. Уч нафар қиздан кейин туғилган кенжатой ўғил Беҳрузбек эса 83-сонли мактабда 7-синф ўқувчиси. У ҳам опалари сингари олий ўқув юрти талабаси бўлиб, ўз касбининг етук мутахассиси бўлишни ният қилган. Ота-она учун учта қизга яхши тарбия бериш, уларни оилали, ўқимишли қилишдан ортиқ бахт бўлмаса керак.

Эрта тонгдан то шомгача тиним билмайдиган Муқаддас опа 83-сонли мактабда она тили ва адабиёт, қорақалпоқ тили фанларидан дарс беради. Шу билан бирга репетиторлик фаолияти билан ҳам шуғулланади. Айни кунлар таътил вақти бўлса ҳам, ўз ўқувчилари билан мушоира кечалари ўтказиб, уларнинг бўш вақтини мазмунли ўтказишларига ёрдам бермоқда.

Бундан ташқари, Муқаддас опа мўжазгина қўғирчоқ театрини ташкил қилган. Унинг ўз қўллари билан ясаган қўғирчоқлари ёрдамида иқтидорли ўқувчилари мактабгача таълим муассасаларида, оромгоҳларда болаларга саҳна кўринишлар тайёрлаб намойиш қиладилар.

Бу ҳали ҳаммаси эмас. Муқаддас опа ёшлик пайтидан тўқиш билан ҳам шуғулланиб келади. Уни машҳур тўқувчилардан бири деб бемалол айта оламиз. Кўплаб шогирдлар етиштириб, уларга ҳам тўқишнинг сир-асрорларини пухта ўргатиб келмоқда. Унинг тўқиган кийимлари, бежиримлилиги, сифати билан ички бозорларимизда анча харидоргир. Ўзининг асосий касбидан ташқари тўқиш билан шуғулланиб, оиласига қўшимча даромад олиб кираётган оддий қишлоқ аёли китоб ўқишдан, ўз билими ва тажрибасини оширишдан ҳам асло чарчамайди. Муқаддас опанинг шахсий кутубхонасида 2000 дан зиёд турли бадиий ва илмий адабиётлар жамланмаси мавжуд.

Ўзининг педагоглик фаолиятини сидқидилдан бажариб, ўқувчиларнинг нафақат билимини балки дунёқарашини ўстиришга, улага ҳунар ўргатиб, истеъдодларини юзага чиқаришга ёрдам бераётган қаҳрамонимиз аёллик, оналик вазифасини ҳам бекам-у кўст бажариб келмоқда.

У эрталабки соат 5 дан то тунгача тиним билмайди. Шогирдалари билан шуғулланиб бўлгач, нон ёпади, томорқасининг ишлари билан шуғулланади, сигир соғади. Турмуш ўртоғи билан биргаликда барпо қилган мўжазгина боғда ёз ва куз фаслининг сарҳил меваларини териб, қишга озуқа ғамлайди, тиниб-тинчимас оддий қишлоқ аёлининг ҳар бир куни шундай ўтади.

У ўзини дунёдаги энг бахтли инсон деб билади. Меҳнатдан қўллари асло чарчамайди. Меҳнат қилиб ҳеч ким кам бўлмаслигини, ўз меҳнатинг билан топган нон дунёдаги энг ширин нон эканлигини билади.

Дарҳақиқат, Муқаддас опа сингари кўплаб қишлоқ аёллари ҳаёт ташвишларига ўралашиб қолмасдан, юрт ривожи ва халқ фаровонлиги йўлида меҳнат қилмоқда. Уларнинг кўнгли қишлоқнинг кенгликлари каби кенг. Ушбу аёллар борига қаноат қилиб, йўғини яшириб, борини ошириб яшаётган аёллардан. Қишлоқда шаҳардаги каби шароитлар бўлмаса-да, улар асло нолимайдилар. Ўтаётган ҳар бир дақиқасидан унумли фойдаланиб бошқаларга ўрнак бўлгулик даражада ҳаёт кечирмоқдалар.

Фотима Эшимбетова.