ЁШ АВЛОД КАМОЛИДА МАҲАЛЛАНИНГ ЎРНИ УЛКАН

Мамлакатимизда баркамол авлодни вояга етказиш, ёшларни маънавий-ахлоқий ва жисмонан соғлом этиб тарбиялаш, уларни барча соҳаларда олиб борилаётган ислоҳотларнинг фаол иштирокчисига айлантиришга доир кенг кўламли чора-тадбирлар амалга оширилмоқда. Жумладан, ёшларнинг замонавий илм-фанни чуқур эгаллашига, салоҳиятини ривожлантиришига барча шароитлар яратилган. Уларнинг бандлигини таъминлаш ва тадбиркорлик фаолиятига кенг жалб қилишга эътибор қаратилиб, доимий мулоқот қилиш орқали ҳаётидаги муаммоларини аниқлаш ва ҳал этиш давлат органлари, жамоат ташкилотларининг долзарб вазифасига айланаётир.

Айниқса ўсмир-ёшлар кўнглида миллий ва умуминсоний қадриятларга содиқлик, экстремизм, терроризм каби бузғунчи ғояларга нисбатан муросасизликни шакллантиришга, ёт ғояларга нисбатан мафкуравий иммунитетни тарбиялашга эътибор қаратилаётир.

Бунингдек долзарб вазифалар ижросига ҳисса қўшиш мақсадида Амударё телевидениеси таҳририяти Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат Фонди таъсис этган “Ёшларнинг маънавий руҳий ва интеллектуал салоҳиятини ошириш” мавзусидаги танловида “Юксак маънавиятли ва ахлоқли ёшлар – келажак пойдевори” номли лойиҳаси билан қатнашиб, ғолиб бўлди ҳамда муваффақиятли амалга ошириб келмоқда.

Яқинда ушбу грант лойиҳаси режасига кўра Манғит шаҳридаги маҳаллаларда “Бир болага етти маҳалла ҳам ота, ҳам она” шиори остида ёш авлодни ҳар томонлама етук, маънавиятли инсонлар қилиб вояга етказиш, уларни ёт ғоялардан ҳимоя қилиш борасида олиб борилаётган ишлар кўздан кечирилди.

Маҳалла фуқаролар йиғини биносида бўлиб ўтган ёшлар тарбиясига бағишланган тадбирда маҳаллада яшовчи пир-у бадавлат отахонлар, онахонлар, ибратли оилалар соҳиблари, ёш оилалар вакиллари иштирок этдилар.

Тадбирни маҳалла фуқаролар йиғини раиси Муротбой Ҳайбуллаев очди. Шунингдек, грант лойиҳаси ижрочиларидан бири Ойгул Ражабова ёшларни ҳар жиҳатдан баркамол қилиб вояга етказишда маҳаллаларнинг, ибратли оилалар вакилларининг ижобий таъсири ҳақида, халқимиз турмуш тарзидан мустаҳкам ўрин олган миллий қадриятларимиз, анъаналаримизнинг тутган роли ҳақида маъруза қилди.

Айтиш жоизки, ушбу ҳудудда Болалар спорт мактаби, “Баркамол авлод” болалар мактаби, 9-сонли Болалар мусиқа ва санъат мактаби, нодавлат ўқув марказлари мавжуд 9та умумий ўрта таълим мактабларида таълим олаётган ўқувчиларнинг интеллектуал салоҳиятини ўстиришга, қобилиятини тарбиялашга хизмат қилмоқда.

Шунингдек, маҳаллаларда фаолият юритаётган ёшлар етакчилари ўсмир-ёшларнинг бўш вақтларини мақсадли ўтказишига, уларнинг касб-корли, илмли бўлиб вояга етишига, турли танловлар, мусобақалар ўтказиб, иқтидорини юксалтиришга ҳаракат қилаётир. Нуроний отахонлар, онахонлар билан учрашувлари ўтказилиб ёшлар тарбиясида уларнинг ҳаётий тажрибаларидан унумли фойдаланилмоқда.

Тадбирда сўзга чиққан меҳнат фахрийси, ҳожи она Малика Давлетова, Гулбаҳор Худойберганова, маҳалла хотин-қизлар фаоли Маҳфуза Ибрагимова, профилактика инспектори Салоҳиддин Пардакуловлар кун тартибидаги мавзу юзасидан ўз фикр-мулоҳазаларини билдирдилар.

Улар ёш авлод камолида нуроний отахон ва онахонлар ўгитларининг ўрни улкан эканлигини алоҳида таъкидладилар ва барчани ёшлар тарбиясига муносиб ҳисса қўшишга даъват этдилар.

Севара ИСМОИЛОВА.