Намунали ҳарбий хизматчиларнинг ота-оналарига ДХХ Чегара қўшинлари қўмондонлигининг “Ташаккурнома”си топширилди

Ҳар бир давлатнинг мустақиллиги, халқининг тинчлиги ва омонлиги унинг ўз армияси, Қуролли Кучлари томонидан ҳимоя қилинади. Шундай экан, миллий армияси қудратли, унинг сафида хизмат қилаётган аскарлари фидойи бўлган мамлакатда тинчлик ҳукм суради, тараққиёт ва ривожланиш бўлади.

Бугун Миллий Армиямиз сафида ўз йигитлик бурчини шараф билан ўтаётган ҳар бир юртдошимизга “Ватаннинг мустаҳкам посбонлари” дея таъриф бериш мумкин. Зеро, улар келажаги буюк давлат қуришни ўз олдига улуғ мақсад қилиб қўйган миллатнинг, тараққиёт йўлидан илдам одимлаётган мамлакатнинг мудофааси учун тун-у кун оромидан кечиб хизмат қилмоқдалар.

Мана шундай жасур ва довюрак аскарлар орасидан ҳам энг фидойилари, яъни ҳарбий хизматчилар орасида намунали хулқи, ташаббускорлиги ва тиришқоқлиги билан бошқаларга ўрнак бўлаётган ҳарбий хизматчиларнинг ота-оналарига махсус “Ташаккурнома” йўллаб, миннатдорчилик билдириш Ўзбекистон Республикаси Давлат хавфсизлик хизмати Чегара қўшинлари қўмондонлигининг доимий анъанасига айланган.

Яқинда шу муносабат билан бир гуруҳ ҳарбий хизматчилар Амударё туманининг овул ва маҳаллаларида бўлиб, ҳарбий хизматчиларнинг ота-оналарига Давлат хавфсизлик хизмати Чегара қўшинлари қўмондонлигининг “Ташаккурнома”ларини тантанали равишда топширдилар.

Манғит шаҳрида жойлашган Давлат хавфсизлик хизмати чегара қўшинларининг ҳарбий қисми маъмурияти туманнинг Дурунки маҳалласида жойлашган Эшмуродовлар хонадонига ташриф буюриб, оила бошлиғи Озод Эшмуродов ва турмуш ўртоғи Гуландом Ердошеваларга Ўзбекистон Республикаси Давлат хавфсизлик хизмати Чегара қўшинлари қўмондонлигининг “Ташаккурнома”сини тантанали тарзда топширдилар ва фарзанди – ҳарбий хизматчи Оғабек Қўшмоновнинг келгусидаги ўқиш ва ишларига омад тиладилар.

Маъсуллар туманнинг Дўрман овулига ҳам ташриф буюриб, шу овулда яшовчи Озодбой Яхшимов ва Раъно Сийтимоваларнинг хонадонида меҳмон бўлишди. Учрашув давомида уларнинг фарзандлари – ҳарбий хизматчи Диёрбек Яхшимовнинг довюраклиги, чегараларимиз дахлсизлигини таъминлашдаги шижоати, жамоат ишларидаги фаоллиги алоҳида эътироф этилди.

Учрашувда сўз олганлар ҳарбий хизматчининг ота-онаси ва устозларига, маҳалла-кўй ва барча яқинларига Ватан тинчлиги ҳамда сарҳадларимиз дахлсизлигини асрашда фидойилик кўрсатаётган шундай аскарни тарбиялаб, вояга етказгани учун миннатдорчилик билдиришди.

Халқимизда “йигит омон бўлса, хавф-у хатар йўқ” деган ибора бор. Чиндан ҳам, Диёрбек каби довюрак, юрт тинчлигини ўз тинчи ва ормидан устун қўювчи ҳарбий  хизматчилар бор экан, юртимизда, ҳар бир маҳаллада, ҳар бир хонадонда тинчлик ва фаровонлик ҳукм суради.

Давлат хавфсизлик хизмати Чегара қўшинларига қарашли Манғит шаҳридаги ҳарбий қисм маъмурияти Холимбег овулидаги Кенжаевлар хонадонида ҳам бўлишиб, фарзандлари Нурбек Йўлдошевнинг ҳарбий хизматдаги ютуқлари, қатъий интизоми ва намунали хулқи учун унинг ота-онаси Ойбек Кенжаев ва Феруза Йўлдошеваларга миннатдорчилик изҳор қилиб, шахсан Давлат хавфсизлик хизмати Чегара қўшинлари қўмондони томонидан имзоланган “Ташаккурнома”ни тантанали тарзда топширдилар.

Ўз навбатида ҳарбий хизматчиларнинг ота-оналари ҳам юксак эътибор учун Қўмондонлик масъулларига, ҳарбий қисм маъмуриятига миннатдорчилик билдириб, аскар отаси ва онаси бўлиш, айниқса, фарзандининг намунали хулқи ва фидокорона хизмати учун ташаккурнома олиш чинаккам шараф эканини эътироф этишди.

Ғ.Ешниёзов