“МЕҲРЖОН” — ҲОСИЛ БАЙРАМИ ЎҚУВЧИЛАР ҚАЛБИДА ОНА ТАБИАТГА МЕҲР УЙҒОТДИ
Аслида инсон табиатнинг энг олий маҳсули. Унинг юксак ақл-заковати билан гўзалликлар яратилади, соғлом ва бақувват яшаши учун она ер бағрида битмас-туганмас ризқ-насиба яратади, ўз меҳнати билан табиатнинг бойлигига бойлик қўшади. Бу жиҳатдан миришкор бободеҳқонларнинг меҳнати эътибор ва таҳсинга лойиқ. Ҳар бир қарич ердан дур ундириб, турли ноз-неъматлар етиштираётган ҳазрати деҳқонларимиз учун куз – нафақат сарбаланд ҳосил хирмонларини бунёд этиш, балки халқимизнинг ризқ-насибаси мўл-кўллигини хурсандчилик билан намойиш қилиш айёми ҳамдир. “Меҳржон” – ҳосил байрами ана шу жиҳати билан барчамиз учун азиз ва қадрлидир.
Яқинда Амударё туман Мактабгача ва мактаб таълими тасарруфидаги 36-сонли умумтаълим мактабининг 3-“Б” синф ўқувчилари томонидан ташкил этилган “Меҳржон” – ҳосил байрами тадбири ҳам миришкор ва фидойи бободеҳқонларимизнинг меҳнатларини қадрлаш, ўсиб келаётган ёш авлод қалбида она табиатга меҳр-муҳаббат туйғуларини янада мустаҳкамлашга қаратилгани билан муҳим аҳамият касб этди. Унда мактаб педагогика жамоаси, бошланғич синфлар ўқитувчилари ва ўқувчилари, шунингдек, ота-оналар иштирок этишди.
Тадбирни мактаб директорининг ўқув ишлари бўйича ўринбосари Сарвар Қутлимуродов очди ва барчани байрам билан табриклаб, “Меҳржон” байрамининг халқимиз ҳаётида тутган ўрни ва беқиёс катта аҳамияти хусусида сўз юритди. Айниқса, бободеҳқонларимиз етиштирган ноз-неъматларнинг қадрига етиш, уларнинг исроф қилмаслик зарурлигини таъкидлади.
Шундан сўнг, ўқувчилар турли ноз-неъматлар – полиз ва сабзавот маҳсулотларини таърифловчи шеърлар айтиб беришди. Ўқувчилар “Олтин куз”, “Деҳқонбобо”, “Пахтаой” сиймоларини намойиш этиб, шеърий сатрлар билан таърифлаб бердилар. Айниқса, “Ҳозиржавоб деҳқон” саҳна кўринишини маҳорат билан намойиш этган ўқувчилар Азизбек Муродбоев, Муҳаммаддин Норимматов, Комронбек Исмоилов ва Элдор Бахтиёровларнинг ижролари барчага манзур бўлди.
Тадбир давомида мактаб бадиий ҳаваскорлик тўгараги аъзолари томонидан ижро этилган “Олти халфа” рақси, масхарабозлик сўз ўйинлари, “Шолғом” эртагидан саҳна кўринишлари, Дилнура Шомуродова, Гулираъно Соатбоева, Моҳира Озодбоева, Мадина Соатбоева, Кумушбиби Улуғбекова ҳамда Одина Раимовалар ижроларидаги дилрабо рақслар байрамга янада файз бағишлади.
“Меҳржон” – ҳосил байрами ўқувчи-ёшлар қалбида она табиатни севиш, унинг бағрида етиштирилган ноз-неъматлардан оқилоналик билан, исрофгарчиликларсиз фойдаланиш, бободеҳқонларимизнинг фидокорона меҳнатларини қадрлаш туйғуларини янада мустаҳкамлади.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
