ЭЛЛИК ЙИЛДАН КEЙИНГИ ДИЙДОР
Жорий йилнинг 29 сентябрь куни Амударё туманидаги 3-сонли умумий ўрта мактабни 1973 йилда тугатган собиқ битирувчиларнинг 50 йиллик юбилей учрашуви бўлиб ўтди. Ушбу даргоҳни эллик йил муқаддам тамомлаган собиқ ўқувчилар дийдорлашуви мактаб биносида ташкил этилди.
Учрашувга Республикамизда фан, таълим, ҳарбий соҳада, хусусий тадбиркорликда, педагогика соҳасида фаол меҳнат қилиб келаётган 28 нафар битирувчилар ташриф буюришди. Мактабнинг собиқ ўқувчилари нафақат туманимизда, балки Республикамизда ҳам ўзларининг фаол хизматлари, улкан тажрибалари билан танилган етук мутахассислар бўлиб, Ватанимиз равнақи учун ҳисса қўшаётган, ҳозирги кунда ўзининг бой амалий тажрибаси билан ўсиб келаётган ёш авлодга ўрнак бўлаётган азиз инсонлардир. Учрашувда уларнинг устоз-мураббийлари – кимё-биология фани ўқитувчиси Инжигул Ўтемурадова, математика фани ўқитувчиси Узоқберган Хўжамберганов, физика фани ўқитувчиси Сарсенбой Тажимурадов, мусиқа фани ўқитувчиси Зулфия Алламберганова, рус тили ўқитувчиси Жумат Баймановлар ҳам қатнашдилар.
Синфдошлар томонидан ташкил этилган узоқ йиллик учрашув байрам тантаналарига айланиб кетди. Тадбирнинг ташкилий қисми мактаб биносида ўтказилди.
Тадбирда собиқ устозлар, фахрий ўқитувчилар сўзга чиқиб, собиқ ўқувчиларни мактабни битказганига 50 йил тўлиши муносабати билан ўтказилаётган учрашув билан муборакбод этдилар. Уларга мактаб ҳаёти, ўқувчилик йилларига доир қизиқарли маълумотлар, ҳаётнинг тотли онлари хусусида илиқ фикрларини баён этдилар. Синфдошлар ҳам олтин ёшликнинг унутилмас лаҳзалари, устозларга бўлган меҳр-муҳаббати ҳамда дўстлари билан боғлиқ соғинч ҳислари ҳақида дил изҳорларини баён қилдилар.
Меҳмонлар замонавий жиҳозланган хоналарда таълим олаётган бугунги кун ўқувчисига ҳавас билан қарашар экан, бугун юртимизда илм-фан ва технологияларнинг жадал ўсиши, ёшларга кенг имкониятлар яратилиб, уларнинг истеъдоди ва қобилятларини тўлиқ амалга оширишга алоҳида эътибор қаратилаётганини алоҳида таъкидлаб ўтдилар.
Синфдошлар мактаб парталарида ўтирар экан, ўқувчилик даврида кечган қизиқарли воқеалар, ажойиб саргузаштларни мароқ билан эслашди. Учрашувга келган меҳмонларга мактабнинг ҳозирги ҳаёти, ўқувчилар ва ўқитувчилар жамоасининг илм-фандаги ютуқлари ҳақида маълумотлар берилди.
Бундан 50 йил олдин мактабни тугатган собиқ ўқувчилар таълим маскани олдида эсдалик фотосуратларига тушдилар ва устозларга таъзим бажо келтириб, мактаб раҳбариятига, устоз-мураббийларига улкан зафарлар ва муваффақиятлар тиладилар.
Синфдошлар ўртасидаги дўстлик туйғуси инсонни маънавий қўллаб-қувватловчи, унинг оғирини енгил қилувчи, руҳиятини кўтарувчи, ўзига ишонч орттирувчи куч ҳисобланади. Инсонда дўстлик, биродарлик, ўзаро ишонч туйғулари дарҳол юзага келиб, ўз-ўзидан мустаҳкамланиб қолмайди, балки йиллар давомида шаклланиб боради.
Ана шундай мустаҳкам дўстлик ришталари билан бир-бирига жипс боғланган, орадан 50 йил ўтсада болалик, ўсмирлик ва ёшлик дамларини қўмсаб, учрашувга келган синфдошлар дийдори бир пиёла чой устида давом этди.
Синфдошлар учун ёзилган дастурхон атрофида дўстона суҳбат ва ўйин-кулгу узоқ вақт давом этди. Синфдошларнинг соғинчли дийдорлашуви узоқ йиллар хотирада муҳрланиб қоладиган даражада юқори савияда ўтди.
Севара ИСМОИЛОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
