BOShLANGʻICh SINFLAR OʻQUVChILARIGA BERILAYoTGAN YeNGIL NONUShTA TAYYoRLANIShI VA TARQATILIShINI OMMALAShTIRIShGA OID SEMINAR BOʻLIB OʻTDI

Oʻzbekiston Respublikasi Prezidentining “2022-2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida”gi 2022-yil 28-yanvardagi Farmoniga muvofiq Qoraqalpogʻiston Respublikasi va Xorazm viloyatidagi boshlangʻich sinf oʻquvchilarini bosqichma-bosqich bepul ovqat bilan taʼminlash tizimini yoʻlga qoʻyish belgilangan edi. Bu borada Vazirlar Mahkamasining 2022-yil 25-avgustda 472-sonli qarori qabul qilindi. Ushbu qaror ijrosi yuzasidan tumanimizda muayyan ishlar qilinmoqda. Mavjud 85 ta umumiy oʻrta taʼlim maktablarining 1-4-sinflari oʻquvchilarini bepul ovqatlantirish tashkil etilgan va hozirgi kunga qadar davom ettirilmoqda.

Amudaryo tumanidagi 85 ta maktablarning jami boshlangʻich sinflarining14 ming 769 nafar oʻquvchilariga 4 ta masʼuliyati cheklangan jamiyatlar tomonidan yengil nonushta yetkazlib berilmoqda, “Shoxnur Azatovich”, “Navroʻz”, “Mangʻit milk”, “Tabassum” masʼuliyati cheklangan jamiyatlari tomonidan maktablar kesimida yengil nonushta yetkazalib berilmoqda.

Shuni eʼtirof etish kerakki, oʻquvchilarga sifatli yengil nonushta tayyorlash va yetkazib berishda “Navroʻz” masʼuliyati cheklangan jamiyati bazasi Qoraqalpogʻiston Respublikasida eng namunali baza deb topildi. Bu yerda tumanimizdagi 30 ta maktabning 4983 nafar boshlangʻich sinf oʻquvchilariga keytering usulida yengil nonushta tarqatib kelinmoqda. Taomnomadagi oziq-ovqat mahsulotlarining 60 foizi jamiyatning oʻzida ishlab chiqariladi va shu kunning oʻzida qadoqlanib, 30 ta maktabga yetkazib berilmoqda. Oʻtkazilayotgan nazorat tadbirlari davomida ishchi guruh aʼzolari 1-4-sinflar oʻquvchilariga berilayotgan yengil nonushta mahsulotlarining tayyorlanishi va tarqatilishini koʻzdan kechirib, jarayon namunali yoʻlga qoʻyilganligini qayd etishmoqda.

“Navroʻz” masʼuliyati cheklangan jamiyatida amalga oshirilayotgan oʻquvchilarga yengil nonushta tayyorlanishi va yetkazilib berilishi borasidagi saʼy-harakatlar nafaqat tumanimizda, balki, respublika miqyosida ham ibratga loyiq. Shuning uchun ularning tajribalarini ommalashtirish, kelgusi 2023-2024 oʻquv yilidan barcha viloyatlarda tatbiq etish maqsadida yaqinda amaliy seminar boʻlib oʻtdi.

“Navroʻz” masʼuliyati cheklangan jamiyatida boʻlib oʻtgan amaliy seminarda Qoraqalpogʻiston respublikasi Maktabgacha va maktab taʼlimi vazirligi masʼullari, barcha viloyatlar Maktabgacha va maktab taʼlimi boshqarmalarining sogʻlom ovqatlantirish boʻlimi boshliqlari, viloyat sanitoriya epidemiologiya osoyishtaligi va jamoat salomatligi boʻlimi boshliqlari, tuman Maktabgacha va maktab taʼlimi boʻlimi masʼullari ishtirok etdilar.

Aytish kerakki, maktablarda 1-4-sinflar oʻquvchilarini sogʻlom ovqatlantirish maktablarning oshxonalarida va sinf xonalarida sanitariya va gigiyena qoidalari, normalari talablariga mos shart-sharoitlar yaratilgan holda tashkil etilmoqda. Bu borada maktablarda maxsus komissiyalar tashkil qilingan boʻlib, komissiya tarkibiga maktabning direktori, hamshira, maʼnaviy-maʼrifiy ishlar boʻyicha direktor oʻrinbosarlari, maktabning amaliyotchi psixologi va sinf rahbarlari va ota-onalar vakillari kiritilgan. Ular kunlik hisobotlarini, 1-4-sinf oʻquvchilar davomatini tuman Xalq taʼlimi boʻlimiga har kuni berib boradi va hisobotlar umumlashtirilib, kundalik.com tizimi bilan solishtirilib, Qoraqalpogʻiston Respublikasi Maktabgacha va maktab taʼlimi vazirligiga yetkaziladi.

Shuningdek, umumiy oʻrta taʼlim maktablarining boshlangʻich sinf oʻquvchilarini keytering usulida bepul ovqatlantirishning standart talablariga mosligini kundalikli koʻrikdan oʻtkazib borishi boʻyicha tuman hokimligining bayoni asosida ishchi guruh tuzildi va ushbu guruh ham oʻquvchilarga berilayotgan oziq-ovqat mahsulotlarining belgilangan talablarga mosligini, oziq-ovqat mahsulotlarining sanitariya-gigiyena talablariga javob berishini, oziq-ovqat mahsulotlarining taomnomaga mosligi va miqdorlarini koʻrikdan oʻtkazib turadi.

Seminarda ishtirokchilar boshlangʻich sinflar oʻquvchilariga menyu boʻyicha yengil nonushta, yaʼni qumoq xamirli pechene, yongʻoqli keks tayyorlanish jarayoni koʻrsatib berildi. Bu ishlarda sanitariya qoidalari va normalariga toʻliq rioya qilinishiga eʼtibor qaratildi. Shuningdek, mevalarning maxsus sovutgichda saqlanishi, tayyor mahsulotlarning konteynerlarga joylashtirilish jarayoni va maxsus avtomashinalarda belgilangan maktablarga yetkazilish amaliyoti ham koʻrsatib berildi.

Seminar ishtirokchilari “Navroʻz” masʼuliyati cheklangan jamiyati rahbari Ozod Qurbonboyevdan oʻzlarini qiziqtirgan savollarni berib, batafsil javoblar oldilar.

Oygul RAJABOVA.