Insonlarning ogʻirini yengil, mushkulini oson qilish ijtimoiy xizmat xodimining zimmasidagi masʼuliyat

Oʻzbekiston Respublikasi Prezidentining 2023-yil 1-iyundagi “Aholiga sifatli ijtimoiy xizmat va yordam koʻrsatish hamda uning samarali nazorat tizimini yoʻlga qoʻyish boʻyicha kompleks chora-tadbirlar toʻgʻrisida”gi Farmoniga muvofiq Oʻzbekiston Respublikasi Prezidenti huzurida Ijtimoiy himoya milliy agentligi, shuningdek, uning Qoraqalpogʻiston Respublikasi, viloyatlar va Toshkent shahar boshqarmalari hamda tuman va shaharlarda “Inson” ijtimoiy xizmatlar markazlari va ijtimoiy xodimlar guruhlari tashkil etilib, faoliyat olib bormoqda.

Mamlakatimizning barcha hududlarida boʻlgani kabi Amudaryo tumanining Besh ovul mahalla fuqarolar yigʻinida ham “Inson” ijtimoiy xizmatlar markazining mahalladagi ijtimoiy xizmat xodimi tomonidan samarali ishlar olib borilmoqda. Ayni paytda mahallada 669 ta xonadon tarkibidagi oilalarda 3684 nafar aholi istiqomat qiladi. Yil boshida hududdagi barcha xonadonlarda istiqomat qiluvchi aholining turmush tarzi, mehnatga layoqatliligi, iqtisodiy taʼminlanganlik darajasi puxta oʻrganilib, xatlovdan oʻtkazildi. Xatlov natijalariga asosan kam taʼminlangan, ijtimoiy himoyaga muhtoj, nogironligi bor boʻlgan hamda yakka-yolgʻiz fuqarolar roʻyxati shakllantirilib, ularni ijtimoiy qoʻllab-quvvatlash choralari koʻrildi.

Oʻzbekiston Respublikasi Vazirlar Mahkamasining 2024-yil 25-yanvardagi “Alohida taʼlim ehtiyojlari boʻlgan bolalarning taʼlim olishlarini tashkil etish va ularni reabilitatsiya qilish tizimini takomillashtirish chora-tadbirlari toʻgʻrisida”gi Qarori ijrosini taʼminlash maqsadida alohida taʼlim olishga ehtiyojmand boʻlgan 1 nafar bolaning uyda taʼlim olishi uchun zarur shart-sharoitlar yaratilib, yana bir nafar bolani psixologik-tibbiy-pedagogik komissiya koʻrigiga yuborish choralari koʻrildi.

Prezidentimizning 2024-yil 27-fevraldagi “Muhtoj shaxslarni protez-ortopediya moslamalari va reabilitatsiya qilishning texnik vositalari bilan taʼminlash tizimini takomillashtirish chora-tadbirlari toʻgʻrisida”gi Qarori ijrosini taʼminlashga qaratilgan saʼy-harakatlar natijasida mahallada istiqomat qiluvchi 78 nafar nogironligi boʻlgan shaxslar alohida tizimga olinib, ulardan 1 nafariga POM, RTV rusumidagi oyoq protezi, 1 nafariga nogironlik aravachasi berildi. Yana 1 nafar nogironligi boʻlgan fuqaroga nogironlik aravachasini olib berish choralari koʻrilmoqda. Bundan tashqari, 6 nafar nogironligi boʻlgan va pensiya yoshidagi fuqarolarning salomatliklarini tiklashlariga koʻmaklashish maqsadida ularni sanatoriy-profilaktoriylarga yuborish uchun tegishli tashkilotlarga arizalar taqdim etildi.

Aholining ijtimoiy himoyaga muhtoj, ishsiz qatlamini hamda nogironligi boʻlgan shaxslarning oila aʼzolarini, aynan shunday toifadagi bolalarning ota-onalarining ish bilan bandligini taʼminlash maqsadida nogironligi boʻlgan bolalarning ota-onalaridan 4 nafariga 80 yoshga toʻlgan keksalarga va 1-guruh nogironligi boʻlgan bolaga qarab turish boʻyicha bandligini taʼminlash maqsadida haqiqiy holatlar joyiga chiqqan holda oʻrganilib, dalolatnomalar rasmiylashtirildi.

Oʻzbekiston Respublikasi Vazirlar Mahkamasining 2021-yil 21-oktyabrdagi 654-sonli va unga qoʻshimcha 2023-yil 10-noyabrdagi 596-sonli Qarorlari ijrosini taʼminlashga qaratilgan chora-tadbirlar rejasiga koʻra, 91 ta ijtimoiy himoyaga muhtoj oilaga bolalar nafaqasi tayinlandi. Shuningdek, 4 ta oila kam taʼminlangan deb eʼtirof etilib, ijtimoiy nafaqa va moddiy yordam toʻlash joriy etildi. Yana 4 ta oilaga esa boquvchisini yoʻqotganlik nafaqasi toʻlanib kelinmoqda. Ayni paytda mahalladagi 107 ta oilaning moddiy ahvoli baholandi va ulardan 55 tasi kambagʻallik reyestriga kiritilib, mazkur oilalarni kambagʻallikdan chiqarish boʻyicha individual rejalar ishlab chiqildi. Bundan tashqari, bolalar nafaqasi va ijtimoiy yordam oluvchi, kambagʻallik reyestriga kiritilgan oilalarning qish mavsumida tabiiy gaz va elektr energiyasi uchun qish mavsumida kompensatsiya toʻlovini joriy etish rejalashtirilgan. Hududimizdagi 2 nafar yakka-yolgʻiz fuqaroga ham alohida eʼtibor qaratilib, “Inson” ijtimoiy xizmatlar markazining ijtimoiy xizmat xodimi assistenti tomonidan zarur xizmatlar koʻrsatilib kelinmoqda. Shuningdek, tazyiq va zoʻravonlikka uchragan 1 nafar ayol ijtimoiy xizmatlar markazi psixologi tomonidan tibbiy-maʼrifiy-psixologik trening oʻtkazilib, 3 nafar shaxsga keys-menejment usulini qoʻllagan holda ularning muammolarini individual tarzda oʻrganish orqali bartaraf etish choralari koʻrilmoqda.

Amalga oshirilayotgan barcha saʼy-harakatlarimiz mohiyatan har bir insonning hayotdan rozi yashashini taʼminlash va muammolarini tizimli ravishda bartaraf etish orqali ularning ijtimoiylashuviga koʻmaklashishga qaratilgani bilan hamisha dolzarb va muhim hisoblanadi. Bevosita xalq orasida yurib, ular bilan samimiy, dildan muloqotlar qilish orqali ogʻirini yengil, mushkulini oson qilish esa ijtimoiy xizmat xodimining zimmasidagi masʼuliyatli vazifasidir.

Jahongir Yoʻldoshev, Beshovul MFY ijtimoiy xodimi.