Tabiat moʻʼjizasi hisoblangan gʻayrioddiy insonlar

Dunyoda milliardlab odamlar yashaydi. Ular orasida oʻzining noyob jismoniy xususiyatlari yoki gʻayrioddiy qobiliyatlari bilan ajralib turadigan shaxslar bor. Ular goʻyoki tabiatning moʻʼjizasi boʻlib, imkoniyatlari oddiy inson aqliga sigʻmaydigan darajada keng. Baʼzilari bu qobiliyatlarga tugʻma ega boʻlsa, boshqalari uzluksiz mehnat va mashqlar orqali hayratlanarli natijalarga erishgan. 

Frantsiyalik Mishel Lotito har qanday qattiq materialni hazm qila olish qobiliyati bilan tanilgan. U metall, shisha, plastik kabi buyumlarni bemalol isteʼmol qilgan. Eng hayratlanarlisi, u ikki yil davomida haqiqiy samolyotni mayda boʻlaklarga boʻlib yeyishga muvaffaq boʻldi! Olimlar uning oshqozon-ichak tizimi juda mustahkam ekanligi va kuchli kislota ishlab chiqarishini aniqlashgan. 

Amerikalik Kim Pik esa jahon tarixidagi eng kuchli xotiraga ega insonlardan biri boʻlgan. U 12 000 dan ortiq kitobni yoddan bilgan va har bir sahifani bir necha soniya ichida eslab qolgan. Uning gʻayrioddiy qobiliyati Gollivud kinoijodkorlarining eʼtiborini tortgan va u mashhur “Rain Man” filmi uchun prototip boʻlgan. Olimlar uning miyasi maʼlumotni qayta ishlashda oddiy odamlarnikidan tubdan farq qilishini aniqlashgan. 

Angolalik Fransisko Damingo Joakim eng katta ogʻizga ega inson sifatida tanilgan. Uning ogʻzi 17 santimetrgacha kengayishi mumkin. Bu esa unga kola bankasi, katta mevalar va boshqa buyumlarni ogʻziga sigʻdira olish imkonini beradi. Bu noyob jismoniy xususiyati tufayli u Ginnes rekordlar kitobiga kiritilgan. 

Gollandiyalik Vim Hof oʻz tanasini qattiq sovuqqa moslashtirish qobiliyati bilan mashhur. U muzli suvlarda suzish, qor ustida yugurish va hatto -20°C haroratda yupun holda bir necha soat qolish kabi ishlarga qodir. Olimlar uning tanasi kislorod tanqisligiga va sovuq taʼsiriga mutlaqo boshqacha reaktsiya qilishini aniqlashgan. Vim Hof nafas olish va meditatsiya texnikasi orqali organizmini boshqarishni oʻrgangan va bu usul shifokorlar tomonidan ham oʻrganilmoqda. 

Amerikalik Din Karnazes juda uzoq masofaga yugurish qobiliyati bilan dunyo ahlini lol qoldirgan. U 50 kun davomida har kuni 50 ta marafon, yaʼni 2 ming 100 km masofaga yugurgan, ammo charchamagan. Olimlar uning mushaklari sut kislotasini boshqacha usulda ishlab chiqaradigan mexanizmga ega ekanligini aniqlashgan, bu esa charchashning oldini oladi. Uning natijalari inson organizmining chegaralari hali ham toʻliq oʻrganilmaganini isbotlaydi. 

Bu insonlarning har biri oʻz noyob xususiyatlari bilan dunyoni hayratga solgan. Ular tabiat inson tanasi va ongining cheksiz imkoniyatlarga ega ekanligini koʻrsatadi. Baʼzilar tugʻma qobiliyat sohiblari boʻlsa, boshqalari uzluksiz mehnat va mashqlar orqali imkonsizdek tuyulgan narsalarni uddalashgan. Ulardan olinadigan asosiy saboq – inson imkoniyatlari cheksiz, asosiysi, ishonch va harakat!

Internet maʼlumotlari asosida QDU talabasi, tahririyat amaliyotchisi Sevinch Maqsudova tayyorladi.