ЁЛҒИЗ ВА ЎЗГАЛАР ҚАРАМОҒИГА МУҲТОЖ КЕКСАЛАР – ДАВЛАТ ЭЪТИБОРИДА
Ўзгалар қаровига муҳтож, ёлғиз кексалар, ногиронлиги бор кишиларни моддий ва маънавий жиҳатдан қўллаб-қувватлаш халқимизга хос азалий қадриятлардан саналади. Мамлакатимизда сўнгги йилларда инсон қадри учун катта ишлар амалга оширилиб, якка-ёлғиз ва парваришга муҳтож қарияларни давлат ҳимояси ва қарамоғига олиш бўйича қатор ҳукумат қарорлари ва Президент Фармонлари қабул қилинди. Амударё туманидаги Тиббий-ижтимоий хизматларни ривожлантириш бўлими томонидан мазкур ҳужжатлар асосида фаолият олиб, азалий қадриятларимизга амал қилган ҳолда тумандаги ёлғиз қарияларга ғамхўрлик кўрсатиб келишмоқда.
Бўлим ходимлари фаолияти давомида кўплаб савобли ишлар қилиш билан бирга ижтимоий оғир шароитга тушиб қолган ногиронларга, шунингдек, кекса ётоқда қолган отахон ва онахонларга тегишли хизматларни кўрсатишмоқда. Айтиш жоизки, Амударё туманида Вазирлар Маҳкамасининг 2015 йил 10 августдаги “Кексалар ва ногиронларни манзилли ижтимоий ҳимоя қилиш ва қўллаб-қувватлашни янада кучайтириш чора-тадбирлари тўғрисида”ги қарори ва туман ҳокимлигининг тегишли қарорига кўра 127 нафар ўзгалар парваришига муҳтож бўлган ҳамда ёлғиз яшайдиган кексалар, ногиронлиги бўлган шахслар, ёшга доир пенсионерлар рўйхатга олинган. Ушбу қарияларга тумандаги Тиббий-ижтимоий хизматларни ривожлантириш бўлимининг 18 нафар ходимлари ижтимоий хизмат кўрсатиб, реабилитация воситалари ва протез-ортопедия буюмлари билан давлатдан ва ҳомийлар ҳисобидан таъминлашмоқда.
Президентимизнинг 2022 йил 8 июндаги “Иккинчи жаҳон уруши қатнашчилари ва фахрийларининг моддий таъминотини яхшилаш ҳамда ёлғиз кексалар ва ногиронлиги бўлган шахсларни қўллаб-қувватлаш тизимини янада такомиллаштириш тўғрисида”ги Қарорига асосан рўйхатга олинган 40 нафар ўзгалар парваришига муҳтож бўлган ёлғиз кексалар ва ногиронлиги бўлган шахсларга эса бепул етказиб бериладиган озиқ-овқат маҳсулотлари ҳамда гигиена товарлари ўрнига ҳар ойда базавий ҳисоблаш миқдорининг бир баравари миқдорида қўшимча тўлов ҳам тўлаб борилмоқда.
Ундан ташқари, жорий йилда Вазирлар Маҳкамасининг 2021 йилдаги “Муҳтож шахсларни протез-ортопедия мосламалари ва реабилитация қилишнинг техник воситалари билан таъминлаш тартиби тўғрисида”ги тегишли қарорига асосан муҳтож ногирон ва ёшга доир пенсионерларнинг реабилитация техник воситаларга муҳтожлиги тўғрисидаги тиббий хулосаларга асосланиб, рўйхат шакллантирилган эди. Ушбу рўйхатга кўра, 218 нафар фуқаро реабилитация техник воситалари ва кресло-аравача билан таъминланди. Улардан 15 нафарига электр юритмали кресло-аравача, 44 нафарига катталар учун ногиронлар аравачаси, 14 нафар болага болалар учун ногиронлар аравачаси, 33 нафар фуқарога эшитиш мосламаси, 21 нафар фуқарога қўлтиқ таёқ, 86 нафар фуқарога ҳасса таёқ, 3 нафарига тирсакли таёқ, 3 нафарига ходунок, 6 нафарига кўзи ожизлар ҳассаси, 2 нафарига нажас қабул қилгич каби воситалар берилди.
Шунингдек, Ўзбекистон Республикаси Адлия вазирлигининг 2015 йил 25 мартдаги “Ногиронлар ва кексаларни бепул санатория-курорт йўлланмалари билан таъминлаш тартиби тўғрисида”ги йўриқномасига асосан вазирлик тизимидаги санаторийларда саломатликларини тиклаб олишлари учун 286 нафар ногирон ва ёшга доир пенсионерларга бепул йўлланмалар берилди. Туманимиздан 7 нафар ногиронлар васийлари томонидан берилган аризаларга кўра Вазирлар Маҳкамасининг 2021 йилдаги тегишли қарорига асосан Ўзбекистон Республикаси Камбағалликни қисқартиш ва бандлик вазирлигида ташкил этилган “Мурувват” интернат уйларига жойлаштирилди.
Кексалар, ногиронлар ва аҳолининг бошқа эҳтиёжманд қатламларига меҳр-оқибат, хайр-саховат кўрсатиш халқимизга хос фазилатдир. Меҳр-мурувватга, ғамхўрликка муҳтож бундай фуқароларнинг саломатликларини тиклаш, бепул дори-дармон, протез-ортопедия буюмлари билан таъминлаш, шароитларини яхшилаш кабилар давлатимизнинг ҳам доимий эътиборида. Президентимизнинг алоҳида ғамхўрликлари, инсонпарварлик билан йўғрилган сиёсатлари натижасида меҳр ва эътибордан баҳраманд бўлаётган кексалар ҳам кўрсатилаётган беминнат кўмакдан жуда мамнун.
Ҳ.Норбоев, туман Тиббий-ижтимоий хизматларни ривожлантириш бўлими бош мутахассиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
