Mehnatdan baxt topgan qishloq ayoli

Qishloq ayoli haqida gap ketganda, avvalo qoʻllari mehnatdan qadoq boʻlgan, quyoshda yuzlari qoraygan erta-yu kech dala ishlari bilan band boʻlgan mehnatkash va soddadil ayollar koʻz oʻngimizda gavdalanar edi. Lekin, bundan oʻn yilcha oldingi qishloq ayoli bilan bugungi kunning qishloq ayoli oʻrtasida katta farq bor. Keng dunyoqarashga, yuksak bilim va salohiyatga ega boʻlgan qishloq ayollari bugun jamiyatning faol qatlamiga aylanib, oʻzining shaxsiy pozitsiyasini koʻrsatmoqdalar. Ular qishloq hududlarda yashasalar ham, shaharnikidan aslo kam boʻlmagan munosib sharoitlarda yashab, jamiyatning ijtimoiy-siyosiy hayotida oʻz fikri bilan ishtirok etmoqdalar.

Amudaryo tumanining Qilichboy ovulida yashovchi Muqaddas Allaberganova ham mana shunday ayollardan. U 1973-yilda Qilichboy ovulida tugʻildi va shu ovulda voyaga yetdi.

Oʻrta maktabdan soʻng, 1995-yilda Nukus davlat pedagogika institutining filologiya fakultetini tugatib, Feruz Kamolov bilan oila qurdi. Ziyoli oilada barkamol farzandlar tugʻilib voyaga yetadi. Oilaning toʻngʻich qizi Layloxon ham onasining kasbini tanladi. Ikkinchi farzand Zilolaxon esa Nukus davlat pedagogika institutining chet tillari fakulteti talabasi, uchinchi farzand Dinoraxon esa Toshkent tibbiyot akademiyasi Urganch filialida tahsil oladi. Uch nafar qizdan keyin tugʻilgan kenjatoy oʻgʻil Behruzbek esa 83-sonli maktabda 7-sinf oʻquvchisi. U ham opalari singari oliy oʻquv yurti talabasi boʻlib, oʻz kasbining yetuk mutaxassisi boʻlishni niyat qilgan. Ota-ona uchun uchta qizga yaxshi tarbiya berish, ularni oilali, oʻqimishli qilishdan ortiq baxt boʻlmasa kerak.

Erta tongdan to shomgacha tinim bilmaydigan Muqaddas opa 83-sonli maktabda ona tili va adabiyot, qoraqalpoq tili fanlaridan dars beradi. Shu bilan birga repetitorlik faoliyati bilan ham shugʻullanadi. Ayni kunlar taʼtil vaqti boʻlsa ham, oʻz oʻquvchilari bilan mushoira kechalari oʻtkazib, ularning boʻsh vaqtini mazmunli oʻtkazishlariga yordam bermoqda.

Bundan tashqari, Muqaddas opa moʻjazgina qoʻgʻirchoq teatrini tashkil qilgan. Uning oʻz qoʻllari bilan yasagan qoʻgʻirchoqlari yordamida iqtidorli oʻquvchilari maktabgacha taʼlim muassasalarida, oromgohlarda bolalarga sahna koʻrinishlar tayyorlab namoyish qiladilar.

Bu hali hammasi emas. Muqaddas opa yoshlik paytidan toʻqish bilan ham shugʻullanib keladi. Uni mashhur toʻquvchilardan biri deb bemalol ayta olamiz. Koʻplab shogirdlar yetishtirib, ularga ham toʻqishning sir-asrorlarini puxta oʻrgatib kelmoqda. Uning toʻqigan kiyimlari, bejirimliligi, sifati bilan ichki bozorlarimizda ancha xaridorgir. Oʻzining asosiy kasbidan tashqari toʻqish bilan shugʻullanib, oilasiga qoʻshimcha daromad olib kirayotgan oddiy qishloq ayoli kitob oʻqishdan, oʻz bilimi va tajribasini oshirishdan ham aslo charchamaydi. Muqaddas opaning shaxsiy kutubxonasida 2000 dan ziyod turli badiiy va ilmiy adabiyotlar jamlanmasi mavjud.

Oʻzining pedagoglik faoliyatini sidqidildan bajarib, oʻquvchilarning nafaqat bilimini balki dunyoqarashini oʻstirishga, ulaga hunar oʻrgatib, isteʼdodlarini yuzaga chiqarishga yordam berayotgan qahramonimiz ayollik, onalik vazifasini ham bekam-u koʻst bajarib kelmoqda.

U ertalabki soat 5 dan to tungacha tinim bilmaydi. Shogirdalari bilan shugʻullanib boʻlgach, non yopadi, tomorqasining ishlari bilan shugʻullanadi, sigir sogʻadi. Turmush oʻrtogʻi bilan birgalikda barpo qilgan moʻjazgina bogʻda yoz va kuz faslining sarhil mevalarini terib, qishga ozuqa gʻamlaydi, tinib-tinchimas oddiy qishloq ayolining har bir kuni shunday oʻtadi.

U oʻzini dunyodagi eng baxtli inson deb biladi. Mehnatdan qoʻllari aslo charchamaydi. Mehnat qilib hech kim kam boʻlmasligini, oʻz mehnating bilan topgan non dunyodagi eng shirin non ekanligini biladi.

Darhaqiqat, Muqaddas opa singari koʻplab qishloq ayollari hayot tashvishlariga oʻralashib qolmasdan, yurt rivoji va xalq farovonligi yoʻlida mehnat qilmoqda. Ularning koʻngli qishloqning kengliklari kabi keng. Ushbu ayollar boriga qanoat qilib, yoʻgʻini yashirib, borini oshirib yashayotgan ayollardan. Qishloqda shahardagi kabi sharoitlar boʻlmasa-da, ular aslo nolimaydilar. Oʻtayotgan har bir daqiqasidan unumli foydalanib boshqalarga oʻrnak boʻlgulik darajada hayot kechirmoqdalar.

Fotima Eshimbetova.