ФАРОВОН МАҲАЛЛАСИ ЁШЛАР ЕТАКЧИСИ ДОИМ ЁШЛАР ОРАСИДА

Туманнинг Фаровон маҳалласида турли йўналишлардаги тадбиркорлик соҳаларида муваффақиятларга эришаётган, ўзини-ўзи банд қилиш тамойили асосида якка тадбиркорлик, касаначилик, ҳунармандчилик билан шуғулланиб, доимий  даромад манбаига эга бўлганлар талайгина. 14 ёшдан 30 ёшгача бўлган 823 нафар ёшлардан 364 нафарининг доимий иш билан бандлиги таъминланган бўлиб, уларнинг ўз фаолиятларини ҳеч қандай тўсиқларсиз амалга оширишлари учун маҳалла етакчиси Шоҳруҳ Рўзметов доимо масъул, яқин кўмакдош.

Шоҳруҳ Рўзметовнинг иш кунлари деярли ҳар куни маҳалла ёшлари ҳаётидаги муаммоларни ҳал этишга қаратилган саъй-ҳаракатлар билан ўтади.

Хусусан, “Ёшлар дафтари” рўйхатига киритилган 63 нафар ёшларнинг муаммоларини жойига чиққан ҳолда ўрганиш, уларни ўзлари қизиққан йўналишлар бўйича касбга ўқитиш, кам таъминланган оилаларнинг фарзандлари бўлган ёшларнинг ўқиши, касб-корли бўлишига кўмаклашиш  мақсадида маҳалладаги ҳоким ёрдамчиси Муқаддас Бекназарова ҳамда МФЙ раиси Мадамин Казаков билан доимий ҳамкорликда, бамаслаҳат иш олиб боради. Ана шундай ҳамкорликнинг натижаси ўлароқ, 2023 йил давомида 1 нафар ёшнинг ҳайдовчилик ўқув марказида ўқиб, ҳайдовчилик гувоҳномаси олиши учун шароит яратилди ва унга БҲМнинг 4 баравари миқдорида субсидия ажратилди. Ижтимоий ёрдамга муҳтож оиланинг фарзанди бўлган яна 1 нафар ёшнинг сафарбарлик чақирув резерви бадали тўлиқ қоплаб берилди.

Маҳалла етакчиси нафақат “Ёшлар дафтари”, балки “Аёллар дафтари” рўйхатидаги фуқаролар турмуш тарзига ҳам алоҳида эътибор қаратади. Чунки аёл-қизлар бекорга бу дафтарга киритилмаслигини етакчи яхши билади. Балки уларнинг ногиронлиги бўлган фарзандлари бордир, балки ўғил-қизларини ОТМларда ўқитишда қийналаётгандир. Нима бўлганда ҳам “Аёллар дафтари” рўйхатидаги маҳалла аёллари ҳаётига доир муаммоларга ёшлар етакчиси эътибор қаратиши шарт.

Шоҳруҳ Рўзметов бу борада маҳалла хотин-қизлар фаоли билан бамаслаҳат иш юритади. Ҳамкорлик натижасида  “Аёллар дафтари” рўйхатида турган, кам таъминланган оилалар фарзандлари бўлган 11 нафар ёшларнинг ОТМлардаги ўқиши учун шартнома маблағининг 30 фоизи тўлаб берилди. 1 нафар ёшнинг саломатлигини тиклаши учун даволаниш харажатларига субсидия ажратилди. Бундан ташқари, деҳқончилик қилиш истагида бўлган 1 нафар ишсиз ёшга 10 йиллик муддат билан 0,5 гектар ер ажратилишига кўмаклашди. Ижтимоий ҳимояга муҳтож 8 нафар ёшлар доимий ишга жойлаштирилиб, “Ёшлар дафтари” рўйхатидан чиқарилди.

Маҳалла ёшлар етакчисининг фаолият кўлами, кундалик иш режалари бу билан чекланмайди. Маҳалла ёшларининг бўш вақтларини мазмунли ўтказиш, ҳудуддаги таълим-тарбия муассасалари билан ҳамкорликда турли спорт мусобақаларини ташкил этиш, ўқувчи-ёшларнинг узрли сабабларсиз дарс қолдиришлари, маҳалла ҳудудида ҳуқуқбузарликлар содир этилишининг олдини олишга қаратилган назорат тадбирларини ўтказиш каби ишлар унинг доимий диққат марказида. Ҳудудий профилактика инспектори ва инспектор-психологлари, таълим-тарбия муассасаларининг амалиётчи-психологлари ҳамда ота-оналар  билан ўзаро ҳамкорликда мунтазам равишда ўтказилиб келинаётган “Хавфсиз тун”, “Тиғ”, “Давомат” ҳамда “Биз оммавий маданият унсурларига қаршимиз!” мавзуларидаги профилактик-назорат тадбирлари  ўзининг ижобий самараларини бермоқда. Шу боис, маҳалла ёшлари, ўқувчи-ёшлар орасида ҳуқуқбузарликка мойиллик ҳолатлари йўқ ҳисоби.

Шундай бўлса-да, 27 нафар тарбияси оғир ёшлар билан алоҳида профилактик суҳбатлар олиб бориш, уларнинг қизиқишларини инобатга олган ҳолда иш юритишга алоҳида эътибор қаратилади. Уларни соғлом ҳаётга қайтариш мақсадида ушбу ёшлар учун масъул қилиб бириктирилган ташкилотлар масъуллари билан ҳамкорликда барчасининг муаммолари тизимли равишда ўрганилиб, аниқланган камчиликларни бартараф этиш чоралари кўрилмоқда. Хусусан, уларни назоратсиз қолдирмаслик мақсадида турли спорт тўгаракларига  жалб этиш, китобхонликка қизиқтириш борасида амалий чоралар кўрилаётгани ўзининг ижобий самарасини бермоқда.

Айни пайтда Шоҳруҳ Рўзметовнинг маҳалла ёшлари ҳаётига оид режавий ишлари анча тиғиз паллага кирган. Сабаби, ҳадемай баҳор келади. Яна бир-икки ҳафтадан сўнг, кўкламга тайёргарлик, ободонлаштириш тадбирлари бошланиб кетади. Фаровон маҳалласи ёшлари эса бу каби тадбирларга эртадан киришишади. Маҳалла ҳудудини кўкаламзор гўшага айлантириш мақсадида барча кўчалар бўйларидаги ариқларни тозалаш, уй-ҳовлиларнинг фасад қисмларини ободонлаштириш ишларини ҳамжиҳатлик билан амалга оширишга аллақачон киришиб кетишган.

– Кўчат экиш мавсумини ҳеч қийинчиликсиз ўтказиш учун бу жуда муҳим, – дейди Шоҳруҳ Рўзметов. – Қолаверса, аҳилликда қилинган иш кўнгилларга завқ бағишлайди.

Робия ЙЎЛДОШЕВА .