СОБИҚ СИНФДОШЛАР 35 ЙИЛДАН СЎНГ УЧРАШДИЛАР

Болалик – беғуборлик, ёшлик–баҳор, дейдилар. Шу боис, инсон бир умр болалик ва ёшлик хотиралари оғушида яшайди, ана шу хотиралардан маънавий куч олади, қилган хатоларини тўғрилашга, эзгу ишларини бир-бир хаёл кўзгусидан ўтказиб, сарҳисоб қилишга, ҳаётидан кўнгли тўлганида ана шу болалик ва ёшлик дамларига ошно дўстлари билан дийдорлашишга интилади. Айниқса, болаликдаги қадрдон дўстлари билан учрашганда бу хотиралар уйғонади, бор бўй-басти билан намоён бўлади. Дўстона, самимий суҳбатлар, қадрдонлик меҳри уларни янада жипслаштиради,

Бундан 35 йил аввал Амударё туманидаги 20-сонли умумтаълим мактабини битириб, мустақил ҳаётга йўлланма олган собиқ синфдош дўстлар яна ўзларига таълим-тарбия бериб, оқ-қорани танитган, мустақил ҳаёт сари парвоз майдони вазифасини ўтаган жонажон мактаби бағрида жам-ул жам бўлдилар.

Баланд гужумлар соя солган мактаб ҳовлисида учрашиб, болалик хотиралари оғушида бир муддат сайр қилган қадрдон дўстларни қўнғироқ жарангги яна синфхоналарга чорлади. Собиқ синфдошлар бундан 35 йил аввал устозларидан илм сирларидан сабоқлар олган парталарга ўтириб, беғубор болалик шўхликларини эсладилар. Ўзларига таълим тарбия берган устозларининг ўгит-насиҳатларини тинглаб, дилдан суҳбатлашдилар.

Ҳаёт тасодифларга, бемаврид йўқотишларга тўла. Синфхонадаги бўш парталарга қадалган дўстларнинг нигоҳи Аллоҳнинг иродаси билан маълум сабабларга кўра ҳаётдан эрта кетган қадрдонларини излади. Синфдошлар дўстлари ҳақидаги хотираларни ёдга олишиб, ўтганларнинг руҳларини шод этиш мақсадида қабрларини зиёрат қилдилар. Учрашув тадбири давомида ўтганларнинг руҳларига Қуръон оятларидан тиловатлар қилинди.

Шундан сўнг учрашув устоз-у шогирдлар ва тадбир меҳмонлари билан файзли дастурхон атрофида давом этди. Сўлим Амударё соҳилида, она табиат бағрида собиқ синфдошлар давраси янада мароқли таассуротларга бой бўлди.

Қадрдон дўстлар бир-бирларига, устозларига ўзлари ҳаётда эришган ютуқлари, айниқса, оиласи, фарзандлари хусусида сўзлаб бердилар. Куй-қўшиқлар тинглаб, 35 йилдан кейинги дийдорлашув онларидан мамнун бўлишиб, рақсга тушдилар.

Учрашув якунида турмуш тақозосига кўра, ҳар қайсиси Амударё туманининг ва мамлакатимизнинг турли ҳудудларида умргузаронлик қилаётган собиқ синфдошларни битта давра атрофида жамлаб, дийдорлашув тадбирини ташкил қилишда фидойилик кўрсатган Гулшодахон, Ғуломжон ва Қумрихон синфдошларига чин дилдан миннатдорчилик билдиришди.

Собиқ синфдошларнинг дийдорлашув тадбири бири-биридан ширин таассуротлар оғушида ўтди ва ўзаро меҳр-оқибат туйғуларидан кўнгиллар обод, яна узоқ йиллар эслаб юришга арзигулик фараҳли онларга бой бўлди.

Робия Йўлдошева.