“Назархон” пахта қабул қилиш масканида амалий-тактик ўқув машқи ўтказилди

Ёнғин хавфсизлиги машқлари ва машғулотлари, айниқса пахта қабул қилиш каби муҳим инфраструктура объектларида ёнғин хавфсизлиги бўйича шахсий таркибнинг малакасини ошириш ва уларнинг жанговар тайёргарлигини мустаҳкамлаш учун жуда муҳимдир. Бу каби машқлар ёнғин содир бўлганда тезкор ва самарали ҳаракат қилиш учун зарур бўлган кўникмаларни ривожлантиришга ёрдам беради.

Шу сабабли Қорақалпоғистон Республикаси Фавқулодда вазиятлар бошқармаси томонидан тасдиқланган иш-режага мувофиқ “Amudaryotex” хорижий корхонасига қарашли “Назархон” пахта қабул қилиш масканида амалий-тактик ўқув машқи ўтказилди.

Амударё тумани Фавқулодда вазиятлар бўлими ҳамда бўлимнинг 4-касбийлаштирилган ёнғин-қутқарув қисми томонидан ташкил қилинган ушбу амалий-тактик ўқув машқидан кўзланган асосий мақсад – пахта қабул қилиш масканларидаги бунтларда ёнғин содир бўлганда шахсий таркибнинг жанговор ёйилишлари ва ҳаракатларини кўздан кечириш, мавжуд куч ва воситалардан тўғри фойдаланишларини яна бир марта синовдан ўтказишдир.

Айтиш жоизки, мамлакатимизда пахта қабул қилиш масканларида ёнғин хавфсизлигини таъминлаш, аҳоли ва ишчиларнинг ҳаёти ва соғлиғини ҳимоя қилиш, шунингдек, муҳим иқтисодий ресурсларни сақлаш борасида зарур тавсиялар ишлаб чиқилиб, масъулларга тегишли мажбуриятлар юкланган. Ўзбекистон Республикаси Вазирлар Маҳкамасининг 2020 йил 20 октябрдаги 649-сонли қарорида ёнғин хавфсизлиги қоидалари ва талаблари белгилаб қўйилган. Ушбу қарорда бу каби масканларда ёнғин хавфсизлигини таъминлаш учун ёнғинга қарши асбоб-ускуналарнинг мавжудлиги, ходимларнинг ёнғин хавфсизлиги бўйича тайёргарлиги ва тегишли ёнғин-техник комиссияларнинг фаолият юритиши лозимлиги белгилаб қўйилган.

Шунингдек, ёнғин хавфсизлиги стандартларига риоя қилиниши, ўт ўчириш воситаларининг мунтазам равишда текширилиши ва янгиланиши хавфсиз иш муҳитини таъминлашда муҳим аҳамиятга эга.

Пахта қабул қилиш масканлари нафақат мавсумга тайёрланиш жараёнида, балки йил давомида пахтани сақлаш жараёнида ҳам ёнғин хавфсизлиги чора-тадбирлари алоҳида эътиборга олиниши керак бўлган объектлар сирасига киради. Шу сабабли масканларнинг ёнғин хавфсизлиги талабларига мувофиқлиги Ўзбекистон Республикаси Фавқулодда вазиятлар вазирлиги томонидан мунтазам равишда назорат қилинади ва бу борада давлат томонидан белгиланган стандартларга амал қилиш талаб этилади.

Ушбу  амалий-тактик ўқув машқи ёнғин ўчириш экипажларининг жанговар тайёргарлигини синовдан ўтказиш учун ҳам ажойиб имконият бўлди. Бу жараёнда ёнғин ўчириш экипажлари ўз вақтида етиб келиш ва ёнғинни бартараф этиш бўйича ўзларининг маҳоратини намойиш этдилар.

Машқ давомида маскан ходимлари томонидан шартли ёнғиннинг бутун маскан бўйлаб тарқалишининг олдини олиш учун ички ёнғин ўчириш мосламаларидан фойдаланилди, бу эса ёнғин ўчириш экипажларининг келишига қадар вазиятни назорат қилишга ёрдам берди.

Шунингдек, машқлар давомида ёнғин ўчириш учун зарур бўлган сув захирасини таъминлаш мақсадида Назархон пахта қабул қилиш масканида мавжуд бўлган иккита ёнғинга қарши сув сақлаш ховузлари ҳам кўздан кечирилди.

Амалий-тактик ўқув машқида туман электр тармоқлари корхонаси, туман газ таъминоти корхонаси, “Тез тиббий ёрдам” ва Ички ишлар бўлими ходимлари ҳамкорликда фаол иштирок этди.

Амалий ўқув машқи якунида ўқув машқи раҳбари Амударё тумани Фавқулодда вазиятлар бўлими бошлиғи ўринбосари, капитан Шерзод Турсинбоев томонидан иштирокчиларга, жумладан маскан ходимларига машқ давомида йўл қўйилган камчиликлар кўрсатилиб, келгуси машқларда уларни бартараф этиш бўйича тавсиялар берилди. Бу каби машқлар, ёнғин хавфсизлиги бўйича шахсий таркибнинг малакасини ошириш ҳамда уларнинг жанговар тайёргарлигини мустаҳкамлашда муҳим восита бўлди.

Рашид Казаков, Амударё тумани Фавқулодда вазиятлар бўлими 4-Касбийлаштирилган ёнғин-қутқарув қисми бошлиғи