ҚУМЁП ОВУЛИДАГИ ВАТАНПАРВАР ЁШЛАР УСТОЗИ

Юртимиздаги умумтаълим мактабларида чақирувга қадар бошланғич тайёргарлик фанининг самарали ўқитилиши, ёшларимизни ватанпарварлик руҳида тарбиялашда, ҳарбий йўналишлардаги ўқув юртларига кириб таълим олишларида ва Қуролли Кучларимизда ҳарбий хизмат қилишга ҳозирлик кўришларида муҳим замин бўлиб хизмат қилмоқда. Ушбу таълим жараёни ҳарбий касбга қизиқувчи қобилиятли ёшларимизни саралаш ва уларга ўз вақтида керакли таълим-тарбия, шунингдек, тўғри кўрсатма ва йўналишлар берилишида катта имкон бўлмоқда.

61-сонли умумтаълим мактабининг чақириққа қадар бошланғич тайёргарлик фани раҳбари Сададдин Қаландаров ҳам кўп йиллардан бери шу мактабда ёшлар таълим-тарбиясига ўз ҳиссасини қўшиб келмоқда. Мактабда машғулотлар сифатли ташкил қилиниши учун синфхоналар зарур кўргазмали воситалар билан жиҳозланишига алоҳида эътибор қаратиб, Ватанимиз сарҳадлари дахлсизлигини таъминлашда ҳалок бўлганлар тўғрисида фотолавҳа ва маълумотлар жойлаштирилган хотира бурчакларини ташкил этиб, ўқувчиларни ватанпарварлик руҳида тарбияламоқда.

– Дарс машғулотлари жараёнида ўқувчилар Қуролли Кучларнинг асосий вазифалари ҳамда умумҳарбий Низом талабларини, ҳарбий хизмат ва Ватанга қасамёднинг аҳамиятини англаб етишади, – дейди ЧҚБТ раҳбари С.Қаландаров. – Машғулотлар сифатини ошириш, жумладан, ёшларда ҳарбийликка ҳавасни кучайтириш мақсадида тумандаги ҳарбий қисмлар билан ҳамкорлик йўлга қўйилган.

Мактабда ЧҚБТ раҳбари бошчилигида мунтазам равишда “Ёш қутқарувчи”, “Темурбеклар” сингари танловлар ўтказилиб, ўқувчиларнинг эгаллаётган билимлари синовдан ўтказилиб борилади. Бундан ташқари, ҳар йили ўтказиладиган ҳарбий-ватанпарварлик ойлигида тумандаги ҳарбий қисмларга мактаб ўқувчиларининг саёҳатлари ташкил қилинади. Ҳарбий хизматчилар ҳаёти билан яқиндан таништириш мақсадида очиқ эшиклар куни тадбирларида ҳам иштирокини таъминлайди. Бунинг натижасида овул ҳудудида ҳарбий йўналишдаги касбларга, олий таълим даргоҳида таҳсил олишга ҳавас қиладиган ёшлар сони ортди.

Сададдин аканинг шогирдларидан кўпчилиги ҳарбий хизматда ўз бурчларини ўтаб келиб, олий таълим даргоҳларига киришда имтиёз берувчи тавсияномаларга эга бўлишган. Айримлари олий ўқув юртларида таҳсил олишмоқда, баъзилари эса турли соҳаларда меҳнат қилишмоқда. Мактабда 9-синфга қадар таълим олиб, кейинчалик Нукус шаҳридаги Ички ишлар вазирлиги ҳузуридаги академик лицейида ўқиган шогирди Илмира Ўрозматова бўлажак ички ишлар ходимаси. У ҳозирги кунда Тошкент шаҳридаги Ўзбекистон Республикаси Ички ишлар вазирлиги Академиясида 2-босқичда таълим олмоқда. Шунингдек, ўтган ўқув йилида яна бир шогирди Ғайратжон Боймуродов ҳам 9-синфни тугатганидан сўнг, Урганч шаҳридаги Жалолиддин Мангуберди номидаги ҳарбий академик лицейи ўқувчиси бўлишга эришди.

Асли қумёплик бўлган С.Қаландаров 61-сонли мактабни 1986 йилда тугатиб, 1988-1990 йилларда Германия давлатида ҳарбий хизмат бурчини ўтади ва сержант ҳарбий унвонига эга бўлди. Юртига қайтиб келганидан кейин ҚДУнинг тарих ва жамиятшунослик факультетини 1986 йилда тугатди. Турли соҳаларда фаолият кўрсатган собиқ ҳарбий хизматчи ҳозирги пайтда 61-сонли мактабда ЧҚБТ раҳбари вазифасида ишламоқда.

Қумёплик ёшлар қалбида Ватанга муҳаббат ва садоқат ҳисларини мустаҳкамлаётган устоз уларни она Юрт олдидаги фарзандлик бурчини юксак масъулият билан бажаришга даъват этиб келмоқда. Ёшларнинг ватанпарвар, жисмонан соғлом, маънавий етук, кенг дунёқарашли, мустақил фикр юритадиган баркамол инсон сифатида шаклланишига ўзининг ҳиссасини қўшмоқда.

О.Худойберганова.

 ФВБ огоҳлантиради