Toʻlqin ovulida hokim va yoshlar uchrashuvi oʻtkazildi

Mamlakatning qudratini belgilaydigan omillar koʻp. Biroq, ularning eng asosiylaridan biri shu yurtda voyaga yetayotgan yuksak maʼnaviyatli, jismonan sogʻlom, har tomonlama barkamol avloddir. Yoshlarning huquq va manfaatlarini himoya qilish, tashabbuslarini qoʻllab-quvvatlash, muammolarining hal etilishiga yordam berish shuning uchun ham bugungi kunning dolzarb vazifasidir.

Shu sababli Amudaryo tumanida ham yoshlar ishtirokida muntazam ravishda koʻplab uchrashuvlar, davra suhbatlari, sayyor qabullar oʻtkazib kelinmoqda.

4-dekabr kuni tumanning Toʻlqin ovul fuqarolar yigʻini maʼmuriy binosida tuman hokimining yoshlar bilan uchrashuvi boʻlib oʻtdi.

Uchrashuvda tuman hokimi Sobir Xoʻjametov, Yoshlar ishlari agentligi tuman boʻlimi boshligʻi Sardor Ismoilov, ovul fuqarolar yigʻinining masʼul xodimlari hamda ovul yoshlari ishtirok etdilar.

Mamlakatimizda yoshlarga boʻlgan eʼtibor, oʻsib kelayotgan barkamol avlodga boʻlgan gʻamxoʻrlik davlat siyosati darajasiga koʻtarilgani bilan ham ahamiyatlidir. Zero yoshlar vatan kelajagi, ertangi kunning bunyodkorlaridirlar. Shu boisdan ham ularning hayotidagi muammolarini oʻrganish, hal etish, intilishlarini qoʻllab-quvvatlash kechiktirib boʻlmaydigan vazifalardan hisoblanadi.

Uchrashuv davomida yoshlar tomonidan turli xil yoʻnalishlarda 22ta murojaat yoʻllandi. Joyida hal qilish imkoni boʻlgan murojaatlar, taklif va tashabbuslar yuzasidan yoshlarning talablari qanoatlantirildi. Atroflicha oʻrganishni taqozo etadigan dolzarb masalalarni hal etish yuzasidan esa Yoshlar ishlari agentligi tuman boʻlimi hamda aloqador muassasa-tashkilotlar rahbarlariga muddatlar belgilanib, topshiriqlar berildi. Murojaatlar bilan bir qatorda uchrashuvda ishtirok etgan yoshlar tuman hokimiga oʻz takliflarini ham berishdi.

Murojaatlarning aksariyati oʻqish uchun kontrakt pullarini qoplab berish, subsidiya asosida mehnat qurollari olish, tadbirkorlik qilish uchun imtiyozli kreditlar olish hamda dehqonchilik qilish uchun yer maydonlari ajratish boʻyicha boʻldi.

Shuningdek, Ismoil Oʻrazboyev koʻchma savdo maydonini auktsionga chiqarib berish, Sherzod Rajapov hamda Joʻrabek Sobirovlar safarbarlik chaqiruvi rezervi xarajatlarini qoplab berish, Muso Yoʻldoshev esa haydovchilik guvohnomasiga oʻqish harajatlarini qoplab berishda amaliy yordam soʻradi.

Uchrashuvda tashabbuskor va faol yoshlar oʻzlarining kelajak rejalari, ularni qiynayotgan muammolar haqida ochiq-oydin gapirdi. Tumanda yosh tadbirkorlarni qoʻllab-quvvatlash, ayniqsa, uyushmagan yoshlar bilan ishlash tizimini ishlab chiqish boʻyicha atroflicha fikr almashildi.

Tuman hokimi yoshlarga murojaat qilar ekan, davlatimiz rahbarining tashabbusi bilan keyingi yillarda yoshlar bilan ishlash boʻyicha mutlaqo yangi tizim yaratilganligi, yoshlar faoliyatiga doir muhim qaror va farmonlar, qonunlar qabul qilinayotgani va unda yoshlarning ham takliflari oʻrin olayotganligi yoshlarga qaratilayotgan yuksak eʼtiborning namunasi ekanligini aytib oʻtdi.

Ochiq va samimiy ruhda oʻtgan uchrashuvda yoshlarga taalluqli barcha dolzarb masalalar keng va toʻlaqonli qamrab olindi.

Yoshlar bilan oʻtkazilayotgan uchrashuvlar negizida kelajak avlodning manfaatini taʼminlash va ertangi yorugʻ kunga zamin yaratish kabi ulugʻvor maqsad yotadi. Shunday ekan, har bir yosh avlodni qoʻllab-quvvtlash, ularga toʻgʻri yoʻl-yoʻriq koʻrsatish, hayotda oʻz oʻrnini topishiga koʻmaklashish asosiy vazifadir.

Tuman hokimi Axborot xizmati