Гулзор маҳалла фуқаролар йиғини маъмурий биносида очиқ ва сайёр суд мажлиси бўлиб ўтди

Амударё туманида аҳолининг ҳуқуқий онги ва маданиятини юксалтиришга қаратилган очиқ ва сайёр суд мажлиси бўлиб ўтди. Жорий йилнинг 5 март куни Гулзор маҳалла фуқаролар йиғини маъмурий биносида ўтказилган тадбирда жиноят ишлари бўйича Амударё туман суди раиси Ж.Балтабаев, судья ёрдамчиси Э.Жуманиёзов ҳамда туман прокурорининг катта ёрдамчиси Р.Темирбаев иштирок этди.

Сайёр суд мажлисида фуқаро Қ.Б.га оид жиноят иши кўриб чиқилди. Суд материалларига кўра, у ўзаро келишмовчилик оқибатида таниши Х.Ж. билан ўрталарида келиб чиққан ўзаро келишмовчилик натижасида унга енгил тан жароҳати етказган. Суд тиббий экспертизаси хулосаси ва иш материаллари асосида судланувчи Ўзбекистон Республикаси Жиноят кодексининг 109-моддаси 2-қисми “в” банди билан айбли деб топилиб, унга 2 йил озодликни чеклаш жазоси тайинланди.

Шунингдек, суд мажлиси давомида 6 нафар маҳкумга нисбатан жазони ўташдан муддатидан илгари шартли озод қилишга оид ишлар ҳам кўриб чиқилди. Ўзбекистон Республикаси ЖКнинг 73-моддаси (Жазони ўташдан муддатидан илгари шартли озод қилиш) тартибида илгари жиноят содир қилиб, хозирги кунда тузалиш йўлига қатъий ўтган ҳамда ўрнатилган тартиб-қоида талабларини бажарган ва меҳнатга ҳалол муносабатда бўлган 6 нафар маҳкум ўзларига нисбатан қўлланилган муайян ҳуқуқдан маҳрум қилиш жазоларнинг ўталмай қолган қисмини ўташдан муддатидан илгари шартли равишда озод қилинди.

Тадбир якунида иштирокчиларга коррупцияга қарши курашишнинг мазмуни, принциплари ва аҳамияти ҳақида кенг тушунчалар берилди.

Бу каби сайёр суд мажлислари жойларда қонунийликни таъминлаш ва фуқароларнинг ҳуқуқий саводхонлигини оширишда муҳим аҳамият касб этади.

Жасурбек Балтабаев, Жиноят ишлари бўйича Амударё туман судининг раиси