Белгиланмаган жойларда чўмилиш ҳаётингиз учун хавфли
Ёзги таътил вақтида ўқувчиларнинг аксарият қисми мавсумни мамлакатимизнинг энг сўлим гўшаларидаги оромгоҳларда дам олиб ўтказишади. Бу манзилларда ёшлар нафақат ҳордиқ чиқаришади, балки вилоятлардан келган тенгдошлари билан дўстлашади.
Аммо уйда, ота-онаси бағридаги ўқувчилар таътилни қандай ўтказади, бу жараёнда оила бошлиқлари нималарга эътибор қаратишлари лозим, деган ҳақли савол туғилади.
Гап шундаки, кўпчилик ота-оналар турмуш ташвишлари сабаб, фарзанди нималар билан машғуллигидан бехабар қолишади. Айниқса, куннинг иссиғида болаларнинг ўртоқлари билан бебошлик қилиб, дарё ва кўлларга, шунингдек, тақиқланган сув ҳавзаларига бориб чўмилишлари кўнгилсиз воқеалар билан якунланиши мумкин. Шундай пайтда болаларга эътибор кучайтирилиб, чўмилишнинг тартиб-қоидаларига амал қилинмаса, бахтсиз ҳодисалар содир бўлмаслигига ҳеч ким кафолот бермайди.
Маълумотларга кўра, сувда сузишнинг ҳузурбахшлиги билан бирга ҳар йили белгиланмаган жойда чўмилишлар оқибатида дунёда 300 минг нафардан ортиқ киши бевақт ҳаётдан кўз юмиши қайд этилган.
Мана шу маълумотнинг ўзи ҳам ҳар бир инсон, “сувда чўкиш мен ва менинг яқинларим билан содир бўлмайди” – деган бепарволикдан чекиниши лозимлигини кўрсатади. Бахтсиз ҳодисаларнинг олдини олишимиз учун оила аъзоларимиз ва атрофдагиларни мавжуд хавф-хатарлардан огоҳ этишни кундалик вазифамизга айлантиришимиз зарур. Зеро, ҳар бир инсон учун фарзанд азиз, яқин қариндошлар эса муқаддасдир.
Афсуски, кейинги 5 йил оралиғида сувда чўкиб ҳалок бўлган ёшларнинг 95 фоизи ота-оналар томонидан назоратсиз қолдирилиши ҳамда ўзбошимчалик билан белгиланмаган ва тақиқланган жойларда чўмилиши оқибатида содир бўлган. Катта ёшдаги фуқароларнинг сувга чўкишларида эса асосан спиртли ичимликлар истеъмол қилиб, маст ҳолда сувга тушишлари сабаб бўляпти.
Айни пайтда шу сингари ҳодисалар қайта такрорланмаслиги ва унинг олдини олиш мақсадида туман Фавқулодда вазиятлар бўлими ходимлари томонидан тегишли ташкилотлар билан ҳамкорликда белгиланмаган жойларда чўмилмаслик борасида аҳоли орасида тушунтириш ва прафилактика тадбирлари олиб бориляпти. Шунингдек, дарё қирғоқларига, сув ҳавзаларига тақиқловчи белгилар ва баннерлар ўрнатилмоқда. Ўтказилаётган чора-тадбирлар натижасида жорий йилнинг июль ойигача бўлган даврда туманимизда сувга чўкиш билан боғлиқ ҳолатлар кузатилмади.
Азиз юртдошлар, ўзинггиз ва оила аъзоларингизнинг ҳаётига бепарво бўлманг!
З.Атабаев, Амударё тумани ФВБ ходими, катта сержант
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
