Олий Мажлис Қонунчилик палатаси депутати амударёлик тиббиёт ходимлари билан учрашди

Маълумки, кейинги йилларда соғлиқни сақлаш тизимини яхшилаш, аҳолига кўрсатилаётган бирламчи тиббий санитария, шошилинч ва тез тиббий ёрдам, ихтисослаштирилган хизматлар сифатини ошириш, дори-дармон ва тиббий буюмлар билан таъминлаш, хусусий тиббиёт тизимини қўллаб-қувватлаш бўйича бир қатор ислоҳотлар амалга оширилди.

Ўзбекистон Республикаси мустақиллигининг 33 йиллигига бағишлаб “Биз бир бўлсак – ягона халқмиз, бирлашсак – Ватанмиз” шиори остида “Мустақиллик йилларида аҳоли саломатлигини сақлаш ва соҳани ривожлантиришга оид ислоҳотлар” мавзусида туман Тиббиёт бирлашмасида ўтказилган давра суҳбатида соҳада эришилган бир қатор ютуқлар эътироф этилди.

Тадбирда Ўзбекистон Республикаси Олий Мажлиси Қонунчилик палатаси депутати Зумрад Бекатова, Ўзбекистон “Миллий тикланиш” демократик партияси Қорақалпоғистон Республикаси Кенгаши масъуллари ҳамда туман Тиббиёт бирлашмаси ходимлари иштирок этишди.

Таъкидланганидек, кейинги йилларда соғлиқни сақлаш соҳасида амалга оширилаётган ислоҳотлар натижасида аҳолига тиббий ёрдам кўрсатишнинг сифати, самарадорлиги ва қулайлигини ошириш таъминланяпти.

Хусусан, сўнгги 5 йилда соғлиқни сақлаш соҳасига бюджетдан ажратилган маблағлар 7,3 триллион сўмдан 29,7 триллион сўмга оширилди. 2024 йил давомида ушбу маблағ яна кўпайтирилиб, 33,4 триллон сўм ажратиш кўзда тутилган. Ўтган 5 йиллик даврда шифохоналар ва тез тиббий ёрдам пунктларини дори-дармон, тиббий буюмлар билан таъминлашга ажратилаётган маблағлар 12 баробар кўпайтирилди.

Тадбирда қайд этилганидек, соҳани кадрлар билан таъминлаш, уларнинг узлуксиз малака ошириб боришини, илмий фаолият билан шуғулланишини рағбатлантириш бўйича барча чоралар кўрилмоқда. Эҳтиёж юқори бўлган тор доирадаги мутахассислар учун ординатура ва магистратурада квоталар кўпайтирилди, интернатура қайта жорий этилди. Тиббиёт муассасалари тиббий, фармацевтика ва бошқа ходимларининг лавозим маошлари малака тоифасидан келиб чиқиб, 10-15 фоизга оширилди.

Бундан ташқари, 2021 йилдан бошлаб олис ва чекка ҳудудларда жойлашган оилавий шифокорлик пункти ва оилавий поликлиникалар учун “Қишлоқ шифокори” дастури жорий қилинди. Унга асосан, бошқа ҳудудда яшайдиган шифокор 3 йил ишлаб бериш шарти билан ишга қабул қилинганда бир марталик 30 млн сўм ҳамда хизмат уйи билан таъминлаш ва ойлигига 2 млн сўм устама бериш йўлга қўйилди.

Шунингдек, вилоятлардан, Тошкент шаҳридан, хориждан Қорақалпоғистон Республикасининг Тахтакўпир, Чимбой, Қораўзак, Бўзатов, Шўманай, Қўнғирот туманларига бориб ишловчи шифокорлар учун ойлик маошига дастлабки 3 йил давомида 100 фоиз, Мўйноқ туманида эса 200 фоиз миқдорида қўшимча ҳар ойлик устама тўловлари Давлат бюджети маблағлари ҳисобидан тўлаб бериш амалиёти жорий этилди.

Республика тасарруфидаги ихтисослаштирилган тиббиёт марказлари сони 13тадан 24тага етказилиб, унинг ҳудудларда 70дан зиёд филиаллари, 300дан зиёд бўлимлари ташкил этилди ва аҳоли учун ўзи яшаб турган ҳудудда ҳам юқори технологик тиббий ёрдамни олиш имконияти кенгайтирилди.

Тадбир давомида маърузачилар томонидан аҳоли саломатлигини яхшилаш, замонавий соғлиқни сақлаш тизимини ташкил этишнинг қонуний асосларини яратиш бўйича қабул қилинган ҳуқуқий ҳужжатлар, амалий тиббиётда эришилган ютуқлар ҳақида маълумотлар берилди.

Қизғин мунозара ва муҳокамага бой бўлган давра суҳбати якунида Амударё туманида аҳоли соғлигини сақлаш билан боғлиқ мақсадларни амалга оширишга қаратилган зарур таклиф ва тавсиялар билдирилди.

Шоҳзод Қурбонбоев