76-sonli umumtaʼlim maktabida “Birinchi psixologik yordam” mavzusida seminar boʻlib oʻtdi

Taʼlim tizimida oʻquvchi shaxsiyatini har tomonlama rivojlantirish, ularda mustahkam hayotiy koʻnikmalarni shakllantirish dolzarb masalaga aylangan. Buning uchun esa maktablarda amalga oshirilayotgan psixologik xizmatning sifatini oshirish, amaliyotchi mutaxassislarning bilim va koʻnikmalarini muntazam ravishda boyitish bugungi kunning talabidir. Shu maqsadda Amudaryo tuman Maktabgacha va maktab taʼlimi boʻlimi tasarrufidagi 76-sonli umumtaʼlim maktabida “Birinchi psixologik yordam” mavzusida amaliyotchi psixologlar uchun seminar tashkil etildi.

Tadbirda Qoraqalpogʻiston Respublikasi Maktabgacha va maktab taʼlimi vazirligi Psixologik-pedagogik tashxis faoliyatini tashkil etish shuʼbasi rahbari Erkin Nurtayev, tuman Maktabgacha va maktab taʼlimi boʻlimi boshligʻi Yalgʻash Shomuradov hamda tumanlardan kelgan amaliyotchi psixologlar ishtirok etdi.

Dastlab mehmonlar 76-sonli umumtaʼlim maktabi hovlisida tantanali tarzda kutib olindi. Seminar ishtirokchilari uchun maxsus qiziqarli savol-javob oʻyini tashkil etildi. Inson hayoti mazmuni, samarali muloqot, bolalar va oʻsmirlar tarbiyasiga doir mavzularga bagʻishlangan savollarga mutaxassislar oʻz tajribalari asosida atroflicha javob berdilar.

Seminar doirasida mehmonlar “Dolzarb 90 kun” loyihasi asosida maktabda yoʻlga qoʻyilgan ishlar, toʻgaraklar faoliyati bilan yaqindan tanishdi. Maʼlumki, bugun mehnat bozorida raqobatbardosh va zamonaviy talablarga javob beradigan mutaxassislarga ehtiyoj yuqori. Shundan kelib chiqib, soʻnggi yillarda mamlakatimizda taʼlim tizimida kasb-hunar taʼlimini rivojlantirishga alohida eʼtibor qaratilmoqda.

Prezidentning tegishli Qaroriga muvofiq, mazkur maktabda ham oʻquvchilarning kasb-hunarga boʻlgan qiziqishini oshirish hamda mehnat bozori talablariga mos malakali va raqobatbardosh kadrlarni tayyorlash maqsadida 2024–2025 oʻquv yilidan boshlab kasb-hunarga yoʻnaltirilgan yangi oʻquv dasturlari joriy etildi. Yigitlar duradgorlikni, qizlar esa tikuvchilik kasbini oʻrganmoqda. Mehmonlar oʻquvchilar tomonidan tayyorlangan mahsulotlar bilan tanishib, ularning qoʻl mehnatlarini yuqori baholadilar.

Aytish joizki, hozirda 76-sonli umumtaʼlim maktabida 39 nafar oʻquvchi kasb-hunar egallab, maktabdagi taʼlim bilan bir qatorda oʻz mehnati orqali daromad topishni boshlagan. Yangi oʻquv yilidan boshlab yana 2 ta umumtaʼlim maktabida 10–11-sinf oʻquvchilari uchun ham kasb-hunar oʻrgatish yoʻlga qoʻyilishi koʻzda tutilgan.

Oʻquvchilarga sifatli taʼlim berish bilan birga, ularning kasbiy koʻnikmalarini rivojlantirish, kelajakda mustaqil hayotga tayyorlash va boʻsh vaqtlarini mazmunli tashkil etish maqsadida amalga oshirilayotgan ishlar oʻz samarasini bermoqda.

Seminarning asosiy qismi “Birinchi psixologik yordam” mavzusidagi amaliy mashgʻulotlar bilan davom etdi. Mashgʻulot avvalida masʼullar tomonidan tadbirning maqsad va vazifalari, xususan, oʻquvchilarda stress, xavotir, his-tuygʻularni boshqarish koʻnikmalarini shakllantirish zarurligi haqida fikr-mulohazalar bildirildi. Shuningdek, amaliyotchi psixologlar nafaqat bolalar, balki ularning ota-onalari va oʻqituvchilari bilan ham samarali ishlash koʻnikmalariga ega boʻlishi kerakligi alohida taʼkidlandi.

Mashgʻulotlar davomida psixolog-trenerlar tomonidan sinfdagi bolalar bilan individual ishlash, hayajonni nazorat qilish, favqulodda vaziyatlarda toʻgʻri va tezkor qaror qabul qilish kabi koʻnikmalarga oid amaliy usullar taqdim etildi. Psixologlar oʻzaro tajriba almashish jarayonida uchrayotgan muammolar va ularni hal etish boʻyicha oʻz yechimlari bilan oʻrtoqlashishdi.

12-, 27-, 29-, 40-, 70- va 84-sonli maktablarning amaliyotchi psixologlari tomonidan olib borilgan mashgʻulotlar taʼlim-tarbiya jarayonida psixologik yondashuvning oʻrni, oʻquvchi shaxsiyatiga taʼsir etuvchi omillar kabi mavzularni qamrab oldi. Ularda oʻz maktablarida qoʻllanayotgan innovatsion yondashuvlar, diagnostika usullari va amaliy ish tajribalari haqida ham fikrlar bildirildi.

Seminar ishtirokchilari taʼkidlaganidek, bunday tadbirlar psixologlarning kasbiy malakasini oshirish, yangiliklardan xabardor boʻlish hamda ish jarayonida uchrayotgan muammolarga yechim topishda muhim ahamiyat kasb etadi. Ayniqsa, oʻquvchilarda oʻzini anglash, ijobiy muloqot koʻnikmalarini shakllantirish va ruhiy barqarorlikni taʼminlashda professional psixologlar roli beqiyosdir.

Shu maʼnoda, muntazam oʻtkaziladigan bunday amaliy seminar va treninglar amaliy tajriba almashish, oʻzaro ilhomlanish va hamkorlikdagi yondashuvlarni shakllantirish uchun samarali maydon vazifasini oʻtamoqda.

Mazkur seminar amaliyotchi psixologlar uchun nazariy bilim va amaliy mashgʻulotlarga boy, foydali oʻquv maydoniga aylandi. Tadbir doirasidagi muloqot va fikr almashuvlar esa kelgusida taʼlim sifati va oʻquvchilarning kasbiy hamda shaxsiy rivojiga xizmat qiladigan tashabbuslar uchun mustahkam asos yaratdi. Zero, har bir bolaning barkamol ulgʻayishi, jamiyatda munosib oʻrin topishi, eng avvalo, uning shaxsiy rivoji va ruhiy qoʻllab-quvvatlanishiga bogʻliq.

Shohzod Qurbonboyev.