“КАМБАҒАЛЛИКДАН – ФАРОВОНЛИК САРИ” ДАСТУРИНИ АМАЛГА ОШИРИШГА БАҒИШЛАНГАН ЙИҒИЛИШ ЎТКАЗИЛДИ
Халқимизнинг ўзига хос миллий-маънавий қадриятлари, асрлар синовидан ўтган бири-биридан гўзал урф-одатлари дунё халқларини ўзига ром этиб келади. “Қўшни – қўшнига қўл-қанот”, “Бир оила обрўси маҳалла аҳли учун шараф”, “Маҳалла – меҳр-оқибат маскани”, “Бир болага етти маҳалла ҳам ота, ҳам она” каби ҳикматларни ўзларининг ҳаёт тамойилларига айлантирган маҳалладошлар ҳеч қачон бири-биридан кўнгил узишмайди ва бири-бирини ёлғиз ташлаб қўйишмайди. Айниқса, камхарж оилаларни қўллаб-қувватлаш, бундай оилалар фарзандларининг ўқиб, билим олишлари, касб-ҳунар ўрганишлари учун кўмаклашиш ҳамиша маҳалладошларнинг зиммаларидаги инсоний бурчлари бўлиб келган ва бу бурч ва масъулият туйғуси халқимиз учун она Ватанга муҳаббат туйғуси билан ҳамоҳангдир.
Муҳтарам Президентимизнинг 2024 йил 25 ноябрда қабул қилинган “Камбағалликдан фаровонлик сари” дастурини амалга оширишга фаол нуронийларни жалб этиш чора-тадбирлари тўғрисида”ги Қарори моҳиятан маҳалла институтининг ўзига хос халқона қадриятларни янада мустаҳкамлаш борасидаги нуфузини оширишга қаратилгани билан муҳим аҳамиятга эга.
Унга кўра, кекса авлод вакилларининг билим ва катта ҳаёт тажрибаларидан фойдаланган ҳолда 3 нафар нуронийни 5та камбағал оилага бириктириш орқали уларнинг томорқа хўжалигини самарали юритишлари учун шарт-шароитлар яратишга кўмаклашиш, фарзандларининг билим олишлари, касб-кор эгаллашлари борасида тўғри йўл-йўриқлар бериш, ижтимоий-маънавий муҳитни соғломлаштириш мақсадида “Нуронийлар ва ота-оналар Кенгаши” аъзолари иштирокида оилаларда тинчлик-хотиржамликни таъминлаш, кўчма дўконлар, кичик оилавий тадбиркорлик йўналишлари бўйича фаолиятларини йўлга қўйишларида фуқароларни “Маҳалла еттилиги” билан ҳамкорликда доимий қўллаб-қувватлаш каби вазифаларни амалга ошириш белгиланган.
Жорий йилнинг 3 декабрь санасида Амударё туман ҳокимлигининг катта мажлислар залида тумандаги барча овул ва маҳалла фуқаролар йиғинлари раислари, “Маҳалла еттилиги” аъзолари, “Нуроний” жамғармаси жамоатчилик Кенгаши аъзолари ва фаол нуронийлар иштирокида бўлиб ўтган кенгайтирилган йиғилишда масъуллар томонидан мазкур Қарорнинг мазмун-моҳияти, ундан келиб чиқадиган вазифалар ва “Камбағалликдан фаровонлик сари” дастури доирасида тумандаги барча овул ва маҳалла фуқаролар йиғинларида ташкил этилаётган “Нуронийлар ва ота-оналар Кенгаши” аъзоларининг маҳалла аҳли ҳаётидаги ўрни хусусидаги масалалар бўйича маълумот ва тавсиялар, зарур тушунчалар берилди.
Йиғилишда Амударё туман ҳокимининг ўринбосари Нодирбек Камолов, “Нуроний” жамғармаси жамоатчилик Кенгаши раиси Бекман Алламберганов ва бошқалар сўзга чиқиб, “Камбағалликдан фаровонлик сари” дастурини амалга оширишда нуронийлар ўзларига биркитилган камбағал оилалар фарзандларининг билим олиш, касб ўрганишга бўлган қизиқиш ва иқтидорларига мувофиқ уларни уста ва ҳунармандларга шогирдликка бериш, хорижий тилларни ўрганишлари учун шароитлар яратиш, кўчма дўкон ва кичик ишлаб чиқариш ускуналарини харид қилишни хоҳлаган оилаларга маҳалладаги ҳоким ёрдамчисини жалб қилган ҳолда бўлиб-бўлиб тўлаш имкониятини яратиш, фарзандлари ОТМларда таълим олаётган оилаларни тегишли жамғармалар орқали қўллаб-қувватлаш чораларини кўришга масъулият билан ёндашиш зарурлиги ҳақида батафсил маълумотлар бердилар.
Шунингдек, йиғилишда мазкур дастур доирасида овул ва маҳаллаларда саломатлик учун пиёда юриш, камхарж оилалардаги нуронийлар ва ёшлар иштирокида турли кўнгилочар спорт тадбирларини ташкил этиш, соғлом турмуш тарзи тарғиботини доимий равишда амалга ошириш, айниқса, камбағал оилалар фарзандларининг турли спорт мусобақаларда қатнашишлари учун тегишли манбалар орқали маблағлар ажратилишини таъминлаш борасида қимматли фикрлар ҳам билдирилди.
Йиғилишда “Камбағалликдан фаровонлик сари” дастури доирасида Амударё тумани бўйича амалга ошириладиган вазифалар юзасидан режалар белгиланиб, тегишли қарор қабул қилинди.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
