76-сонли умумтаълим мактабида “Биринчи психологик ёрдам” мавзусида семинар бўлиб ўтди

Таълим тизимида ўқувчи шахсиятини ҳар томонлама ривожлантириш, уларда мустаҳкам ҳаётий кўникмаларни шакллантириш долзарб масалага айланган. Бунинг учун эса мактабларда амалга оширилаётган психологик хизматнинг сифатини ошириш, амалиётчи мутахассисларнинг билим ва кўникмаларини мунтазам равишда бойитиш бугунги куннинг талабидир. Шу мақсадда Амударё туман Мактабгача ва мактаб таълими бўлими тасарруфидаги 76-сонли умумтаълим мактабида “Биринчи психологик ёрдам” мавзусида амалиётчи психологлар учун семинар ташкил этилди.

Тадбирда Қорақалпоғистон Республикаси Мактабгача ва мактаб таълими вазирлиги Психологик-педагогик ташхис фаолиятини ташкил этиш шуъбаси раҳбари Эркин Нуртаев, туман Мактабгача ва мактаб таълими бўлими бошлиғи Ялғаш Шомурадов ҳамда туманлардан келган амалиётчи психологлар иштирок этди.

Дастлаб меҳмонлар 76-сонли умумтаълим мактаби ҳовлисида тантанали тарзда кутиб олинди. Семинар иштирокчилари учун махсус қизиқарли савол-жавоб ўйини ташкил этилди. Инсон ҳаёти мазмуни, самарали мулоқот, болалар ва ўсмирлар тарбиясига доир мавзуларга бағишланган саволларга мутахассислар ўз тажрибалари асосида атрофлича жавоб бердилар.

Семинар доирасида меҳмонлар “Долзарб 90 кун” лойиҳаси асосида мактабда йўлга қўйилган ишлар, тўгараклар фаолияти билан яқиндан танишди. Маълумки, бугун меҳнат бозорида рақобатбардош ва замонавий талабларга жавоб берадиган мутахассисларга эҳтиёж юқори. Шундан келиб чиқиб, сўнгги йилларда мамлакатимизда таълим тизимида касб-ҳунар таълимини ривожлантиришга алоҳида эътибор қаратилмоқда.

Президентнинг тегишли Қарорига мувофиқ, мазкур мактабда ҳам ўқувчиларнинг касб-ҳунарга бўлган қизиқишини ошириш ҳамда меҳнат бозори талабларига мос малакали ва рақобатбардош кадрларни тайёрлаш мақсадида 2024–2025 ўқув йилидан бошлаб касб-ҳунарга йўналтирилган янги ўқув дастурлари жорий этилди. Йигитлар дурадгорликни, қизлар эса тикувчилик касбини ўрганмоқда. Меҳмонлар ўқувчилар томонидан тайёрланган маҳсулотлар билан танишиб, уларнинг қўл меҳнатларини юқори баҳоладилар.

Айтиш жоизки, ҳозирда 76-сонли умумтаълим мактабида 39 нафар ўқувчи касб-ҳунар эгаллаб, мактабдаги таълим билан бир қаторда ўз меҳнати орқали даромад топишни бошлаган. Янги ўқув йилидан бошлаб яна 2 та умумтаълим мактабида 10–11-синф ўқувчилари учун ҳам касб-ҳунар ўргатиш йўлга қўйилиши кўзда тутилган.

Ўқувчиларга сифатли таълим бериш билан бирга, уларнинг касбий кўникмаларини ривожлантириш, келажакда мустақил ҳаётга тайёрлаш ва бўш вақтларини мазмунли ташкил этиш мақсадида амалга оширилаётган ишлар ўз самарасини бермоқда.

Семинарнинг асосий қисми “Биринчи психологик ёрдам” мавзусидаги амалий машғулотлар билан давом этди. Машғулот аввалида масъуллар томонидан тадбирнинг мақсад ва вазифалари, хусусан, ўқувчиларда стресс, хавотир, ҳис-туйғуларни бошқариш кўникмаларини шакллантириш зарурлиги ҳақида фикр-мулоҳазалар билдирилди. Шунингдек, амалиётчи психологлар нафақат болалар, балки уларнинг ота-оналари ва ўқитувчилари билан ҳам самарали ишлаш кўникмаларига эга бўлиши кераклиги алоҳида таъкидланди.

Машғулотлар давомида психолог-тренерлар томонидан синфдаги болалар билан индивидуал ишлаш, ҳаяжонни назорат қилиш, фавқулодда вазиятларда тўғри ва тезкор қарор қабул қилиш каби кўникмаларга оид амалий усуллар тақдим этилди. Психологлар ўзаро тажриба алмашиш жараёнида учраётган муаммолар ва уларни ҳал этиш бўйича ўз ечимлари билан ўртоқлашишди.

12-, 27-, 29-, 40-, 70- ва 84-сонли мактабларнинг амалиётчи психологлари томонидан олиб борилган машғулотлар таълим-тарбия жараёнида психологик ёндашувнинг ўрни, ўқувчи шахсиятига таъсир этувчи омиллар каби мавзуларни қамраб олди. Уларда ўз мактабларида қўлланаётган инновацион ёндашувлар, диагностика усуллари ва амалий иш тажрибалари ҳақида ҳам фикрлар билдирилди.

Семинар иштирокчилари таъкидлаганидек, бундай тадбирлар психологларнинг касбий малакасини ошириш, янгиликлардан хабардор бўлиш ҳамда иш жараёнида учраётган муаммоларга ечим топишда муҳим аҳамият касб этади. Айниқса, ўқувчиларда ўзини англаш, ижобий мулоқот кўникмаларини шакллантириш ва руҳий барқарорликни таъминлашда профессионал психологлар роли беқиёсдир.

Шу маънода, мунтазам ўтказиладиган бундай амалий семинар ва тренинглар амалий тажриба алмашиш, ўзаро илҳомланиш ва ҳамкорликдаги ёндашувларни шакллантириш учун самарали майдон вазифасини ўтамоқда.

Мазкур семинар амалиётчи психологлар учун назарий билим ва амалий машғулотларга бой, фойдали ўқув майдонига айланди. Тадбир доирасидаги мулоқот ва фикр алмашувлар эса келгусида таълим сифати ва ўқувчиларнинг касбий ҳамда шахсий ривожига хизмат қиладиган ташаббуслар учун мустаҳкам асос яратди. Зеро, ҳар бир боланинг баркамол улғайиши, жамиятда муносиб ўрин топиши, энг аввало, унинг шахсий ривожи ва руҳий қўллаб-қувватланишига боғлиқ.

Шоҳзод Қурбонбоев.