YoSh AVLOD KAMOLIDA MAHALLANING OʻRNI ULKAN

Mamlakatimizda barkamol avlodni voyaga yetkazish, yoshlarni maʼnaviy-axloqiy va jismonan sogʻlom etib tarbiyalash, ularni barcha sohalarda olib borilayotgan islohotlarning faol ishtirokchisiga aylantirishga doir keng koʻlamli chora-tadbirlar amalga oshirilmoqda. Jumladan, yoshlarning zamonaviy ilm-fanni chuqur egallashiga, salohiyatini rivojlantirishiga barcha sharoitlar yaratilgan. Ularning bandligini taʼminlash va tadbirkorlik faoliyatiga keng jalb qilishga eʼtibor qaratilib, doimiy muloqot qilish orqali hayotidagi muammolarini aniqlash va hal etish davlat organlari, jamoat tashkilotlarining dolzarb vazifasiga aylanayotir.

Ayniqsa oʻsmir-yoshlar koʻnglida milliy va umuminsoniy qadriyatlarga sodiqlik, ekstremizm, terrorizm kabi buzgʻunchi gʻoyalarga nisbatan murosasizlikni shakllantirishga, yot gʻoyalarga nisbatan mafkuraviy immunitetni tarbiyalashga eʼtibor qaratilayotir.

Buningdek dolzarb vazifalar ijrosiga hissa qoʻshish maqsadida Amudaryo televideniyesi tahririyati Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat Fondi taʼsis etgan “Yoshlarning maʼnaviy ruhiy va intellektual salohiyatini oshirish” mavzusidagi tanlovida “Yuksak maʼnaviyatli va axloqli yoshlar – kelajak poydevori” nomli loyihasi bilan qatnashib, gʻolib boʻldi hamda muvaffaqiyatli amalga oshirib kelmoqda.

Yaqinda ushbu grant loyihasi rejasiga koʻra Mangʻit shahridagi mahallalarda “Bir bolaga yetti mahalla ham ota, ham ona” shiori ostida yosh avlodni har tomonlama yetuk, maʼnaviyatli insonlar qilib voyaga yetkazish, ularni yot gʻoyalardan himoya qilish borasida olib borilayotgan ishlar koʻzdan kechirildi.

Mahalla fuqarolar yigʻini binosida boʻlib oʻtgan yoshlar tarbiyasiga bagʻishlangan tadbirda mahallada yashovchi pir-u badavlat otaxonlar, onaxonlar, ibratli oilalar sohiblari, yosh oilalar vakillari ishtirok etdilar.

Tadbirni mahalla fuqarolar yigʻini raisi Murotboy Haybullayev ochdi. Shuningdek, grant loyihasi ijrochilaridan biri Oygul Rajabova yoshlarni har jihatdan barkamol qilib voyaga yetkazishda mahallalarning, ibratli oilalar vakillarining ijobiy taʼsiri haqida, xalqimiz turmush tarzidan mustahkam oʻrin olgan milliy qadriyatlarimiz, anʼanalarimizning tutgan roli haqida maʼruza qildi.

Aytish joizki, ushbu hududda Bolalar sport maktabi, “Barkamol avlod” bolalar maktabi, 9-sonli Bolalar musiqa va sanʼat maktabi, nodavlat oʻquv markazlari mavjud 9ta umumiy oʻrta taʼlim maktablarida taʼlim olayotgan oʻquvchilarning intellektual salohiyatini oʻstirishga, qobiliyatini tarbiyalashga xizmat qilmoqda.

Shuningdek, mahallalarda faoliyat yuritayotgan yoshlar yetakchilari oʻsmir-yoshlarning boʻsh vaqtlarini maqsadli oʻtkazishiga, ularning kasb-korli, ilmli boʻlib voyaga yetishiga, turli tanlovlar, musobaqalar oʻtkazib, iqtidorini yuksaltirishga harakat qilayotir. Nuroniy otaxonlar, onaxonlar bilan uchrashuvlari oʻtkazilib yoshlar tarbiyasida ularning hayotiy tajribalaridan unumli foydalanilmoqda.

Tadbirda soʻzga chiqqan mehnat faxriysi, hoji ona Malika Davletova, Gulbahor Xudoyberganova, mahalla xotin-qizlar faoli Mahfuza Ibragimova, profilaktika inspektori Salohiddin Pardakulovlar kun tartibidagi mavzu yuzasidan oʻz fikr-mulohazalarini bildirdilar.

Ular yosh avlod kamolida nuroniy otaxon va onaxonlar oʻgitlarining oʻrni ulkan ekanligini alohida taʼkidladilar va barchani yoshlar tarbiyasiga munosib hissa qoʻshishga daʼvat etdilar.

Sevara ISMOILOVA.