Ёшлар иштирокида сайёр қабул ўтказилди
Инсон манфаати – олий қадрият. Мамлакатимизда амалга оширилаётган ислоҳотлар асосида айни мақсад устувор ўринга қўйилаётгани жойлардаги ўзгаришларда яққол сезилмоқда. Бинобарин, одамларни рози қилиш, уларнинг ҳуқуқ ва манфаатлари ҳимояси йўлидаги саъй-ҳаракатлар амалий натижасини бермоқда. Айниқса, ёшлар муаммоларини ечишнинг янги, самарали тизимини яратишни мақсад қилган оммавий сайёр қабуллар ёшлар ҳаётида муҳим ўрин тутмоқда.
Инсонга эътибор ва сифатли таълим йилида эртамиз эгаларининг орзу-интилишларини рағбатлантириш, уларни ижтимоий муҳофаза қилиш, бандлигини таъминлаш, ёш ўғил-қизларни тадбиркорлик фаолиятига кенг жалб этишга устувор вазифа сифатида қаралмоқда.
2023 йил 22 ноябрь куни Амударё тумани ҳокимлиги мажлислар залида Ёшлар ишлари агентлиги Қорақалпоғистон Республикаси бошқармаси бошлиғи Пўлат Мақсетбоев ҳамда агентликнинг туман бўлими раиси Сардор Исмоиловлар иштирокида ўтказилган ёшларнинг сайёр қабулида ҳам айни шу муҳим масалаларга эътибор қаратилди.
Тадбир аввалида сўзга чиққан масъуллар бугунги кунда ёшлар учун яратилаётган имкониятлар ва шарт-шароитлар ҳақида батафсил маълумот бериб, ёшларни билим олишга ва касб-ҳунар эгаллашга даъват қилди.
Дарҳақиқат, юртимизда халқ билан фаол ва очиқ мулоқот олиб бориш, аввало инсоннинг ҳуқуқ ҳамда манфаатларини таъминлаш орқали халқимизнинг фаровон, бахтли ҳаёт кечириши учун кўплаб саъй-ҳаракатлар амалга оширилмоқда. Жумладан, туманимиз бўйлаб ўтказилаётган сайёр қабуллар жараёнида ҳам ёрдамга муҳтож аҳолининг муаммолари ўрганилиб, кўплаб ижобий натижаларга эришилмоқда.
Сайёр қабул тарзида ўтказилган мазкур учрашувдан кўзланган мақсад ёшларнинг муаммоларини ўрганиш, ижобий ҳал этилишига кўмаклашиш, таклиф ҳамда тавсияларини тинглашдан иборат бўлди. Сайёр қабулда туманимизнинг турли ҳудудларидаги маҳаллалардан ташриф буюрган жами 12 нафар ёшларнинг мурожаатлари тингланди.
Тегишли масъуллар иштирокида ўтказилган сайёр қабулда 4 нафар ёшларнинг олий ўқув юртлари шартнома тўловларини тўлашда амалий ёрдам бўйича, 1 нафарининг ишсизлик, “Ёшлар дафтари”га киритиш бўйича, 3 нафарининг даволаниш харажатларини қоплаб бериш бўйича, 1 нафар юртдошимизнинг ҳайдовчилик гувоҳмасига ўқиш харажатларини қоплаб бериш бўйича, 2 нафарининг субсидия асосида асбоб-ускуналар олиш ҳамда яна 1 нафарининг тадбиркорликни бошлаш учун имтиёзли кредит олиш масалаларида мурожаатлари қабул қилинди.
Сайёр қабулда мурожаатларнинг ҳеч бири эътибордан четда қолмаслиги ва ҳар бир мурожаат имкон қадар ижобий ечим топиши таъкидланди.
Амалий натижалари билан аҳамиятли бўлган тадбирда аксарият мурожаатлар жойида ҳал этилди. Ечимига вақт талаб қиладиган муаммолар юзасидан масъул шахсларга топшириқлар берилди. Баъзи мурожаатлар бўйича эса амалдаги қонунчилик доирасида ҳуқуқий тушунтириш ишлари олиб борилди. Мурожаатчиларнинг барча таклифлари ўрганиб чиқиш учун қабул қилинди.
“Халқ давлат идораларига эмас, балки давлат идоралари, катта-кичик раҳбарлар халққа хизмат қилиши керак” тамойили асосида ўтказилаётган бу каби сайёр қабуллар аҳоли муаммолари ҳал бўлишида асосий омил бўлиб хизмат қилаётгани билан аҳамиятлидир.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
