Mutolaa — qalb ozuqasi

Mamlakatimizda yosh avlodni barkamol insonlar qilib tarbiyalash, ular qalbida Vatanga sadoqat, ulugʻ allomalarimiz merosiga, azaliy qadriyatlarga chuqur ehtirom tuygʻusini singdirishga yuksak eʼtibor qaratilmoqda. Zero, yoshlar — kelajagimiz, ertangi kunimizning suyanchigʻi va tayanchidir. Dunyoni faqat ilm bilan zabt etish mumkinligi bugungi kunda hech kimga sir emas. Ilmni chuqur egallashning yoʻli esa bitta — kitob mutolaasi.

Prezidentimiz Shavkat Mirziyoyev kitob mutolaasi haqida fikr bildirib, jumladan, shunday degandi: “...hammamiz uchun ayni paytda juda muhim ahamiyatga ega boʻlgan masala, yaʼni kitobxonlikni keng yoyish va yoshlarimizning kitobga boʻlgan muhabbatini, ularning maʼnaviy immunitetini yanada oshirishga qaratilgan ishlarimizni yangi bosqichga olib chiqish vazifasi turibdi”.

Kitob — bilim manbai. Bu — isbot talab qilmas haqiqat. Zero, inson bilimni asosan kitob orqali oladi, uning tarbiyasi ham kitob yordamida shakllanadi. Yoshlarning dunyoqarashi kengayadi, hayotga munosabati oʻzgaradi. 

Kitob — qalb chirogʻi, tafakkur qanoti. Buyuk ajdodlarimizdan Sohibqiron Amir Temur bobomiz taʼbiri bilan aytganda, “Kitob barcha bunyodkorlik, yaratuvchilik va aql-idrokning, ilm-u donishmandlikning asosidir, hayotni yaratuvchi murabbiydir”. Shu maʼnoda, shaklidan qatʼiy nazar, barcha kitoblar milliy oʻzligimiz hamda umuminsoniy qadriyatlarni targʻib etishga xizmat qilishi ayni muddao.

Alisher Navoiy hazratlari aytadilar: “Kitob — beminnat ustoz, bilim va maʼnaviy yuksalishga erishishning eng asosiy manbai”. Shunday purmaʼno soʻzlar xayolimdan oʻtarkan, har safar  kutubxonaga oshiqib kirib kelgan oʻgʻil-qizlarni koʻrib, koʻnglim yorishib ketadi. Ha, bolalarimiz kitobga, kitobxonlik borasidagi qadim anʼanalarimizga qaytmoqda.  Kitob — eng yaqin doʻst, mutolaa — zavqli. Shuning uchun boʻlsa kerak,  yaqinda  kutubxonada tashkil etilgan yangi kitoblar taqdimoti ilmga intiluvchan kitobxonlar bilan  gavjum boʻldi. Bu esa ular qalbida mutolaaga boʻlgan qiziqishni yanada kuchaytirishga xizmat qiladi. Binobarin, kitob mutolaasiga qaratilayotgan eʼtibor milliy oʻzligimiz va umuminsoniy qadriyatlarni targʻib etishi bilan alohida qadrlidir.

Darhaqiqat, bu maʼnaviy sarchashma farzandlarimizning dunyoqarashini boyitadi, nutqini oʻstirib, xotirasini mustahkamlaydi. Shunday ekan, aziz ota-onalar, farzandlarimizning  kitobga boʻlgan  mehrini oshirishda ularga koʻmakchi boʻlaylik. Farzandlarimiz bilan birgalikda kitob mutolaa qilaylik. “Kitobxonlikda taʼtil boʻlmaydi”, deydilar. Bu soʻzlarni   bugungi kundagi shiorimizga aylantiraylik! Tuman Axborot-kutubxona markazi  kitobga oshno qalb egalarini   kutib qoladi.

R.Ramanova, tuman Axborot-kutubxona markazi  xodimi.