Тўлқин овулида ҳоким ва ёшлар учрашуви ўтказилди

Мамлакатнинг қудратини белгилайдиган омиллар кўп. Бироқ, уларнинг энг асосийларидан бири шу юртда вояга етаётган юксак маънавиятли, жисмонан соғлом, ҳар томонлама баркамол авлоддир. Ёшларнинг ҳуқуқ ва манфаатларини ҳимоя қилиш, ташаббусларини қўллаб-қувватлаш, муаммоларининг ҳал этилишига ёрдам бериш шунинг учун ҳам бугунги куннинг долзарб вазифасидир.

Шу сабабли Амударё туманида ҳам ёшлар иштирокида мунтазам равишда кўплаб учрашувлар, давра суҳбатлари, сайёр қабуллар ўтказиб келинмоқда.

4 декабрь куни туманнинг Тўлқин овул фуқаролар йиғини маъмурий биносида туман ҳокимининг ёшлар билан учрашуви бўлиб ўтди.

Учрашувда туман ҳокими Собир Хўжаметов, Ёшлар ишлари агентлиги туман бўлими бошлиғи Сардор Исмоилов, овул фуқаролар йиғинининг масъул ходимлари ҳамда овул ёшлари иштирок этдилар.

Мамлакатимизда ёшларга бўлган эътибор, ўсиб келаётган баркамол авлодга бўлган ғамхўрлик давлат сиёсати даражасига кўтарилгани билан ҳам аҳамиятлидир. Зеро ёшлар ватан келажаги, эртанги куннинг бунёдкорларидирлар. Шу боисдан ҳам уларнинг ҳаётидаги муаммоларини ўрганиш, ҳал этиш, интилишларини қўллаб-қувватлаш кечиктириб бўлмайдиган вазифалардан ҳисобланади.

Учрашув давомида ёшлар томонидан турли хил йўналишларда 22та мурожаат йўлланди. Жойида ҳал қилиш имкони бўлган мурожаатлар, таклиф ва ташаббуслар юзасидан ёшларнинг талаблари қаноатлантирилди. Атрофлича ўрганишни тақозо этадиган долзарб масалаларни ҳал этиш юзасидан эса Ёшлар ишлари агентлиги туман бўлими ҳамда алоқадор муассаса-ташкилотлар раҳбарларига муддатлар белгиланиб, топшириқлар берилди. Мурожаатлар билан бир қаторда учрашувда иштирок этган ёшлар туман ҳокимига ўз таклифларини ҳам беришди.

Мурожаатларнинг аксарияти ўқиш учун контракт пулларини қоплаб бериш, субсидия асосида меҳнат қуроллари олиш, тадбиркорлик қилиш учун имтиёзли кредитлар олиш ҳамда деҳқончилик қилиш учун ер майдонлари ажратиш бўйича бўлди.

Шунингдек, Исмоил Ўразбоев кўчма савдо майдонини аукционга чиқариб бериш, Шерзод Ражапов ҳамда Жўрабек Собировлар сафарбарлик чақируви резерви харажатларини қоплаб бериш, Мусо Йўлдошев эса ҳайдовчилик гувоҳномасига ўқиш ҳаражатларини қоплаб беришда амалий ёрдам сўради.

Учрашувда ташаббускор ва фаол ёшлар ўзларининг келажак режалари, уларни қийнаётган муаммолар ҳақида очиқ-ойдин гапирди. Туманда ёш тадбиркорларни қўллаб-қувватлаш, айниқса, уюшмаган ёшлар билан ишлаш тизимини ишлаб чиқиш бўйича атрофлича фикр алмашилди.

Туман ҳокими ёшларга мурожаат қилар экан, давлатимиз раҳбарининг ташаббуси билан кейинги йилларда ёшлар билан ишлаш бўйича мутлақо янги тизим яратилганлиги, ёшлар фаолиятига доир муҳим қарор ва фармонлар, қонунлар қабул қилинаётгани ва унда ёшларнинг ҳам таклифлари ўрин олаётганлиги ёшларга қаратилаётган юксак эътиборнинг намунаси эканлигини айтиб ўтди.

Очиқ ва самимий руҳда ўтган учрашувда ёшларга тааллуқли барча долзарб масалалар кенг ва тўлақонли қамраб олинди.

Ёшлар билан ўтказилаётган учрашувлар негизида келажак авлоднинг манфаатини таъминлаш ва эртанги ёруғ кунга замин яратиш каби улуғвор мақсад ётади. Шундай экан, ҳар бир ёш авлодни қўллаб-қуввтлаш, уларга тўғри йўл-йўриқ кўрсатиш, ҳаётда ўз ўрнини топишига кўмаклашиш асосий вазифадир.

Туман ҳокими Ахборот хизмати