Ватан ҳимоячилари кунига бағишланган тадбир ўтказилди

Ватанимизнинг хавфсизлиги, юртимиз тинчлиги, халқимиз осойишталиги Қуролли Кучларимиз томонидан ишончли тарзда таъминланмоқда. Миллий Армиямизда хизмат қилиш Ўзбекистон фуқаролари учун нафақат конституциявий бурч, айни пайтда том маънодаги шон-шараф ишига айланганлиги ҳам ҳақиқат. Юртимизда 14 январда нишонланадиган Ватан ҳимоячилари куни эса чин маънода умумхалқ байрамига айланган.

Мазкур сана муносабати билан 2024 йил 13 январь куни Амударё туман Маданият бўлимининг томошалар залида Ўзбекистон Республикаси Қуролли Кучлари ташкил этилганлигининг 32 йиллигига бағишланган “Янги Ўзбекистон Армияси – мамлакат қудрати, юксак ғурури ва садоқат тимсолидир” шиори остида байрам тадбири бўлиб ўтди.

Тадбирда туман ҳокими Собир Хўжаметов, секторлар раҳбарлари, Мудофаа, Ички ишлар бўлимлари масъуллари, тумандаги ДХХ чегара қўшинларига қарашли ҳарбий қисмлар мутасаддилари, ҳарбий хизматчилар ва аскар оналари, ёшлар ва кенг жамоатчилик вакиллари иштирок этишди.

Тадбир аввалида Ўзбекистон ва Қорақалпоғистон Республикаларининг давлат мадҳиялари янгради.

Тадбирда туман ҳокими Собир Хўжаметов Миллий Армиямизда хизмат қилаётган ҳарбийлар ҳам эл осойишталигини таъминлаш, чегараларни мустаҳкамлаш борасида самарали хизмат қилиб келаётганини таъкидлади ҳамда уларни 14 январь – Ватан ҳимоячилари куни муносабати билан табриклади.

Шунингдек, мамлакатимизда ҳукмрон бўлган тинчликнинг энг катта бойлик эканлигини, Президентимиз раҳнамолигида мамлакатимиз мудофаа тизимида амалга оширилаётган кенг кўламли ислоҳотлар юксак самаралар бераётгани, ҳарбий хизматга ёшларимизнинг қизиқиш ва интилиши тобора ортиб, Ватан ҳимояси шон-шараф ишига айланиб бораётганини алоҳида таъкидлади.

Айтиб ўтиш жоизки, Миллий Армиямизнинг чегараларимиз дахлсизлигини, Ватанимиз тинчлигини таъминлашдаги роли чексиз. Ватан ҳимоячилари бор экан, юртимиз тинч, осмонимиз мусаффо, халқимизнинг фаровонлиги ва ҳамжихатлиги мустаҳкам бўлади.

Тадбир давомида сўзга чиққанлар ҳарбий хизматчиларнинг ишчанлик фазилатлари, халқ билан бирга тинч-тотув турмушни таъминлаш йўлидаги фидокорона хизматларини алоҳида тилга олишди. Шунингдек, Ватанимизни қўриқлаш ҳар бир инсоннинг муқаддас бурчи эканлиги, ёш авлод қалбида юртга чексиз меҳру-муҳаббат, ватанпарварлик, садоқат туйғуларини мустаҳкамлаш долзарб масалалардан бири эканлиги алоҳида таъкидланди.

Тадбирда Миллий Армиямиз куч-қудрати, ҳарбийларга яратилаётган шарт-шароитлар, юрт сарҳадларини қўриқлаётган мард ўғлонлар, Ватанимизнинг жасур ҳимоячилари кўрсатаётган қаҳрамонликлар ҳақида сўз юритилди. Ҳозирги тинч, осуда ва фаровон ҳаётнинг қадрига етиш, уни асраб-авайлашга ҳар бир фуқаро масъул эканлиги ҳам таъкидланди.

Байрам тадбирида туман Мудофаа ишлари бўлимининг фаол ходимлари ва фахрийларига ташаккурномалар ҳамда туман ҳокимлигининг эсдалик совғалари топширилди.

Туман Маданият бўлими томонидан тайёрланган катта адабий-мусиқий дастур намойиш этилди. Концерт дастури давомида ижро этилган Ватанни мадҳ этувчи куй ва қўшиқлар, дилрабо рақслар, композицион саҳна кўринишлари томошабинларга байрамона руҳ, хуш кайфият бахш этди.

Туман ҳокимлиги Ахборот хизмати.