Ногиронлиги бор бўлишига қарамай баъзи соғлом инсонлар учун ўрнак бўлаётган ҳамюртларимиз

Муҳтарам Президентимиз ташаббуси билан бугунги кунда мамлакатимизда ижтимоий ҳимояга муҳтож, ногиронлиги бўлган инсонларни ҳар томонлама қўллаб-қувватлаш, уларнинг ҳаёт тарзи, яшаш шароитларини яхшилаш борасида тизимли ишлар олиб борилмоқда.

Амударё туманида ижтимоий ҳимояга муҳтож, ногиронлиги бўлишига қарамай, ҳаётда соғлом инсонлар сингари олдинга интилаётган, ўз оиласини, ота-онаси ва фарзандларини моддий таъминлашга ҳаракат қилаётган, бугунги кунига шукроналик келтириб, яратилаётган имкониятлардан унумли фойдаланаётган ҳамда ўзгаларга намуна бўлаётган ҳамюртларимиз талайгина.

Туманимизнинг Чордара маҳалласида яшовчи Шокир Нуруллаев 2014 йилда бахтсиз ҳодиса туфайли бир оёғидан ажралган ҳамда II гуруҳ ногирони бўлиб қолган. Ҳозирги кунда 2 нафар фарзанд – бир ўғил, бир қизнинг отаси. Ёши улуғ онаси Гулара Салаеванинг дуосини олиб, оиласини боқиш, турмуш ўртоғи ҳамда фарзандларини ўзгалардан кам қилмай тарбиялашга ҳаракат қилиб келмоқда.

Шокир Нуруллаев кредит маблағи ҳисобига электр мотоцикл сотиб олган ҳамда ушбу мотоцикл орқали оғир юкларни, қишлоқ хўжалиги маҳсулотларини ташиб бериш орқали халқимизга хизмат кўрсатиб, оиласига даромад келтирмоқда.

Ногиронлиги бўлишига қарамай, ўзи, оиласи ва фарзандлари учун яхши ҳаёт тарзини яратишга, фарзандларининг орзу-ҳавасларини рўёбга чиқаришга интилиб, ҳаракатдан тўхтамаётган яна бир ҳамюртимиз Равшанбек Матмуратов 2002 йилда бахтсиз ҳодиса сабабли ўнг қўлидан ажралган. У II гуруҳ ногирони бўлишига қарамай, ҳаётидан норози бўлиб яшаётган баъзи соғлом инсонларга ўрнак, намуна бўла олади.

II гуруҳ ногирони Равшанбек Матмуратов билан суҳбатлашар эканмиз, ўзини асло ногирон эканлигини ҳис қилмасдан, оилабоши сифатида тадбиркорлик орқали яхши даромад топаётганининг, рўзғорини тебратиб, ҳалол меҳнат қилаётганининг гувоҳи бўлдик.

Равшанбек Матмуратов Манғит деҳқон бозорида ёз ойларида қовун, тарвуз каби полиз экинларини, қиш ойларида эса картошка, пиёз, сабзи, карам каби сабзавотларни сотиб келмоқда. Ҳамюртимиз бугунги кунидан рози, турмуш ўртоғи, 2 нафар ўғли ҳамда қизи доимо унга қўл-қанот бўлиб, қўллаб-қувватлаб келишаётганини, ўзини бу ҳаётда бахтли инсонлар қаторида эканини таъкидлайди.

Манғит шаҳри Олмазор маҳалласида яшовчи Отабек Бобожонов ўз севган касби мобиль телефонларни таъмирлаш фаолияти билан шуғулланиб келмоқда. Унинг ҳаётда ўз ўрнини топишига ногиронлиги асло тўсқинлик қилмаган. Доимо ўз устида ишловчи, изланувчан Отабек Бобожонов бугунги кунга қадар 6 нафар шогирдлар тайёрлаб, уларнинг ҳам устачилик фаолиятларини бошлаб юборишларига ёрдам берган.

Оилали, бир нафар фарзанднинг отаси бўлган Отабек Бобожонов моҳир уста бўлиб етишишида ота-онаси ҳамда турмуш ўртоғи доимо қўллаб-қувватлаб келганларини таъкидлайди. У ўз касбига бўлган меҳри, қизиқиши, доимо ҳаракатдан тўхтамаслиги туфайли Тошкент шаҳрида мобиль телефонларни таъмирловчи тажрибали усталар қўлида ўқиб, улардан янги билимлар ҳамда кўникмалар олиб келган. Айни пайтда Отабек Бобожонов ўз касбининг моҳир устаси, унинг доимий мижозлари сони жуда кўп ва ҳар бир мижоз унинг ишларидан мамнун.

Орамизда ана шундай – имконияти чекланган бўлишига қарамасдан ўзини асло ижтимоий ҳимояга муҳтож дея ҳис этмайдиган, ҳаётни севувчи, ҳар бир кунига, ҳатто ҳар бир сўзида шукроналик келтирувчи инсонларни кўриб кишининг шукроналиги, ғайрати, шижоати, ҳаётга муҳаббати, эртанги кунга ишончи янада ортади.

Чарос Арслонова, туман ҳокимлигининг Ахборот хизмати раҳбари.