YoLGʻIZ VA OʻZGALAR QARAMOGʻIGA MUHTOJ KEKSALAR – DAVLAT EʼTIBORIDA

Oʻzgalar qaroviga muhtoj, yolgʻiz keksalar, nogironligi bor kishilarni moddiy va maʼnaviy jihatdan qoʻllab-quvvatlash xalqimizga xos azaliy qadriyatlardan sanaladi. Mamlakatimizda soʻnggi yillarda inson qadri uchun katta ishlar amalga oshirilib, yakka-yolgʻiz va parvarishga muhtoj qariyalarni davlat himoyasi va qaramogʻiga olish boʻyicha qator hukumat qarorlari va Prezident Farmonlari qabul qilindi. Amudaryo tumanidagi Tibbiy-ijtimoiy xizmatlarni rivojlantirish boʻlimi tomonidan mazkur hujjatlar asosida faoliyat olib, azaliy qadriyatlarimizga amal qilgan holda tumandagi yolgʻiz qariyalarga gʻamxoʻrlik koʻrsatib kelishmoqda.

Boʻlim xodimlari faoliyati davomida koʻplab savobli ishlar qilish bilan birga ijtimoiy ogʻir sharoitga tushib qolgan nogironlarga, shuningdek, keksa yotoqda qolgan otaxon va onaxonlarga tegishli xizmatlarni koʻrsatishmoqda. Aytish joizki, Amudaryo tumanida Vazirlar Mahkamasining 2015-yil 10-avgustdagi “Keksalar va nogironlarni manzilli ijtimoiy himoya qilish va qoʻllab-quvvatlashni yanada kuchaytirish chora-tadbirlari toʻgʻrisida”gi qarori va tuman hokimligining tegishli qaroriga koʻra 127 nafar oʻzgalar parvarishiga muhtoj boʻlgan hamda yolgʻiz yashaydigan keksalar, nogironligi boʻlgan shaxslar, yoshga doir pensionerlar roʻyxatga olingan. Ushbu qariyalarga tumandagi Tibbiy-ijtimoiy xizmatlarni rivojlantirish boʻlimining 18 nafar xodimlari ijtimoiy xizmat koʻrsatib, reabilitatsiya vositalari va protez-ortopediya buyumlari bilan davlatdan va homiylar hisobidan taʼminlashmoqda.

Prezidentimizning 2022-yil 8-iyundagi “Ikkinchi jahon urushi qatnashchilari va faxriylarining moddiy taʼminotini yaxshilash hamda yolgʻiz keksalar va nogironligi boʻlgan shaxslarni qoʻllab-quvvatlash tizimini yanada takomillashtirish toʻgʻrisida”gi Qaroriga asosan roʻyxatga olingan 40 nafar oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarga esa bepul yetkazib beriladigan oziq-ovqat mahsulotlari hamda gigiyena tovarlari oʻrniga har oyda bazaviy hisoblash miqdorining bir baravari miqdorida qoʻshimcha toʻlov ham toʻlab borilmoqda.

Undan tashqari, joriy yilda Vazirlar Mahkamasining 2021-yildagi “Muhtoj shaxslarni protez-ortopediya moslamalari va reabilitatsiya qilishning texnik vositalari bilan taʼminlash tartibi toʻgʻrisida”gi tegishli qaroriga asosan muhtoj nogiron va yoshga doir pensionerlarning reabilitatsiya texnik vositalarga muhtojligi toʻgʻrisidagi tibbiy xulosalarga asoslanib, roʻyxat shakllantirilgan edi. Ushbu roʻyxatga koʻra, 218 nafar fuqaro reabilitatsiya texnik vositalari va kreslo-aravacha bilan taʼminlandi. Ulardan 15 nafariga elektr yuritmali kreslo-aravacha, 44 nafariga kattalar uchun nogironlar aravachasi, 14 nafar bolaga bolalar uchun nogironlar aravachasi, 33 nafar fuqaroga eshitish moslamasi, 21 nafar fuqaroga qoʻltiq tayoq, 86 nafar fuqaroga hassa tayoq, 3 nafariga tirsakli tayoq, 3 nafariga xodunok, 6 nafariga koʻzi ojizlar hassasi, 2 nafariga najas qabul qilgich kabi vositalar berildi.

Shuningdek, Oʻzbekiston Respublikasi Adliya vazirligining 2015-yil 25-martdagi “Nogironlar va keksalarni bepul sanatoriya-kurort yoʻllanmalari bilan taʼminlash tartibi toʻgʻrisida”gi yoʻriqnomasiga asosan vazirlik tizimidagi sanatoriylarda salomatliklarini tiklab olishlari uchun 286 nafar nogiron va yoshga doir pensionerlarga bepul yoʻllanmalar berildi. Tumanimizdan 7 nafar nogironlar vasiylari tomonidan berilgan arizalarga koʻra Vazirlar Mahkamasining 2021-yildagi tegishli qaroriga asosan Oʻzbekiston Respublikasi Kambagʻallikni qisqartish va bandlik vazirligida tashkil etilgan “Muruvvat” internat uylariga joylashtirildi.

Keksalar, nogironlar va aholining boshqa ehtiyojmand qatlamlariga mehr-oqibat, xayr-saxovat koʻrsatish xalqimizga xos fazilatdir. Mehr-muruvvatga, gʻamxoʻrlikka muhtoj bunday fuqarolarning salomatliklarini tiklash, bepul dori-darmon, protez-ortopediya buyumlari bilan taʼminlash, sharoitlarini yaxshilash kabilar davlatimizning ham doimiy eʼtiborida. Prezidentimizning alohida gʻamxoʻrliklari, insonparvarlik bilan yoʻgʻrilgan siyosatlari natijasida mehr va eʼtibordan bahramand boʻlayotgan keksalar ham koʻrsatilayotgan beminnat koʻmakdan juda mamnun.

H.Norboyev, tuman Tibbiy-ijtimoiy xizmatlarni rivojlantirish boʻlimi bosh mutaxassisi.