Деҳқончилик ва чорвачиликдан даромад топаётган қорамонликлар

Мамлакатимизда барча соҳаларни ижтимоий-иқтисодий ривожлантириш мақсадида олиб борилаётган тизимли ислоҳотлар натижасида аҳоли турмуш тарзи тобора яхшиланиб бораётгани инсонларнинг бугунги кунга шукроналиги, эртанги кунга ишончи ҳамда эзгу орзу-мақсадларининг асоси бўлмоқда.

Амударё туманининг олис чекка ҳудудда жойлашган Қиличбой овулининг Қорамон маҳалласида ҳаётини, яшаш шароитларини ўзгартириш учун яратилаётган имкониятлардан унумли фойдаланаётган меҳнатсевар инсонлар талайгина.

Ана шундай ҳаракатчан, меҳнатдан қочмайдиган ҳамюртларимиздан бири Каромаддин Худайбергановнинг айтишича, кафтдеккина томорқаси орқасидан каттагина даромадга эришиб келмоқда. Айни пайтда 5 сотих ер майдонида иссиқхона ташкил қилиб, памидор, бодринг, қалампир, картошка, сабзи, редиска экиб, ота-онаси, турмуш ўртоғи билан биргаликда меҳнат қилиб, парваришлаб келишмоқда.

Ҳоким ёрдамчиси Адил Бешбоев ўзи фаолият олиб бораётган Қорамон маҳалласи аҳолисини ҳар томонлама қўллаб-қувватлаб, уларнинг деҳқончиликларини янада ривожлантиришларига кўмак бермоқда. Худайбергановлар оиласи ҳам деҳқончилик маҳсулотларини ички бозорга олиб боришлари учун кредит асосида мотоцикл олишга ёрдам берган ҳамда оғирини енгил қилган ҳоким ёрдамчисидан миннатдор.

Каромаддининг айтишича, иссиқхона ташкил қилган ер майдонидан ҳосилни йиғиб олгандан кейин, ўрнига кечки карам экиб, иккинчи марта ҳосил олишади. Шунингдек, ҳосил пишиб етилгандан кейин Хоразм вилояти Гурлан тумани, Амударё тумани Манғит шаҳри ички бозорларига олиб бориб сотишади ҳамда томорқасидаги оилавий ҳамжиҳатликдаги меҳнат натижасида ҳар йилги ҳосилдан 40-50 млн сўмга яқин даромад олишади. Оиланинг иқтисодий аҳволи йилдан йилга яхшиланиб, уйларини таъмирлашган, тўй қилишган, янги “Spark” русумли автомобиль сотиб олишган. Меҳнат орқали орзулар ушалишга, ҳаёт тарзининг яхшиланишига эришган.

Ана шундай қорамонлик меҳнатсевар, ҳамжиҳат Ўразметовлар оиласи узоқ йиллардан бери ота-боболаримиздан мерос бўлиб келаётган чорвачилик, балиқчилик, деҳқончилик, қишлоқ хўжалиги маҳсулотларини етиштириш билан шуғулланиб келишмоқда.

Тозабой Ўразметовнинг айтишича, 5-6 йилдан буён иссиқхонада сабзавот ва полиз экинлари маҳсулотлари етиштириб, яхшигина даромад олиб келишмоқда.

Ҳозирда томорқасидаги иссиқхона атрофидаги бўш турган ер майдонига экиш учун памидор, бодринг, қовун, тарвуз ниҳолларини тайёрлашмоқда. Айни пайтда 4 нафар ака-укалар турмуш ўртоқлари ҳамда фарзандлари ҳамжиҳатликда оилавий ушбу ишга жалб қилинган.

Шунингдек, томорқада Туркиядан олиб келинган 300 туп гилос боғи барпо қилинган. 3 йил олдин экилган гилос ниҳоллари ҳозир каттагина гилос дарахтига айланган. Яхши парвариш қилинган гилос ниҳолларидан бу йил илк маротаба ҳосил олиниши ҳамда оилага яхши даромад келиши кутилмоқда.

Қолаверса, Тозабой Ўразметов балиқчиликка қизиқиши туфайли 3 сотих ер майдонида балиқ ҳовузи ташкил қилган. Ҳовузга ҳар бири 100 грамм келадиган қизил сазан балиқларидан 50 кг човоқ юбориб, боқишни ва парваришлашни йўлга қўйган.

Қорамон маҳалласидаги тиниб-тинчимас, меҳнатсевар ҳамюртларимиздан яна бири Алишер Яхшимов 2022 йилда чорвачилик фаолиятини йўлга қўйиш мақсадида банкдан 66 млн сўм имтиёзли кредит олиб, яратилаётган имкониятлардан самарали фойдаланиб келмоқда. Ушбу кредит маблағлари ҳисобига мавжуд 2 бош қорамоли ёнига яна 10 бош қорамол сотиб олиб қўшган. Ҳозирда яхши парваришлаш натижасида чорвачилик сирларини яхши билган ҳамюртимизнинг чорва моллари сони салкам 20 бошга етган. Шунингдек, илгари 5-6 бош қўй боққан бўлса, бугунги кунга келиб улар сони 30 бошга етган.

Алишер Яхшимовнинг айтишича, чорвачилик билан шуғулланиш натижасида оиланинг иқтисоди анчагина яхшиланган. Турмуш ўртоғи ҳамда фарзандлари ўқишдан бўш вақтларида чорвадорга ёрдам бериб, биргаликда меҳнат қилиб келишади. Қолаверса, ҳамюртимиз қўшимча даромад олиш мақсадида асаларичиликни ҳам йўлга қўйган. Ҳар йили асаларичилик орқасидан 3-3,5 тонна асал олиниб, оилага 15-20 млн сўмга яқин қўшимча даромад келади.

Чарос Арслонова, туман ҳокимлигининг Ахборот хизмати раҳбари.