Табиат мўъжизаси ҳисобланган ғайриоддий инсонлар

Дунёда миллиардлаб одамлар яшайди. Улар орасида ўзининг ноёб жисмоний хусусиятлари ёки ғайриоддий қобилиятлари билан ажралиб турадиган шахслар бор. Улар гўёки табиатнинг мўъжизаси бўлиб, имкониятлари оддий инсон ақлига сиғмайдиган даражада кенг. Баъзилари бу қобилиятларга туғма эга бўлса, бошқалари узлуксиз меҳнат ва машқлар орқали ҳайратланарли натижаларга эришган. 

Франциялик Мишел Лотито ҳар қандай қаттиқ материални ҳазм қила олиш қобилияти билан танилган. У металл, шиша, пластик каби буюмларни бемалол истеъмол қилган. Энг ҳайратланарлиси, у икки йил давомида ҳақиқий самолётни майда бўлакларга бўлиб ейишга муваффақ бўлди! Олимлар унинг ошқозон-ичак тизими жуда мустаҳкам эканлиги ва кучли кислота ишлаб чиқаришини аниқлашган. 

Америкалик Ким Пик эса жаҳон тарихидаги энг кучли хотирага эга инсонлардан бири бўлган. У 12 000 дан ортиқ китобни ёддан билган ва ҳар бир саҳифани бир неча сония ичида эслаб қолган. Унинг ғайриоддий қобилияти Голливуд киноижодкорларининг эътиборини тортган ва у машҳур “Rain Man” фильми учун прототип бўлган. Олимлар унинг мияси маълумотни қайта ишлашда оддий одамларникидан тубдан фарқ қилишини аниқлашган. 

Анголалик Франсиско Даминго Жоаким энг катта оғизга эга инсон сифатида танилган. Унинг оғзи 17 сантиметргача кенгайиши мумкин. Бу эса унга кола банкаси, катта мевалар ва бошқа буюмларни оғзига сиғдира олиш имконини беради. Бу ноёб жисмоний хусусияти туфайли у Гиннес рекордлар китобига киритилган. 

Голландиялик Вим Ҳоф ўз танасини қаттиқ совуққа мослаштириш қобилияти билан машҳур. У музли сувларда сузиш, қор устида югуриш ва ҳатто -20°C ҳароратда юпун ҳолда бир неча соат қолиш каби ишларга қодир. Олимлар унинг танаси кислород танқислигига ва совуқ таъсирига мутлақо бошқача реакция қилишини аниқлашган. Вим Ҳоф нафас олиш ва медитация техникаси орқали организмини бошқаришни ўрганган ва бу усул шифокорлар томонидан ҳам ўрганилмоқда. 

Америкалик Дин Карназес жуда узоқ масофага югуриш қобилияти билан дунё аҳлини лол қолдирган. У 50 кун давомида ҳар куни 50 та марафон, яъни 2 минг 100 км масофага югурган, аммо чарчамаган. Олимлар унинг мушаклари сут кислотасини бошқача усулда ишлаб чиқарадиган механизмга эга эканлигини аниқлашган, бу эса чарчашнинг олдини олади. Унинг натижалари инсон организмининг чегаралари ҳали ҳам тўлиқ ўрганилмаганини исботлайди. 

Бу инсонларнинг ҳар бири ўз ноёб хусусиятлари билан дунёни ҳайратга солган. Улар табиат инсон танаси ва онгининг чексиз имкониятларга эга эканлигини кўрсатади. Баъзилар туғма қобилият соҳиблари бўлса, бошқалари узлуксиз меҳнат ва машқлар орқали имконсиздек туюлган нарсаларни уддалашган. Улардан олинадиган асосий сабоқ – инсон имкониятлари чексиз, асосийси, ишонч ва ҳаракат!

Интернет маълумотлари асосида ҚДУ талабаси, таҳририят амалиётчиси Севинч Мақсудова тайёрлади.