Namunali harbiy xizmatchilarning ota-onalariga DXX Chegara qoʻshinlari qoʻmondonligining “Tashakkurnoma”si topshirildi

Har bir davlatning mustaqilligi, xalqining tinchligi va omonligi uning oʻz armiyasi, Qurolli Kuchlari tomonidan himoya qilinadi. Shunday ekan, milliy armiyasi qudratli, uning safida xizmat qilayotgan askarlari fidoyi boʻlgan mamlakatda tinchlik hukm suradi, taraqqiyot va rivojlanish boʻladi.

Bugun Milliy Armiyamiz safida oʻz yigitlik burchini sharaf bilan oʻtayotgan har bir yurtdoshimizga “Vatanning mustahkam posbonlari” deya taʼrif berish mumkin. Zero, ular kelajagi buyuk davlat qurishni oʻz oldiga ulugʻ maqsad qilib qoʻygan millatning, taraqqiyot yoʻlidan ildam odimlayotgan mamlakatning mudofaasi uchun tun-u kun oromidan kechib xizmat qilmoqdalar.

Mana shunday jasur va dovyurak askarlar orasidan ham eng fidoyilari, yaʼni harbiy xizmatchilar orasida namunali xulqi, tashabbuskorligi va tirishqoqligi bilan boshqalarga oʻrnak boʻlayotgan harbiy xizmatchilarning ota-onalariga maxsus “Tashakkurnoma” yoʻllab, minnatdorchilik bildirish Oʻzbekiston Respublikasi Davlat xavfsizlik xizmati Chegara qoʻshinlari qoʻmondonligining doimiy anʼanasiga aylangan.

Yaqinda shu munosabat bilan bir guruh harbiy xizmatchilar Amudaryo tumanining ovul va mahallalarida boʻlib, harbiy xizmatchilarning ota-onalariga Davlat xavfsizlik xizmati Chegara qoʻshinlari qoʻmondonligining “Tashakkurnoma”larini tantanali ravishda topshirdilar.

Mangʻit shahrida joylashgan Davlat xavfsizlik xizmati chegara qoʻshinlarining harbiy qismi maʼmuriyati tumanning Durunki mahallasida joylashgan Eshmurodovlar xonadoniga tashrif buyurib, oila boshligʻi Ozod Eshmurodov va turmush oʻrtogʻi Gulandom Yerdoshevalarga Oʻzbekiston Respublikasi Davlat xavfsizlik xizmati Chegara qoʻshinlari qoʻmondonligining “Tashakkurnoma”sini tantanali tarzda topshirdilar va farzandi – harbiy xizmatchi Ogʻabek Qoʻshmonovning kelgusidagi oʻqish va ishlariga omad tiladilar.

Maʼsullar tumanning Doʻrman ovuliga ham tashrif buyurib, shu ovulda yashovchi Ozodboy Yaxshimov va Raʼno Siytimovalarning xonadonida mehmon boʻlishdi. Uchrashuv davomida ularning farzandlari – harbiy xizmatchi Diyorbek Yaxshimovning dovyurakligi, chegaralarimiz daxlsizligini taʼminlashdagi shijoati, jamoat ishlaridagi faolligi alohida eʼtirof etildi.

Uchrashuvda soʻz olganlar harbiy xizmatchining ota-onasi va ustozlariga, mahalla-koʻy va barcha yaqinlariga Vatan tinchligi hamda sarhadlarimiz daxlsizligini asrashda fidoyilik koʻrsatayotgan shunday askarni tarbiyalab, voyaga yetkazgani uchun minnatdorchilik bildirishdi.

Xalqimizda “yigit omon boʻlsa, xavf-u xatar yoʻq” degan ibora bor. Chindan ham, Diyorbek kabi dovyurak, yurt tinchligini oʻz tinchi va ormidan ustun qoʻyuvchi harbiy  xizmatchilar bor ekan, yurtimizda, har bir mahallada, har bir xonadonda tinchlik va farovonlik hukm suradi.

Davlat xavfsizlik xizmati Chegara qoʻshinlariga qarashli Mangʻit shahridagi harbiy qism maʼmuriyati Xolimbeg ovulidagi Kenjayevlar xonadonida ham boʻlishib, farzandlari Nurbek Yoʻldoshevning harbiy xizmatdagi yutuqlari, qatʼiy intizomi va namunali xulqi uchun uning ota-onasi Oybek Kenjayev va Feruza Yoʻldoshevalarga minnatdorchilik izhor qilib, shaxsan Davlat xavfsizlik xizmati Chegara qoʻshinlari qoʻmondoni tomonidan imzolangan “Tashakkurnoma”ni tantanali tarzda topshirdilar.

Oʻz navbatida harbiy xizmatchilarning ota-onalari ham yuksak eʼtibor uchun Qoʻmondonlik masʼullariga, harbiy qism maʼmuriyatiga minnatdorchilik bildirib, askar otasi va onasi boʻlish, ayniqsa, farzandining namunali xulqi va fidokorona xizmati uchun tashakkurnoma olish chinakkam sharaf ekanini eʼtirof etishdi.

Gʻ.Yeshniyozov