ҲАРБИЙ ПРОКУРАТУРА ТОМОНИДАН АМУДАРЁЛИК ЁШЛАР УЧУН ҲАРБИЙ ВАТАНПАРВАРЛИК МАВЗУСИДА МАЪНАВИЙ-МАЪРИФИЙ ВА МУСИҚИЙ ТАДБИР ТАШКИЛ ЭТИЛДИ

Мамлакатимизда ўсиб келаётган ёш авлодни мустақиллик ғояларига, миллий-маънавий қадриятларга садоқат руҳида тарбиялаш, улар қалбида ватанпарварлик, халқпарварлик туйғуларини янада мустаҳкамлаш, турли мафкуравий ҳуружлардан ҳимоя қилиш доимий долзарб масалалардан саналади. Айниқса, бугунги юксак технологик тараққиёт жараёни, ҳар бир хонадонга кириб борган интернет тармоғи, ёшларимизни ўзига оҳанрабодай тортаётган турли гаджетлар ҳар биримизни ёшлар таълим-тарбияси соҳасида огоҳ бўлишга даъват этади. Зеро, ёшларнинг маънавий иммунитетини мустаҳкамлашга қаратилган ишларга ҳисса қўшиш ҳар бир зиёли, онгли инсоннинг зиммасидаги юксак бурч ва масъулиятли вазифадир.  

Келажак эгаларини она Ватанга садоқат, миллатлараро тотувлик, бағрикенглик руҳида тарбиялаш мақсадида ҳуқуқни муҳофаза қилиш органлари ходимлари, Фавқулодда вазиятлар бўлимлари мутахассислари ҳамда жойлардаги маданият муассасалари ходимлари билан ҳамкорликда амалга оширилаётган маънавий-маърифий тадбирлар бу борада муҳим аҳамият касб этмоқда. Ушбу чора-тадбирлар рўй бериши мумкин бўлган салбий ҳолатларнинг, ёшлар ўртасида диний-экстремизм, гиёҳвандлик, одам савдоси билан боғлиқ ёқимсиз иллатларга берилиш ҳолатларининг олдини олишга қаратилгани билан янада аҳамиятлидир.

Жорий йилнинг 16 февраль санасида Амударё тумани Маданият маркази биносининг тантаналар залида бўлиб ўтган “Ўзбекистон – ягона уйимиз!” шиори остидаги маънавий-маърифий, мусиқий тадбир ҳам келажак эгалари бўлган ёшлар тарбияси, камолоти масаласига бағишлангани билан иштирокчиларда катта таассурот уйғотди.

Ўзбекистон Республикаси Ҳарбий Прокуратураси, Амударё тумани Фавқулодда вазиятлар бўлими масъуллигида ташкиллаштирилган маънавий-маърифий, мусиқий тадбирда Ўзбекистон Республикаси Ҳарбий прокурори ўринбосари, Адлия подполковниги Мақсуд Ниязов, Нукус ҳарбий прокурори, Адлия полковниги Улуғбек Абдураҳимов, Нукус ҳарбий прокурори ёрдамчиси, капитан Шориёр Рамазанов ҳамда Амударё тумани Фавқулодда вазиятлар бўлими бошлиғи Зафар Аҳмедовлар иштирок этишди.

Тадбирда сўзга чиққан масъуллар бугунги глобаллашув жараёнида ёшларни ҳарбий ватанпарварлик руҳида тарбиялаш, улар онгида она Ватанни ҳимоя қилишдек шарафли бурч масъулиятини шакллантириш, “Мен Ўзбекистоннинг фарзандиман!” деган юксак фахр ҳиссини уйғотиш ҳар бир мутасаддининг шарафли бурчи эканини таъкидладилар. Маърузачилар ўсиб келаётган авлодни ҳар қандай мафкуравий хуружларнинг тажовузкор таъсиридан асраб-авайлаш, уларнинг жирканч иллатлар домига илиниб қолишларининг олдини олишга қаратилган фикрлари билан ўртоқлашдилар. Ёшларни бу каби иллатлардан ҳимоя қилишда айниқса ота-онанинг, таълим-тарбия, ҳуқуқни муҳофаза қилиш органлари ходимларининг зиммасидаги масъулият юксак эканлигини таъкидладилар.

Шундан сўнг, амударёлик ёшлар учун Шимоли-Ғарбий ҳарбий округи оркестри томонидан ҳарбий ватанпарварлик туйғуларини мадҳ этувчи концерт дастури намойиш этилди.

Она – Ватан, тинчлик ва миллатлараро дўстликни тараннум этувчи ҳарбий оркестр ижросидаги куй-қўшиқлар ёшлар қалбида ҳақиқатан ҳам ҳарбий ҳаётга қизиқиш, Ватан ҳимоячиси бўлишдек шарафли касбга чексиз меҳр ва ихлос туйғуларини уйғотди.

Тадбир давомида Амударё тумани маданият маркази санъаткорлари ижросида ҳам мароқли концерт дастури ҳам намойиш этилди.

Тадбир ўсиб келаётган ёш авлод қалбида ватанпарварлик, миллий-маънавий қадриятларга ҳурмат туйғуларини мустаҳкамлаб, ҳарбий ҳаётга катта қизиқиш ҳиссини уйғотгани билан муҳим аҳамият касб этди.

Робия ЙЎЛДОШЕВА.