Ёшлар куни муносабати билан туманимизда “Янги Ўзбекистон ёшлари, бирлашайлик!” шиори остида катта байрам тадбири ўтказилди

Ёшлик – туганмас шижоат, аниқ мақсадлар йўлида тинимсиз меҳнат, машаққатлар ва муваффақиятлар фасли. Катта авлоднинг орзу-ҳаваслари, ушалмаган ниятлари куч-ғайратга тўла навқирон авлоднинг муваффақият йўлидаги дадил ҳаракатларида намоён бўлади гўё... Ёшлик ҳеч қачон мағлубиятни тан олмайди. Шунинг учун Ёшлик ҳамиша ғолибликка муносиб.

Мамлакатимизнинг барча ҳудудларида, хусусан, Амударё туманида ҳам 30 июнь – Ёшлар куни зўр тантаналар билан нишонланди. Сана муносабати билан Дўстлик маҳалласида жойлашган болалар ва ўсмирлар марказий ўйингоҳида “Янги Ўзбекистон ёшлари, бирлашайлик!” шиори остида ташкил этилган байрам дастури ёшларга кўтаринки кайфият ва унутилмас қувончли лаҳзаларни бахш этди.

Байрам тадбирида туман ҳокими Собир Хўжаметов, сектор раҳбарлари, ҳоким ўринбосарлари, соҳага масъул мутасаддилар ва туманимиз ёшлари иштирок этишди.

Табдир аввалида Ўзбекистон ва Қорақалпоғистон Республикаларининг Давлат мадҳиялари янгради. Навқирон авлод вакиллари қўлларини кўксига қўйиб, юрт мадҳини жўр бўлиб куйлашди.

Шундан кейин туман ҳокими Собир Хўжаметов сўзга чиқиб, ёшларини байрам билан самимий муборакбод этди. Туман ҳокими ўзининг табрик нутқида мамлакатимизда амалга оширилаётган ислоҳотлар натижасида ёшлар билан ишлашнинг янги тизими яратилганлиги, ижтимоий фаол, Ватан ва халқ тақдирига дахлдорлик туйғулари билан яшаётган ёш авлоднинг сафи йилдан-йилга тобора кенгайиб бораётганини таъкидлаб, юртимизда ёшларга яратилган зарур шароит ва имкониятлардан самарали фойдаланиб, муваффақиятларга эришиб келаётган туманимиз фахрли ёшларининг ютуқларини алоҳида эътироф этиб ўтди.

Дарҳақиқат, мамлакатимизда аҳолининг асосий қисмини ёшлар ташкил этади. Шунинг учун Ўзбекистон ёшлар мамлакати сифатида эътироф этилади. Бундан етти йил муқаддам – 2017 йилда Президентимиз ташаббуслари билан 30 июнь “Ёшлар куни” сифатида белгилангани нафақат ёшларимиз, балки бутун халқимиз ҳаётида тарихий воқеа бўлган эди. Жорий йилнинг юртимизда “Ёшлар ва бизнесни қўллаб-қувватлаш йили” сифатида белгиланиши ҳам Ўзбекистон ёшлари ҳаётида янги саҳифаларни очди.

Бугун ҳаётимизнинг қайси соҳа ва тармоғини олмайлик, ёшларга эътибор ва ғамхўрлик асосий ўринга кўтарилиб, уларга зарур шароит ва имкониятлар яратиб берилмоқда. Кейинги пайтларда ҳаётга татбиқ этилган “Ёшлар дафтари” ва “Ёшлар дастури” доирасида амалга оширилган ишлар натижасида кўплаб ёшларнинг ҳаётидаги муаммолари ҳал қилинишига эришилмоқда.

Шу ўринда таъкидлаш жоизки, мамлакат миқёсида ўтказилаётган мусобақа ва танловларда туманимиз ёшларининг эришган ютуқлари байрам учун муносиб совға бўлди. Хусусан, Давлат хавфсизлик хизмати кубоги учун ўтказилган мусобақаларнинг Қорақалпоғистон Республикаси босқичида футбол бўйича Тўлқин овули йигитлари жамоаси, мини футбол бўйича эса Холимбег овули қизлари жамоаси ғолиб чиқиб, мамлакат миқёсидаги босқичга йўлланма олгани амударёлик спорт ихлосмандларига катта туҳфа бўлди. Бундан ташқари, байрам арафасида амударёлик Аббос Йўлдошевга шахсан Президентимиз томонидан “Мард ўғлон” давлат мукофоти топширилгани барчамизни хушнуд этди.

Концерт дастурида туманимизнинг таниқли эстрада юлдузлари ижросида янграган шўх қўшиқлар ёшларни завқлантириб, рақсга чорлади. Санъанткорлар томонидан куйланган қўшиқларда ёшлик, она Ватан, дўстлик, муҳаббат туйғулари тараннум этилди. Айниқса, истедодли ёш эстрада юлдузи Бобурбек Араббоев ижро қилган шўх қўшиқлар ёшлар даврасини янада жонлантирди.

Фурсатдан фойдаланиб, биз ҳам туманимизнинг барча ёшларини 30 июнь – Ёшлар куни билан яна бир бор муборакбод этамиз. Ўзбекистон ёшларини Ватан равнақи учун муносиб хизмат қилишларида куч-ғайрат ва шижоат ҳеч қачон тарк этмасин!

Шоҳзод Қурбонбоев