Мутолаа — қалб озуқаси

Мамлакатимизда ёш авлодни баркамол инсонлар қилиб тарбиялаш, улар қалбида Ватанга садоқат, улуғ алломаларимиз меросига, азалий қадриятларга чуқур эҳтиром туйғусини сингдиришга юксак эътибор қаратилмоқда. Зеро, ёшлар — келажагимиз, эртанги кунимизнинг суянчиғи ва таянчидир. Дунёни фақат илм билан забт этиш мумкинлиги бугунги кунда ҳеч кимга сир эмас. Илмни чуқур эгаллашнинг йўли эса битта — китоб мутолааси.

Президентимиз Шавкат Мирзиёев китоб мутолааси ҳақида фикр билдириб, жумладан, шундай деганди: “...ҳаммамиз учун айни пайтда жуда муҳим аҳамиятга эга бўлган масала, яъни китобхонликни кенг ёйиш ва ёшларимизнинг китобга бўлган муҳаббатини, уларнинг маънавий иммунитетини янада оширишга қаратилган ишларимизни янги босқичга олиб чиқиш вазифаси турибди”.

Китоб — билим манбаи. Бу — исбот талаб қилмас ҳақиқат. Зеро, инсон билимни асосан китоб орқали олади, унинг тарбияси ҳам китоб ёрдамида шаклланади. Ёшларнинг дунёқараши кенгаяди, ҳаётга муносабати ўзгаради. 

Китоб — қалб чироғи, тафаккур қаноти. Буюк аждодларимиздан Соҳибқирон Амир Темур бобомиз таъбири билан айтганда, “Китоб барча бунёдкорлик, яратувчилик ва ақл-идрокнинг, илм-у донишмандликнинг асосидир, ҳаётни яратувчи мураббийдир”. Шу маънода, шаклидан қатъий назар, барча китоблар миллий ўзлигимиз ҳамда умуминсоний қадриятларни тарғиб этишга хизмат қилиши айни муддао.

Алишер Навоий ҳазратлари айтадилар: “Китоб — беминнат устоз, билим ва маънавий юксалишга эришишнинг энг асосий манбаи”. Шундай пурмаъно сўзлар хаёлимдан ўтаркан, ҳар сафар  кутубхонага ошиқиб кириб келган ўғил-қизларни кўриб, кўнглим ёришиб кетади. Ҳа, болаларимиз китобга, китобхонлик борасидаги қадим анъаналаримизга қайтмоқда.  Китоб — энг яқин дўст, мутолаа — завқли. Шунинг учун бўлса керак,  яқинда  кутубхонада ташкил этилган янги китоблар тақдимоти илмга интилувчан китобхонлар билан  гавжум бўлди. Бу эса улар қалбида мутолаага бўлган қизиқишни янада кучайтиришга хизмат қилади. Бинобарин, китоб мутолаасига қаратилаётган эътибор миллий ўзлигимиз ва умуминсоний қадриятларни тарғиб этиши билан алоҳида қадрлидир.

Дарҳақиқат, бу маънавий сарчашма фарзандларимизнинг дунёқарашини бойитади, нутқини ўстириб, хотирасини мустаҳкамлайди. Шундай экан, азиз ота-оналар, фарзандларимизнинг  китобга бўлган  меҳрини оширишда уларга кўмакчи бўлайлик. Фарзандларимиз билан биргаликда китоб мутолаа қилайлик. “Китобхонликда таътил бўлмайди”, дейдилар. Бу сўзларни   бугунги кундаги шиоримизга айлантирайлик! Туман Ахборот-кутубхона маркази  китобга ошно қалб эгаларини   кутиб қолади.

Р.Раманова, туман Ахборот-кутубхона маркази  ходими.