HARBIY PROKURATURA TOMONIDAN AMUDARYoLIK YoShLAR UChUN HARBIY VATANPARVARLIK MAVZUSIDA MAʼNAVIY-MAʼRIFIY VA MUSIQIY TADBIR TAShKIL ETILDI

Mamlakatimizda oʻsib kelayotgan yosh avlodni mustaqillik gʻoyalariga, milliy-maʼnaviy qadriyatlarga sadoqat ruhida tarbiyalash, ular qalbida vatanparvarlik, xalqparvarlik tuygʻularini yanada mustahkamlash, turli mafkuraviy hurujlardan himoya qilish doimiy dolzarb masalalardan sanaladi. Ayniqsa, bugungi yuksak texnologik taraqqiyot jarayoni, har bir xonadonga kirib borgan internet tarmogʻi, yoshlarimizni oʻziga ohanraboday tortayotgan turli gadjetlar har birimizni yoshlar taʼlim-tarbiyasi sohasida ogoh boʻlishga daʼvat etadi. Zero, yoshlarning maʼnaviy immunitetini mustahkamlashga qaratilgan ishlarga hissa qoʻshish har bir ziyoli, ongli insonning zimmasidagi yuksak burch va masʼuliyatli vazifadir.  

Kelajak egalarini ona Vatanga sadoqat, millatlararo totuvlik, bagʻrikenglik ruhida tarbiyalash maqsadida huquqni muhofaza qilish organlari xodimlari, Favqulodda vaziyatlar boʻlimlari mutaxassislari hamda joylardagi madaniyat muassasalari xodimlari bilan hamkorlikda amalga oshirilayotgan maʼnaviy-maʼrifiy tadbirlar bu borada muhim ahamiyat kasb etmoqda. Ushbu chora-tadbirlar roʻy berishi mumkin boʻlgan salbiy holatlarning, yoshlar oʻrtasida diniy-ekstremizm, giyohvandlik, odam savdosi bilan bogʻliq yoqimsiz illatlarga berilish holatlarining oldini olishga qaratilgani bilan yanada ahamiyatlidir.

Joriy yilning 16-fevral sanasida Amudaryo tumani Madaniyat markazi binosining tantanalar zalida boʻlib oʻtgan “Oʻzbekiston – yagona uyimiz!” shiori ostidagi maʼnaviy-maʼrifiy, musiqiy tadbir ham kelajak egalari boʻlgan yoshlar tarbiyasi, kamoloti masalasiga bagʻishlangani bilan ishtirokchilarda katta taassurot uygʻotdi.

Oʻzbekiston Respublikasi Harbiy Prokuraturasi, Amudaryo tumani Favqulodda vaziyatlar boʻlimi masʼulligida tashkillashtirilgan maʼnaviy-maʼrifiy, musiqiy tadbirda Oʻzbekiston Respublikasi Harbiy prokurori oʻrinbosari, Adliya podpolkovnigi Maqsud Niyazov, Nukus harbiy prokurori, Adliya polkovnigi Ulugʻbek Abdurahimov, Nukus harbiy prokurori yordamchisi, kapitan Shoriyor Ramazanov hamda Amudaryo tumani Favqulodda vaziyatlar boʻlimi boshligʻi Zafar Ahmedovlar ishtirok etishdi.

Tadbirda soʻzga chiqqan masʼullar bugungi globallashuv jarayonida yoshlarni harbiy vatanparvarlik ruhida tarbiyalash, ular ongida ona Vatanni himoya qilishdek sharafli burch masʼuliyatini shakllantirish, “Men Oʻzbekistonning farzandiman!” degan yuksak faxr hissini uygʻotish har bir mutasaddining sharafli burchi ekanini taʼkidladilar. Maʼruzachilar oʻsib kelayotgan avlodni har qanday mafkuraviy xurujlarning tajovuzkor taʼsiridan asrab-avaylash, ularning jirkanch illatlar domiga ilinib qolishlarining oldini olishga qaratilgan fikrlari bilan oʻrtoqlashdilar. Yoshlarni bu kabi illatlardan himoya qilishda ayniqsa ota-onaning, taʼlim-tarbiya, huquqni muhofaza qilish organlari xodimlarining zimmasidagi masʼuliyat yuksak ekanligini taʼkidladilar.

Shundan soʻng, amudaryolik yoshlar uchun Shimoli-Gʻarbiy harbiy okrugi orkestri tomonidan harbiy vatanparvarlik tuygʻularini madh etuvchi kontsert dasturi namoyish etildi.

Ona – Vatan, tinchlik va millatlararo doʻstlikni tarannum etuvchi harbiy orkestr ijrosidagi kuy-qoʻshiqlar yoshlar qalbida haqiqatan ham harbiy hayotga qiziqish, Vatan himoyachisi boʻlishdek sharafli kasbga cheksiz mehr va ixlos tuygʻularini uygʻotdi.

Tadbir davomida Amudaryo tumani madaniyat markazi sanʼatkorlari ijrosida ham maroqli kontsert dasturi ham namoyish etildi.

Tadbir oʻsib kelayotgan yosh avlod qalbida vatanparvarlik, milliy-maʼnaviy qadriyatlarga hurmat tuygʻularini mustahkamlab, harbiy hayotga katta qiziqish hissini uygʻotgani bilan muhim ahamiyat kasb etdi.

Robiya YOʻLDOShEVA.