Yoshlar ishtirokida sayyor qabul oʻtkazildi

Inson manfaati – oliy qadriyat. Mamlakatimizda amalga oshirilayotgan islohotlar asosida ayni maqsad ustuvor oʻringa qoʻyilayotgani joylardagi oʻzgarishlarda yaqqol sezilmoqda. Binobarin, odamlarni rozi qilish, ularning huquq va manfaatlari himoyasi yoʻlidagi saʼy-harakatlar amaliy natijasini bermoqda. Ayniqsa, yoshlar muammolarini yechishning yangi, samarali tizimini yaratishni maqsad qilgan ommaviy sayyor qabullar yoshlar hayotida muhim oʻrin tutmoqda.

Insonga eʼtibor  va sifatli taʼlim yilida ertamiz egalarining orzu-intilishlarini ragʻbatlantirish, ularni ijtimoiy muhofaza qilish, bandligini taʼminlash, yosh oʻgʻil-qizlarni tadbirkorlik faoliyatiga keng jalb etishga ustuvor vazifa sifatida qaralmoqda.

2023-yil 22-noyabr kuni Amudaryo tumani hokimligi majlislar zalida Yoshlar ishlari agentligi Qoraqalpogʻiston Respublikasi boshqarmasi boshligʻi Poʻlat Maqsetboyev hamda agentlikning tuman boʻlimi raisi Sardor Ismoilovlar ishtirokida oʻtkazilgan yoshlarning sayyor qabulida ham ayni shu muhim masalalarga eʼtibor qaratildi.

Tadbir avvalida soʻzga chiqqan masʼullar bugungi kunda yoshlar uchun yaratilayotgan imkoniyatlar va shart-sharoitlar haqida batafsil maʼlumot berib, yoshlarni bilim olishga va kasb-hunar egallashga daʼvat qildi.

Darhaqiqat, yurtimizda xalq bilan faol va ochiq muloqot olib borish, avvalo insonning huquq hamda manfaatlarini taʼminlash orqali xalqimizning farovon, baxtli hayot kechirishi uchun koʻplab saʼy-harakatlar amalga oshirilmoqda. Jumladan, tumanimiz boʻylab oʻtkazilayotgan sayyor qabullar jarayonida ham yordamga muhtoj aholining muammolari oʻrganilib, koʻplab ijobiy natijalarga erishilmoqda.

Sayyor qabul tarzida oʻtkazilgan mazkur uchrashuvdan koʻzlangan maqsad yoshlarning muammolarini oʻrganish, ijobiy hal etilishiga koʻmaklashish, taklif hamda tavsiyalarini tinglashdan iborat boʻldi. Sayyor qabulda tumanimizning turli hududlaridagi mahallalardan tashrif buyurgan jami 12 nafar yoshlarning murojaatlari tinglandi.

Tegishli masʼullar ishtirokida oʻtkazilgan sayyor qabulda 4 nafar yoshlarning oliy oʻquv yurtlari shartnoma toʻlovlarini toʻlashda amaliy yordam boʻyicha, 1 nafarining ishsizlik, “Yoshlar daftari”ga kiritish boʻyicha, 3 nafarining davolanish xarajatlarini qoplab berish boʻyicha, 1 nafar yurtdoshimizning haydovchilik guvohmasiga oʻqish xarajatlarini qoplab berish boʻyicha, 2 nafarining subsidiya asosida asbob-uskunalar olish hamda yana 1 nafarining tadbirkorlikni boshlash uchun imtiyozli kredit olish masalalarida murojaatlari qabul qilindi.

Sayyor qabulda murojaatlarning hech biri eʼtibordan chetda qolmasligi va har bir murojaat imkon qadar ijobiy yechim topishi taʼkidlandi.

Amaliy natijalari bilan ahamiyatli boʻlgan tadbirda aksariyat murojaatlar joyida hal etildi. Yechimiga vaqt talab qiladigan muammolar yuzasidan masʼul shaxslarga topshiriqlar berildi. Baʼzi murojaatlar boʻyicha esa amaldagi qonunchilik doirasida huquqiy tushuntirish ishlari olib borildi. Murojaatchilarning barcha takliflari oʻrganib chiqish uchun qabul qilindi.

“Xalq davlat idoralariga emas, balki davlat idoralari, katta-kichik rahbarlar xalqqa xizmat qilishi kerak” tamoyili asosida oʻtkazilayotgan bu kabi sayyor qabullar aholi muammolari hal boʻlishida asosiy omil boʻlib xizmat qilayotgani bilan ahamiyatlidir.

Tuman hokimligi Axborot xizmati