Ижтимоий ҳимояга муҳтож ёшларга уй-жой берилди

Жорий йилнинг 15 июнь санасида Амударё тумани ҳокимлигининг мажлислар залида 3 нафар ижтимоий ҳимояга муҳтож ёшларга янги хонадонлар калитлари топширилди. Тадбирда туман ҳокими ўринбосари, Оила ва хотин-қизлар бўлими бошлиғи Гўзал Сабурова, туман ҳокимининг ёшлар сиёсати, ижтимоий-ривожлантириш ва маънавий-маърифий ишлар бўйича ўринбосари Нодирбек Камолов, “Инсон” ижтимоий хизматлар маркази туман бўлими бошлиғи Ғуломжон Дуйсенбоевлар, бўлим масъул ходимлари ҳамда аҳоли вакиллари иштирок этди.

Тадбирда сўзга чиққан масъуллар бугунги кунда мамлакатимизда ёшларга оид давлат сиёсатида амалга оширилаётган ислоҳотлар, ёшларнинг ҳар томонлама ўсиб-ривожланиши учун берилаётган эътибор ва ғамхўрлик, яратилаётган имкониятлар хусусида сўз юритдилар ҳамда ёшларга уй-жойлар калитларини топширдилар.

Таъкидланганидек, Ўзбекистон Республикаси Вазирлар Маҳкамасининг “Етим болалар ва ота-она қарамоғидан маҳрум бўлган болаларни ижтимоий қўллаб-қувватлашга доир қўшимча чора-тадбирлар тўғрисида”ги қарори ёшларга оид давлат сиёсатида олиб борилаётган тизимли ишларни янги босқичга олиб чиқишда муҳим дастуруламал бўлиб хизмат қилмоқда.

Мазкур ҳужжат етим болалар ва ота-она қарамоғидан маҳрум бўлган болаларнинг ижтимоий ҳимоясини кучайтириш, уларни турар жойлар билан таъминлаш, оилавий болалар уйларига жойлаштириш, ҳаётга тайёрлаш учун қулай шарт-шароитлар яратиш тизимини такомиллаштириш мақсадида имзоланган бўлиб, унда бу борада амалга оширилиши лозим бўлган қатор устувор вазифалар белгилаб берилган.

Қарор билан тасдиқланган “Етим болалар ва ота-она қарамоғидан маҳрум бўлган болаларни уй-жой билан таъминлаш тартиби тўғрисида”ги низомга кўра уй-жойга муҳтож бўлган етим болалар ва ота-она қарамоғидан маҳрум бўлган болалар уй-жой билан таъминланиш ҳуқуқига эга эканлиги кўрсатилган. Шунингдек, ўзларига бириктирилган турар жойга эга бўлмаган ва турар жойга муҳтожлар сифатида ҳисобда турган етим болалар ҳамда ота-она қарамоғидан маҳрум бўлган болаларга 18 ёшга тўлган йилда кўп квартирали уй-жойлардан умумий майдони 25 квадрат метрдан кам бўлмаган 1 хонали, вояга етган етим болалар ва ота-она қарамоғидан маҳрум бўлган болалар ўртасида никоҳ тузилган ҳолларда эса 50 квадрат метрдан кам бўлмаган 2 хонали квартиралар ажратилиши белгиланган.

Мазкур қарор асосида Амударё туманида яшовчи 3 нафар етим болалар ва ота-она қарамоғидан маҳрум бўлган болаларга яшаши учун барча зарур шароитларга эга бўлган, яъни таъмирланган ва жиҳозланган, ошхона анжомлари, газ плита, каравот, телевизор, музлатгич, стол-стул каби шароитлар билан таъминланган уй-жойлар берилди.

Тадбирда қайд этилганидек, низом талабларига кўра етим болалар ва ота-она қарамоғидан маҳрум бўлган болаларга уй-жойлар мулкка эгалик қилиш ҳуқуқи асосида, бироқ улар 30 ёшга тўлгунга қадар уй-жойни сотиш, ҳадя қилиш ёки гаровга қўйиш ёхуд ижарага бериш ҳамда уй-жойда ўзи ва оила аъзолари (эри ёки хотини, фарзандлари)дан ташқари бошқа фуқароларни доимий яшаш жойи бўйича рўйхатга олиш ҳуқуқисиз ажратилади. Бунда, етим бола ёки ота-она қарамоғидан маҳрум бўлган боланинг асослантирилган мурожаати асосида маҳаллий ҳокимликлар томонидан уй-жойнинг умумий майдонини кенгайтириш ва низомда назарда тутилган талабларни сақлаб қолиш шарти билан сотишга рухсат берилади.

Айтиш жоизки, ижтимоий ҳимояга муҳтож ёшларни ҳар томонлама қўллаб-қувватлаш борасида амалга оширилаётган бу каби ислоҳотлар келажак эгалари бўлган ёш авлод вакилларинининг ҳаётда ва жамиятда ўз ўрнини топишига, камол топиб ривожланишига, Ватанга фойдаси тегадиган инсон бўлиб вояга етишига хизмат қилади.

Чарос Арслонова, туман ҳокимлигининг Ахборот хизмати раҳбари.